អះអាង​ចំពោះមុខ​ពលរដ្ឋ អាជ្ញាធរ​រាជធានី​ភ្នំពេញ ​ប្រកាស​នឹង​​​ដោះស្រាយការ​ជន់លិចនៅ​មុខមជ្ឈមណ្ឌលម៉ុងឌីយ៉ាល់

លោកស៊ុយ សេរិទ្ធ អភិបាលរងរាជធានី បាន​អះអាង​ចំពោះមុខ​ពលរដ្ឋ​ក្នុង​ខណ្ឌទួលគោកលើវិធានការ​​​ដោះស្រាយ​ការ​ជន់លិច​នៅមុខមជ្ឈមណ្ឌលម៉ុងឌីយ៉ាល់ពេលមាន​ភ្លៀងខ្លាំង​ម្តងៗ។

ថ្លែងនៅ​​ក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញនាព្រឹកថ្ងៃទី២៤ ខែតុលានេះ នៅមហោស្របចេនឡា ក្នុងសង្កាត់ផ្សារដើមគរ ខណ្ឌទួលគោក​ លោក ស៊ុយ សេរិទ្ធ អភិបាលរងរាជធានីបាន​បញ្ជាក់ថា ខណ្ឌ​ទួលគោក​​​បានធ្វើបណ្ដាញលូជាច្រើនដើម្បីដោះស្រាយបញ្ហាលិចលង់។ ប៉ុន្តែក៏នៅមានបញ្ហាប្រឈមដោយសារការ​លិច​លង់​នេះពោលគឺឱ្យតែមានភ្លៀងខ្លាំងម្ដងៗពិសេសនៅមុខ​មជ្ឈមណ្ឌលម៉ុងឌីយ៉ាល់ផ្លូវម៉ៅសេទុង។

ដើម្បីដោះស្រាយបញ្ហានេះ រដ្ឋបាលរាជធានីភ្នំពេញបានកំពុងស្នើសុំទៅក្រសួងសេដ្ឋកិច្ចនិងហិរញ្ញវត្ថុ ដើម្បីយកថវិកាមួយចំនួនមកដោះស្រាយបញ្ហាទាំងនេះពិសេសនៅមុខម៉ុងឌីយ៉ាល់និងនៅស្ថានីយបឹងទំពុន ស្របទៅតាមគោលនយោបាយរបស់សម្ដេចបវរធិបតីហ៊ុនម៉ាណែត ដែលនឹងធ្វើឲ្យរាជធានីភ្នំពេញលែងមានការលិចលង់ នៅក្នុងអាណត្តិនេះ។

វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញអាណត្តិទី ៣ បាន​រៀបចំឡើង​នាព្រឹកថ្ងៃទី២៤ ខែតុលានេះ នៅមហោស្របចេនឡា ក្នុងសង្កាត់ផ្សារដើមគរ ខណ្ឌទួលគោកក្រោមវត្តមានលោក ជួប ខុន សមាជិកក្រុមប្រឹក្សារាជធានីភ្នំពេញតំណាងលោកម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកស៊ុយ សេរិទ្ធ អភិបាលរងរាជធានី តំណាងឲ្យ​លោក ឃួង ស្រេង អភិបាលរាជធានីភ្នំពេញ។

ក្នុងវេទិកានេះ ប្រជាពលរដ្ឋបានលើកឡើងជាសំណើនិងសំណូមពរផ្ទាល់មាត់ចំនួន ៣ រូបនិងលាយល័ក្សអក្សរចំនួន ៣៨ បញ្ហា។ ចំពោះសំណើរសំណូមពរផ្ទាល់មាត់ ទាំង ៣ ត្រូវបានអាជ្ញាធររាជធានីក៏ដូចជាអាជ្ញាធរខណ្ឌស្រាយបំភ្លឺនិងសន្យាថានឹងដោះស្រាយជូនពួកគាត់ឱ្យបានល្អប្រសើរ។

ចំពោះសំណើនិងសំណូមពរផ្ទាល់មាត់នោះរួមមាន ការស្នើសុំឲ្យអាជ្ញាធរខណ្ឌទួលគោកជួយរៀបចំសម្រាប់ធ្នាប់​សាធារណៈ ខឿនវិទ្យាល័យ ជា ស៊ីម សន្ធរម៉ុក ដោយសារតែមានរថយន្តចតលើចិញ្ចើមផ្លូវមិនអាច​ឲ្យសិក្សានុសិស្សនិងប្រជាពលរដ្ឋអាចធ្វើដំណើរបាន។ បន្ថែមពីនេះការលក់ដូររំលោភយកចិញ្ចើមផ្លូវ ក៏បានកើតឡើងជាមួយគ្នានេះផងដែរ ដែល​ទាមទារឲ្យមានការរៀបសណ្តាប់ធ្នាប់នៅទីនេះឲ្យបានល្អឡើងវិញ។

ប្រជាពលរដ្ឋក៏បានលើកឡើងឲ្យអាជ្ញាធររឹតបន្តឹងចំពោះការជីកដាក់បណ្ដាញទឹកស្អាត ដែលបានទុកចំហយូរពេកបង្កការគ្រោះថ្នាក់ដល់បងប្អូនប្រជាពលរដ្ឋនិងការស្នើសុំឲ្យផ្ដល់ការកែអត្តសញ្ញាណប័ណ្ណឲ្យបានលឿន។ ពលរដ្ឋ​បញ្ជាក់ថា ពលរដ្ឋរស់នៅសង្កាត់បឹងសាឡាង តែអត្តសញ្ញាណប័ណ្ណដាក់នៅសង្កាត់បឹងព្រលិតឯណោះវិញ ហើយពួកគាត់​ស្នើ​សុំកែ​តម្រូវ​ឡើងវិញតាំងពីខែ ០២ រហូតមកដល់ពេលនេះនៅតែមិនទាន់បានទៀត។

លោកស៊ុយ សេរិទ្ធ អភិបាល​រង​រាជធានីភ្នំពេញ​បានមានប្រសាសន៍ថា ការបម្រើប្រជាពលរដ្ឋជារឿងត្រឹមត្រូវរបស់អាជ្ញាធរ​ដែលត្រូវបំរើពួកគាត់។ ជុំវិញការស្នើសុំរៀបចំសណ្តាន់ធ្នាប់នៅចិញ្ចើមផ្លូវនៃវិទ្យាល័យ ជា ស៊ីម សន្ធរម៉ុក លោកបានបញ្ជាទៅអាជ្ញាធរខណ្ឌទួលគោក ត្រូវតែរៀបចំឲ្យបានល្អប្រសើរ។

លោក ជា ពិសី អភិបាលខណ្ឌទួលគោកបានបញ្ជាក់ដែរថា រដ្ឋបាលខណ្ឌទួលគោកបានបម្រើប្រជាពលរដ្ឋបានយ៉ាងល្អ ដូច្នេះហើយទើបការបើកវេទិកាសាធារណៈមិនសូវមានប្រជាពលរដ្ឋលើកឡើងជាសំណើរនិងសំណូមពរច្រើន ព្រោះអ្វីជាកង្វល់និងបញ្ហារបស់ពួកគាត់ត្រូវបានអាជ្ញាធរខណ្ឌទួលគោក ក៏ដូចជាក្រុមការងារថ្នាក់ជាតិចុះជួយមូលដ្ឋានខណ្ឌ​ទួលគោក ធ្វើការដោះស្រាយជូនពួកគាត់ជាប្រចាំដោយក្នុងមួយឆ្នាំៗបានដោះស្រាយជូនពី ២០០ ទៅ ៣០០ករណី។ នេះជាតួលេខមួយបង្ហាញពីការជឿទុកចិត្តពីសំណាក់ប្រជាពលរដ្ឋមកលើអាជ្ញាធររបស់យើង។

លោកជួប ខុន បានលើកឡើងថា វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញធ្វើឡើងដើម្បីអោយអាជ្ញាធររាជធានី ខណ្ឌ សង្កាត់និងប្រជាពលរដ្ឋបានជួបគ្នា និងបានពិភាក្សាលើបញ្ហាផ្សេងៗ ដែលជាកង្វល់របស់ប្រជាពលរដ្ឋអោយអាជ្ញាធរបានដឹងលឺ ហើយរួមគ្នាដោះស្រាយ ដែលមានដូចជាបញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៏នៅមូលដ្ឋានជាដើម៕

អត្ថបទ៖ ស្រីរ័ត្ន