ក្លិបអ្នកកាសែតកម្ពុជា ទទូចឱ្យអ្នកសារព័ត៌មាន ពង្រឹងក្រមសីលធម៌ និងវិជ្ជាជីវៈ

ក្រមសីលធម៌និងវិជ្ជាជីវៈ មិនគ្រាន់តែជួយអ្នកសារព័ត៌មានពីការចោទប្រកាន់ពីបទល្មើស ឬឃាត់ខ្លួននោះទេ តែក្រមសីលធម៌និងវិជ្ជាជីវៈ ជួយត្រួសត្រាយផ្លូវអ្នកសារព័ត៌មាន ក្នុងការលើកកម្ពស់ជីវភាព​រស់នៅប្រកបដោយភាពថ្លៃថ្នូរ និងរួមចំណែកក្នុងការអភិវឌ្ឍវិស័យសារព័ត៌មាននៅកម្ពុជាផងដែរ។
នេះបើតាមសេចក្តីប្រកាសរបស់ ក្លិបអ្នកកាសែតកម្ពុជា នៅរសៀលថ្ងៃទី២៤ ខែតុលានេះ។

ក្លិបអ្នកកាសែតកម្ពុជា (ក.អ.ក) លើកឡើងបែបនេះ បន្ទាប់ពីកត់សម្គាល់ឃើញថា មួយរយៈចុងក្រោយនេះ នៅតែមានអ្នកសារព័ត៌​មាន​ជាបន្តបន្ទាប់ បានប្រឈមនឹងការឃាត់ខ្លួនពីសមត្ថកិច្ច ពាក់ព័ន្ធនឹងការបំពានលើក្រមសីលធម៌និងវិជ្ជាជីវៈ ដែលនាំឱ្យប៉ះពាល់ដល់ការលើកកម្ពស់វិស័យសារព័ត៌មាននៅកម្ពុជា។ ជាក់ស្តែងថ្មីៗនេះ មានអ្នកសារព័ត៌មាន៤រូប ត្រូវ​សមត្ថកិច្ចខេត្ត​មណ្ឌល​គិរី ឃាត់ខ្លួន អាចមកពីកង្វះខាតក្នុងការអនុវត្តក្រមសីលធម៌ និងវិជ្ជាជីវៈផ្នែកសារព័ត៌មាន។

ករណីនេះ មិនមែនជាបញ្ហាថ្មី សម្រាប់ស្ថានភាពសារព័ត៌មាននៅកម្ពុជាទេ ប៉ុន្តែអ្វីដែលក្លិបអ្នកកាសែតកម្ពុជាចង់រំលេច គឺទាំងស្ថាប័នជំនាញ ទាំងសមាគមសារព័ត៌មាន ជាពិសេសក្លិបអ្នកកាសែតកម្ពុជា កំពុងយកចិត្តទុកដាក់ ក្នុងការបើកវគ្គបណ្តុះបណ្តាលផ្សព្វផ្សាយអប់រំដល់អ្នកសារព័ត៌មាន ជាបន្តបន្ទាប់ អំពីក្រមសីលធម៌និងវិជ្ជាជីវៈ និងចូលរួមអនុវត្តដោយស្មារតីទទួលខុសត្រូវ។

តាមការគូសបញ្ជាក់ អ្នកសារព័ត៌មានមួយចំនួន ហាក់ដូចជាមិនទាន់អនុវត្តបាន នៅតែមានការធ្វេសប្រហែស ឬមើលរំលងនូវក្រមសីលធម៌និងវិជ្ជាជីវៈ ជាហេតុនាំឱ្យមានការឃាត់ខ្លួន។

ជាថ្មីម្តងទៀត ក្លិបអ្នកកាសែតកម្ពុជា អំពាវនាវដល់អ្នកសារព័ត៌មានទាំងអស់ ត្រូវអនុវត្តឱ្យបានខ្ជាប់ខ្ជួន នូវក្រមសីលធម៌និងវិជ្ជាជីវៈ ដើម្បីជាការការពារខ្លួនឯងផង និងដើម្បីលើកកម្ពស់ការអនុវត្តនូវក្រមសីលធម៌និងវិជ្ជាជីវៈសារព័ត៌មាន សំដៅធ្វើយ៉ាងណាឱ្យស្ថាប័នសារព័ត៌មាន​ និង​អ្នក​សារព័ត៌មាន​រក្សាបាននូវកិត្តិយស សេចក្តីថ្លៃថ្នូរ​ ចៀសវាងភាពអសកម្ម ដែលនាំឱ្យ​ប៉ះពាល់ដល់ការអភិវឌ្ឍវិស័យសារព័ត៌មាន​នៅ​កម្ពុជា៕