ស្រូវពូជជាង ១៦៦ តោន ចែកកសិករដែលរងការខូច​ខាតដោយសារ​គ្រោះទឹកជំនន់នៅ​ខេត្តពោធិ៍សាត់​

គ្រាប់ពូជស្រូវចំនួន ១៦៦,៨ តោន ត្រៀមចែកជូនកសិករ ដើម្បីដាំដុះស្ដារឡើងវិញបន្ទាប់ពីរងការខូចខាតដោយសារ​ទឹកជំនន់​នៅខេត្ត​ពោធិ៍សាត់នៅរសៀលថ្ងៃទី ២៦ ខែតុលា ឆ្នាំ ២០២៣។

​លោក ហៃ ធូរ៉ា ​ប្រធានមន្ទីរកសិកម្ម រុក្ខាប្រមាញ់ និងនេសាទ ​ខេត្តពោធិ៍សាត់បានឱ្យដឹងថា​ គិតត្រឹមថ្ងៃទី ២០ ខែតុលា ឆ្នាំ ២០២៣ ដំណាំស្រូវជាង​ ២ ពាន់ហិកតា(២.៤៣៩) ក្នុងខេត្តពោធិ៍សាត់រងការខូចខាត​ដោយសារ​ទឹកជំនន់។

​ពូជស្រូវដែលរាជរដ្ឋាភិបាលចែកជូនប្រជាពលរដ្ឋនៅរសៀលថ្ងៃទី ២៦ ខែតុលា ឆ្នាំ ២០២៣នេះ​សរុបចំនួន ១៦៦,៨ តោន ស្មើនឹង ១៦៦៨គ្រួសារ ក្នុងនោះ ស្រុកកណ្តៀង ១១២០​ គ្រួសារ ​និងក្រុង​ពោធិ៍សាត់ចំនួន៥៤៨គ្រួសារ។

​របាយការណ៍របស់រដ្ឋបាលខេត្តពោធិ៍សាត់បង្ហាញថា ដំណាំរបស់ប្រជាកសិករជាង ១ ម៉ឺនហិកតា (១២.០៤២) រងការប៉ះពាល់ដោយសារទឹកជំនន់ក្នុងនោះមានដំណាំរួមផ្សំ និងឧស្សាហកម្មជាង ១ ពាន់ហិកតា (១.៤៩១)​។ ក្នុងចំណោមដំណាំដែលប៉ះពាល់ មានដំណាំស្រូវជាង​ ២ ពាន់ហិកតា(២.៤៣៩) រងការខូចខាតទាំងស្រុង។

លោក ឃឹម ហ្វីណង់ ​អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានឱ្យដឹងកាលពីពេលថ្មីៗនេះថា ក្រសួង​មាន​ក្រុមការងារកំពុងរៀបចំធ្វើរបាយការណ៍​ស្នើស្បៀងបម្រុង ដើម្បីចែកស្រូវពូជដល់ប្រជាកសិករ​ដែលមានដំណាំ​រងផលប៉ះពាល់ដោយគ្រោះទឹកជំនន់។

លោកបញ្ជាក់ថា ការផ្ដល់ពូជស្រូវនេះ ក៏ត្រូវសិក្សា​ពីតំ​បន់​ដែរ ​ខណៈតំបន់ខ្លះមានពូជស្រូវ​ក៏គ្មាន​ទឹក​ធ្វើដែរ ​ដូច្នេះ!ការចែកស្រូវមិន​ផ្ដល់​គ្រប់​ទីកន្លែង​នោះទេ លើកលែងតែតំបន់ដែល​មាន​តម្រូវ​ការចាំ​បាច់ ហើយកសិករអាចធ្វើ​បានមួយ​ជុំបន្ត​ទៀត។

កន្លងមកគ្រាប់ពូជស្រូវចំនួន ១១៨,៦ តោន ត្រូវបានរាជរដ្ឋាភិបាល​ចែកជូនប្រជាពលរដ្ឋរងគ្រោះដោយសារទឹកជំនន់ជាង ១ ពាន់គ្រួសារ (១ ១៨៦) នៅខេត្តក្រចេះ ដើម្បីដាំដុះស្ដារឡើងវិញផងដែរ៕

អត្ថបទ៖ ឡេង ដេត