​ផ្សោត ៤ ក្បាលបាត់បង់ជីវិត​នៅឆ្នាំ ២០២៣

គិតចាប់ពីដើមឆ្នាំរហូតដល់ដំណាច់ខែតុលា ឆ្នាំ ២០២៣ មានផ្សោតចំនួន ៤ ក្បាលហើយបានស្លាប់​បាត់​បង់​ជីវិត​។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទចេញផ្សាយនៅថ្ងៃទី ២៥ ខែតុលា ឆ្នាំ ២០២៣។ ប្រភពដដែលបញ្ជាក់ថា ៤ ឆ្នាំចុងក្រោយចាប់ពីឆ្នាំ ២០២០ មានផ្សោតសរុប ​៣៣ ក្បាលបានស្លាប់បាត់បង់ជីវិត និងផ្សោតកើតថ្មីចំនួន ២៨ ក្បាល។

សូមជំរាបផងដែរថា លោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ២៣ ខែតុលា បានដឹកនាំប្រតិភូក្រសួង និងតំណាងអង្គការ WWF ប្រចាំនៅកម្ពុជា ចូលរួមក្នុងកិច្ចប្រជុំអន្តរជាតិរយៈពេលពីរថ្ងៃ (២៣-២៤) ដើម្បីរៀបចំ និងអនុម័តសេចក្តីថ្លែងការណ៍ជាសកល ស្តីពីការអភិរក្សសត្វផ្សោតទន្លេ ដែលកិច្ចប្រជុំនេះរៀបចំដោយរដ្ឋាភិបាលកូឡុំប៊ី និងអង្គការមូលនិធិសកលសម្រាប់អភិរក្សធម្មជាតិ WWF នៅទីក្រុងបូហ្កូតា ប្រទេសកូឡំប៊ី។

សេចក្តីថ្លែងការណ៍នេះ បានផ្តោតលើសកម្មភាពជាអាទិភាពចំនួន៨ គឺការបង្កើតបណ្តាញទំនាក់ទំនងតំបន់ការពារសត្វផ្សោត ការគ្រប់គ្រងប្រកបដោយប្រសិទ្ធភាព ការស្រាវជ្រាវនិងការតាមដាន ការផ្សារភ្ជាប់ជាមួយសហគមន៍មូលដ្ឋាន ការលុបបំបាត់សកម្មភាពនេសាទពុំស្របច្បាប់ ការកែលម្អគុណភាពទឹក ការរៀបចំទិវាសត្វផ្សោតទន្លេ និងការធានាធនធានសម្រាប់ការអនុវត្តសកម្មភាព។

ក្រោយទទួលបានការឯកភាពជារួម លោកប្រធានប្រតិភូកម្ពុជា រួមជាមួយនឹងប្រធានប្រតិភូនៃបណ្តាប្រទេសផ្សេងៗទៀតបានចុះហត្ថលេខាលើសេចក្តីថ្លែងការណ៍ជាសកល ដើម្បីទទួលស្គាល់សេចក្ដីថ្លែងការណ៍រួម និងដាក់ឱ្យអនុវត្តជាផ្លូវការ៕