បេក្ខជនជិត ១០០ នាក់ជាប់សម្ភាសន៍នៅវេទិកាការងាររបស់ NEA

វេទិកាការងាររបស់ទីភ្នាក់ងារជាតិមុខរបរ និងការងារ(NEA) សហការជាមួយនឹង ស.ស.យ.ក វិស័យការងារបានបញ្ចប់ទៅដោយរលូនកាលពីថ្ងៃទី២៦ ខែតុលា ម្សិលមិញ ដោយមានបងប្អូនយុវជន សិស្ស/និស្សិត អ្នកស្វែងរកការងារធ្វើចំនួន ២៧៩ នាក់បានចូលរួមដាក់ពាក្យ និងសម្ភាសការងារ។

ជាលទ្ធផល អ្នកដាក់ពាក្យចំនួន ៩៧ នាក់ទទួលបានលទ្ធផលល្អពីកិច្ចសម្ភាស ក្នុងនោះអ្នកសម្ភាសជាប់ស្ថាពរមានចំនួន ៤នាក់ និង ៩៣ នាក់ផ្សេងទៀតសម្ភាសជាប់បឋម ហើយនឹងត្រូវទៅសម្ភាសបន្តនៅក្រុមហ៊ុននាពេលឆាប់ៗខាងមុខនេះ។

សូមជម្រាបថា ក្រុមហ៊ុនធំៗទាំង៧ ក្នុងនោះរួមមាន៖ ធនាគារ WOORI, និងធនាគារ ស្ថាបនា, ក្រុមហ៊ុន JACCS, ក្រុមហ៊ុន EMD (F&D) Co,Ltd, ក្រុមហ៊ុន MEKONGNET, ក្រុមហ៊ុន CBS និងក្រុមហ៊ុន MR Training។

លោកស្រី ហែម សុជាតា ជាមន្ត្រីជ្រើសរើសបុគ្គលិកក្រុមហ៊ុន Mekongnet Demend លើកឡើងថា វេទិកាការងារជាកម្មវិធីមួយដ៏មានសារៈសំខាន់ ដើម្បីជួយដល់អ្នកដែលមានបំណងចង់ស្វែងរកការងារធ្វើ ឬចង់ផ្លាស់ប្តូរការងារ។

លោកស្រីបន្ថែមថា សិស្ស/និស្សិត ឬអ្នកផ្លាស់ប្តូរការងារមិនគួរមើលរំលងវេទិកាការងារផ្សេងៗដែលរៀបចំឡើងដោយ NEA នោះទេ ព្រោះជាទីកន្លែងដែលជួយដល់ពួកគេឱ្យឆាប់ទទួលបានឱកាសការងារភ្លាមៗ ដោយមិនចាំបាច់រង់ចាំយូរ។

លោក នួន ភីណាន មន្ត្រីធនធានមនុស្សធនាគារ AEON លើកឡើងថា ធនាគារ AEON តែងតែសហការជាមួយនឹង NEA មិនថាជាកម្មវិធីវេទិកាការងារ ឬកម្មវិធីផ្សេងៗជាច្រើនទៀតដូចជាពិព័រណ៌ការងារ កិច្ចសម្ភាសការងារប្រចាំខែជាដើម ព្រោះកម្មវិធីនេះបានជួយឱ្យក្រុមហ៊ុនជ្រើសរើសបុគ្គលិកបានទាន់ពេលវេលា និងទាន់តម្រូវការ៕