អភិបាលខណ្ឌច្បារអំពៅតែងនៅក្បែរម៉ាស៊ីនបូមទឹកជានិច្ច ខណៈទឹកជំនន់លិចផ្ទះពលរដ្ឋ

ប្រជាពលរដ្ឋរស់នៅមូលដ្ឋានខណ្ឌច្បារអំពៅបាននិយាយថា ក្នុងពេលដែលលំនៅឋានរបស់ប្រជាពលរដ្ឋរងការលិច​លង់គឺពួកគាត់បានឃើញវត្តមានលោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅដឹកយកម៉ាសុីនបូមទឹកដាក់បូមគ្រប់ទីតាំងដែលរងការលិចលង់ធ្វើយ៉ាងណាឲ្យទឹកឆាប់ស្រក។

ជាក់ស្តែងនៅកណ្តាលថ្ងៃត្រង់ថ្ងៃទី ២៧ ខែតុលានេះលោក ចេង មុនីរ៉ា អភិបាលខណ្ឌច្បារអំពៅបានចុះពិនិត្យទីតាំងដាក់ម៉ាសុីនបូមទឹកនៅគ្រប់សង្កាត់ទាំង៥ក្នុងមូលដ្ឋានខណ្ឌច្បារអំពៅធ្វើយ៉ាងណាប្រើប្រាស់គ្រប់មធ្យោបាយឲ្យតែទឹកបានរីងស្ងួតឆាប់ៗ។

លោក ចេង មុនីរ៉ា បានប្រាប់កម្ពុជាថ្មីថា ចាប់តាំងពីសង្កាត់ទាំង ៥ រងការលិចលង់ដោយជំនន់ទឹកភ្លៀងរួចមក លោកពុំបានចេញទៅណាក្រៅពីយកម៉ាសុីនបូមទឹកខ្នាតធំដាក់បូមហើយលោកចុះជាប់ជាមួយក្រុមបច្ចេកទេសប្រើប្រាស់ម៉ាសុីនក្រែងមានការរអាក់រអួលមិនដំណើរការបូម។

ទន្ទឹមនឹងនេះលោក ចេង មុនីរ៉ា បានសម្ដែងការដឹងគុណដល់ប្រមុខដឹកនាំដែលបានដាក់កម្លាំងកងអន្តរាគមន៍ជួយ​សង្គ្រោះ​ របស់អង្គរក្សសម្តេចតេជោនាំយកម៉ាសុីនបូមទឹកដាក់បូមទឹកដោយប្រើប្រាស់ ២៤ ម៉ោងលើ ២៤ ម៉ោង ដើម្បីបូមទឹកចេញឲ្យឆាប់រីងស្ងួត។

ដោយឡែកលោក គុយ គឹមហ៊ាង នាយករងរដ្ឋបាលសាលាខណ្ឌច្បារអំពៅបានបញ្ជាក់ជំនន់ទឹកភ្លៀងបានបង្កឲ្យ​លិច​លង់លំនៅដ្ឋានប្រជាពលរដ្ឋរស់នៅសង្កាត់ទាំង៥ មានសង្កាត់ព្រែកប្រា សង្កាត់ព្រែកថ្មី សង្កាត់វាលស្បូវ សង្កាត់ព្រែកឯង និងសង្កាត់ក្បាលកោះ ហើយមកដល់ថ្ងៃទី ២៧ ខែតុលា នេះទឹកបានស្រកចុះជាង ៦០ ភាគរយ៕

អត្ថបទ៖ នរា