សម្ដេចធិបតី៖ ការអភិវឌ្ឍរបស់រាជរដ្ឋាភិបាល គឺគិតដល់ផលប្រយោជន៍របស់ពលរដ្ឋ

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ការអភិវឌ្ឍរបស់រាជរដ្ឋាភិបាល គឺធ្វើយ៉ាងណាផ្ដល់ផលប្រយោជន៍ដល់ប្រជាពលរដ្ឋ ហើយរាជរដ្ឋាភិបាល ដឹកនាំដោយគណបក្សប្រជាជនកម្ពុជា បាននិងកំពុងខិតខំជំរុញការអភិវឌ្ឍដោយគិតដល់ប្រយោជន៍ពលរដ្ឋជាអាទិភាព។  

សម្ដេចធិបតី ថ្លែងបែបនេះ ក្នុងឱកាសអញ្ជើញចុះជួបសំណេះសំណាលជាមួយបងប្អូនកម្មករចំនួន​​ ១៨.០២៨នាក់ នៅតាមបណ្តារោងចក្រ-សហគ្រាស នៅមូលដ្ឋានក្នុងខណ្ឌមានជ័យ និងខណ្ឌពោធិ៍សែនជ័យ​ រាជធានីភ្នំពេញ នាព្រឹកថ្ងៃសៅរ៍ ទី២៨ តុលា ២០២៣នេះ។

សម្ដេចធិបតី ហ៊ុន ម៉ាណែត បានថ្លែងដូច្នេះថា៖ «បើគ្រាន់តែឡើងថ្លៃដី វាមិនគ្រប់គ្រាន់សម្រាប់ការអភិវឌ្ឍនោះទេ។ ការអភិវឌ្ឍដែលមានតម្លៃពិតនៃដី ឬតំបន់មួយ ទាល់តែវាផ្ដល់ផលប្រយោជន៍ឱ្យប្រជាជនកាន់តែច្រើន ហ្នឹងហើយបានហៅ ថា ការអភិវឌ្ឍ»។ សម្ដេចធិបតី បន្តថា បើត្រឹមទិញដីលក់ដី វាអត់បានចូលរួមការអភិវឌ្ឍប៉ុន្មានទេ តែបើយកដីមួយកន្លែង ហើយអភិវឌ្ឍន៍តំបន់នោះឱ្យទៅជាកន្លែងសំដៅបង្កើតសកម្មភាពការងារ ជាអាទិ៍ បង្កើតរោងចក្រ-សហគ្រាស ផ្សារ សាលារៀន ឱ្យបានច្រើន ដើម្បីចូលរួមជួយធ្វើយ៉ាងណាឱ្យពលរដ្ឋមានការងារធ្វើ មានជីវភាពល្អប្រសើរ ទើបជាការអភិវឌ្ឍពិតប្រាកដ។

ក្នុងន័យនេះ សម្ដេចធិបតី សង្កត់ធ្ងន់ថា នេះហើយ ជាការអភិវឌ្ឍពិតប្រាកដ ដែលរាជរដ្ឋាភិបាល ក្រោមការដឹកនាំដោយគណបក្សប្រជាជនកម្ពុជា តែងតែគិតគូ ហើយបាននិងកំពុងអនុវត្តយុទ្ធសាស្ត្រនេះ ដើម្បីផ្ដល់ជាផលប្រយោជន៍ និងចែក ផលលាភឱ្យដល់ដៃប្រជាពលរដ្ឋ ក៏ដូចជាជំរុញដល់សេដ្ឋកិច្ច-សង្គម៕