សម្ដេចធិបតី ថ្លែងថា បើត្រឹមទិញដីលក់ដី វាអត់បានចូលរួមដល់ការអភិវឌ្ឍប៉ុន្មានទេ

ក្នុងវេទិកាជួបសំណេះសំណាលជាមួយកម្មករ នៅមូលដ្ឋានក្នុងខណ្ឌមានជ័យ និងខណ្ឌពោធិ៍សែនជ័យ​ នាព្រឹកថ្ងៃសៅរ៍ ទី២៨ ខែតុលានេះ សម្ដេចធិបតី ហ៊ុន ម៉ាណែត បានថ្លែងថា បើត្រឹមទិញដីលក់ដី វាមិនបានចូលរួមជំរុញដល់ការអភិវឌ្ឍប្រទេសជាតិប៉ុន្មាននោះទេ។ តែផ្ទុយទៅវិញ ការអភិវឌ្ឍពិតប្រាកដ គឺលុះត្រាតែមានផលប្រយោជន៍ដល់ពលរដ្ឋ។

សម្ដេចធិបតី ហ៊ុន ម៉ាណែត បានថ្លែងដូច្នេះថា៖ «ពាក្យថា ដីមានតម្លៃនោះ បងប្អូនថា ដីឡើងថ្លៃ អាដីឡើងថ្លៃ វាក៏ឡើងដែរ ល្អសម្រាប់ម្ចាស់ដី ត្រឹមតែដីឡើងថ្លៃ មិនគ្រប់គ្រាន់សម្រាប់ការអភិវឌ្ឍទេ»។ សម្ដេចធិបតី បានបញ្ជាក់ថា ការអភិវឌ្ឍ តម្លៃពិតនៃដី ឬតំបន់មួយ ទាល់តែវាបានចូលរួមផ្ដល់ផលប្រយោជន៍ឱ្យដល់ប្រជាជនកាន់តែច្រើន ទើបហៅថា ការអភិវឌ្ឍ។

សម្ដេចធិបតី សង្កត់ធ្ងន់ថា៖ «បើត្រឹមទិញដីលក់ដី វាអត់បានចូលរួមការអភិវឌ្ឍប៉ុន្មានទេ តែបើយកដីមួយកន្លែង មកអភិវឌ្ឍន៍តំបន់នោះឱ្យទៅជាកន្លែងសំដៅបង្កើតសកម្មភាពការងារ ជាអាទិ៍ បង្កើតរោងចក្រ-សហគ្រាស ផ្សារ សាលារៀន ឱ្យបានច្រើន ដើម្បីចូលរួមជួយធ្វើយ៉ាងណាឱ្យពលរដ្ឋមានការងារធ្វើ មានជីវភាពល្អប្រសើរ ទើបជាការអភិវឌ្ឍពិតប្រាកដ»។

ជាមួយគ្នានេះ ក្នុងនាមជាប្រមុខរាជរដ្ឋាភិបាល សម្ដេចធិបតី បានគូសបញ្ជាក់ដែរថា ការអភិវឌ្ឍរនបស់រាជរដ្ឋាភិបាល ក្រោមការដឹកនាំដោយគណបក្សប្រជាជនកម្ពុជាជាច្រើនឆ្នាំមកនេះ តែងតែគិតគូ ហើយបាននិងកំពុងអនុវត្តជាប់ជាប្រចាំនូវយុទ្ធសាស្ត្រនេះ ដើម្បីផ្ដល់ជាផលប្រយោជន៍ និងចែកផលលាភឱ្យដល់ដៃប្រជាពលរដ្ឋ ក៏ដូចជាជំរុញដល់សេដ្ឋកិច្ច-សង្គម៕