ជំនួយការអប្បមាទ​ទូទាំង​ប្រទេស​នៅ​មណ្ឌលប្រឡង ប្រព្រឹត្តិ​ខុស​មាន​កម្រិត​ពិន័យ​​បែបណា?

ដើម្បីឱ្យការងាររបស់​ជំនួយការអប្បមាទទូទាំងប្រទេស ប្រព្រឹត្ត​ទៅប្រកប​ដោយ​ប្រសិទ្ធភាព​ ក្រសួង​អប់រំ យុវជន និង​កីឡា បាន​កំណត់តួនាទី​និងភារកិច្ច និង​កម្រិត​វិន័យរបស់ជំនួយ​ការអប្បមាទ​ទូទាំង​ប្រទេស ក្នុងដំណើរការប្រឡង​សញ្ញាបត្រ​ទុតិយភូមិ (បាក់ឌុប)។

១. តួនាទីជំនួយការអប្បមាទទូទាំងប្រទេសក្នុងដំណើរការប្រឡង

ជំនួយការអប្បមាទទូទាំងប្រទេស មានតួនាទី​ជាសេនាធិការឱ្យប្រធានអប្បមាទទូទាំងប្រទេស​ប្រចាំមណ្ឌល​ប្រឡងលើការត្រួតពិនិត្យ និងសង្កេតដំណើរការប្រឡង​ប្រចាំមណ្ឌល។

ជំនួយការអប្បមាទទូទាំងប្រទេស ត្រូវជ្រើសរើសចេញពីគរុសិស្ស និងគរុនិស្សិត​ដែលមានភាពហ្មត់ចត់ ស្មោះត្រង់ សុចរិតភាព ស្នាដៃល្អ វាងវៃ និងមានស្មារតីទទួលខុសត្រូវខ្ពស់។

២. ភារកិច្ចជំនួយការអប្បមាទទូទាំងប្រទេសក្នុងដំណើរការប្រឡង

– គោរពតាមច្បាប់ លិខិតបទដ្ឋាន និងគោលការណ៍ណែនាំរបស់ក្រសួងអប់រំ យុវជន និងកីឡា
– គោរព​តាមការណែនាំ​របស់ប្រធាន​គណៈមេប្រយោគ​ទូទាំង​ប្រទេស​ប្រចាំ​រាជធានីខេត្ត​ ប្រធាន​គណៈកម្មការ​អប្បមាទ​ទូទាំង​ប្រទេស​ប្រចាំមណ្ឌល
– ត្រួត​ពិនិត្យមើលស្ថានភាព​ជុំវិញ​មណ្ឌលប្រឡង ច្រកចេញ​ចូល​មណ្ឌល ទៅ​ចូល​បន្ទប់ អនុរក្ស​កំពុង​ហៅឈ្មោះបេក្ខជន​ចូលបន្ទប់ប្រឡង ក្នុងបរិវេណមណ្ឌលប្រអង្គ និង​បន្ទប់​ប្រឡង
– នៅពេលត្រួតពិនិត្យនៅក្នុងបន្ទប់ប្រឡង​ក្នុងពេលដំណើរការសំណេរ ជំនួយការអប្បមាទ​ទូទាំង ប្រទេស​ត្រូវឈរ​ខាងក្រៅបន្ទប់ ហើយមើលទៅក្នុង​បន្ទប់ប្រឡង តាមទ្វារ និង​បង្អួច
-ចូលរួម​ត្រួត​ពិនិត្យ និងសង្កេតមើលការ​បើកហិប និងកញ្ចប់វិញ្ញាសា
-រាយការណ៍ជាបន្ទាន់ និងជាបន្តបន្ទាប់អំពីដំណើរការប្រឡងតាមឋានានុក្រមរបស់ខ្លួន
-ចូលរួមរៀបចំរបាយការណ៍វាយតម្លៃស្តីពីដំណើរការសំណេរ ដែលប្រព្រឹត្តទៅនៅក្នុងមណ្ឌលសំណេររបស់ខ្លួន ក្រោមការដឹកនាំរបស់ប្រធានគណៈកម្មការអប្បមាទទូទាំងប្រទេសប្រចាំ​មណ្ឌល

៣. សិទ្ធិរបស់ជំនួយការអប្បមាទទូទាំងប្រទេស

– ចូលរួមតាមដានរាល់សកម្មភាពក្នុងមណ្ឌលប្រឡង តែមិនត្រូវចូលក្នុងបន្ទប់​ប្រឡង -រាយការណ៍ពីភាព​មិនប្រក្រតីដល់អ្នកមាន​សមត្ថកិច្ច ជាពិសេស ប្រធានអប្បមាទទូទាំងប្រទេស ប្រចាំ​មណ្ឌល ប្រធាន អនុប្រធានមណ្ឌល អនុរក្ស និងឃ្លាំមើលចំណាត់ការ
– រាយការណ៍ ឬសុំយោបល់​ពីប្រធានអប្បមាទទូទាំងប្រទេស​ប្រចាំមណ្ឌល ដោយ​ផ្ដល់ព័ត៌មានពី ចំណុច​ល្អ និងចំណុចខ្វះខាត​ដែលខ្លួនបានឃើញ
-ធ្វើការក្រោមការគ្រប់គ្រង និងសម្របសម្រួលរបស់ប្រធានអប្បមាទទូទាំងប្រទេស​ប្រចាំមណ្ឌលនីមួយៗ
– មិនមានសិទ្ធិយកទូរស័ព្ទដៃ ឬឧបករណ៍​អេឡិចត្រូនិក​ចូលក្នុងមណ្ឌល​ប្រឡង
– មិនមានសិទ្ធិយកកាបូប ឬសំពៀតចូលក្នុងមណ្ឌលប្រឡង។

៤. កាតព្វកិច្ចរបស់ជំនួយការអប្បមាទទូទាំងប្រទេស

– គោរពច្បាប់ សេចក្តីណែនាំ និងបទប្បញ្ញត្តិរបស់ក្រសួងអប់រំ យុវជន និងកីឡា
– គោរព និងអនុវត្តភារកិច្ចតាមការបែងចែករបស់ប្រធានអប្បមាទទូទាំងប្រទេសប្រចាំមណ្ឌល -ពាក់ប័ណ្ណសម្គាល់ និងប៉ានដៃសម្គាល់ ដែលផ្តល់ដោយប្រធានអប្បមាទទូទាំងប្រទេស ជាប្រចាំ ហាមថតចម្លង ឬឱ្យគេខ្ចីនូវប័ណ្ណសម្គាល់​ជំនួយការអប្បមាទ​ទូទាំងប្រទេស ឬឱ្យគេមក​ជំនួស បើ​បាត់​ប័ណ្ណ​សម្គាល់ ត្រូវផ្តល់ព័ត៌មានមកប្រធានអប្បមាទទូទាំងប្រទេស
– រួមចំណែករក្សា​សណ្តាប់ធ្នាប់ ភាពស្ងប់ស្ងាត់ សេចក្តីថ្លៃថ្នូរ និង​កិត្តិយសរួម​របស់ជំនួយការ អប្បមាទ​ទូទាំងប្រទេស
-ធ្វើស្វ័យប្រកាសពីទំនាស់ផលប្រយោជន៍ (មាន​សាច់ញាតិ បងប្អូន មិត្តភក្តិ​ជិតស្និទ្ធ) ដែលអាច​កើត​មាន​ឡើង​នៅក្នុងមណ្ឌលប្រឡង។

៥. កម្រិតវិន័យសម្រាប់ជំនួយការអប្បមាទទូទាំងប្រទេស

ក្នុងករណីជំនួយការអប្បមាទទូទាំងប្រទេសប្រព្រឹត្តខុសបទប្បញ្ញត្តិរបស់ក្រសួងអប់រំ យុវជន និងកីឡា និងសេចក្តីណែនាំស្តីពីតួនាទី និងភារកិច្ច របស់ជំនួយ​ការអប្បមាទទូទាំង​ប្រទេសក្នុង​ការប្រឡងសញ្ញាបត្រ មធ្យមសិក្សាទុតិយភូមិ ជំនួយការអប្បមាទទូទាំងប្រទេស​នោះ ត្រូវបញ្ឈប់​តួនាទីជា​ជំនួយអប្បមាទ​ទូទាំង​ប្រទេសបន្តទៀតទេ។ បន្ទាប់មកប្រធាន​អប្បមាទទូទាំងប្រទេស ត្រូវ​ពិភាក្សា​វាយតម្លៃ និង​កំណត់​កម្រិត​វិន័យ ចំពោះ​ជំនួយការអប្បមាទទូទាំងប្រទេស ដែល​មាន​កំហុស​តាមកម្រិត និងនីតិវិធីដូចខាក្រោម។

ក. ត្រូវចាត់ទុកថាជាកំហុសកម្រិតថ្នាក់ទី ១

-មិនគោរពពេលវេលា
– មិនពាក់ប័ណ្ណសម្គាល់ខ្លួន និងប៉ានដ
– បង្កសំឡេង ឬភាពអ៊ូអររំខាន
-ធ្វើសកម្មភាពក្រៅដែនកំណត់ ក្រៅសមត្ថកិច្ច និងក្រៅភារកិច្ចដែលខ្លួនត្រូវបំពេញ -មិនរាយការណ៍ពីសកម្មភាពមិនប្រក្រតីដែលខ្លួនបានឃើញ ឬបានឮ។

អំពើខាងលើនេះបើប្រព្រឹត្តលើកទី១ ត្រូវទទួលការព្រមាន​ពីប្រធានអប្បមាទទូទាំងប្រទេសប្រចាំមណ្ឌល លើកទី២ ត្រូវបញ្ឈប់តួនាទីជា​ជំនួយការអប្បមាទទូទាំងប្រទេស។

ខ. ត្រូវចាត់ទុកថាជាកំហុសកម្រិតថ្នាក់ទី ២

– យកទូរស័ព្ទដៃ ឬឧបករណ៍អេឡិចត្រូនិកចូលក្នុងមណ្ឌលប្រឡង
– ទាមទារ ឬទទួលមើលវិញ្ញាសាពីអនុរក្ស ឬបេក្ខជន (លើកលែងវិញ្ញាសាកត់លើក្តារខៀន)
-ថត ឬកត់ត្រាវិញ្ញាសាពីលើក្រដាស ឬពីលើក្តារខៀនដែលខ្លួនបានឃើញ
– រកឃើញទំនាស់ផលប្រយោជន៍ (មានសាច់ញាតិ បងប្អូនមិត្តភក្កិជិតស្និទ្ធ) ក្នុងមណ្ឌលប្រឡង។

អំពើខាងលើនេះត្រូវបានចាត់ទុក ការប៉ុនប៉ងធ្វើឱ្យបែកធ្លាយវិញ្ញាសា។ ក្នុងករណីប្រព្រឹត្តកំហុស​នេះ ប្រធានអប្បមាទទូទាំងប្រទេស​ប្រចាំមណ្ឌល ត្រូវ​បញ្ឈប់​ភ្លាម​ពីតួនាទី​ជាជំនួយការ​អប្បមាទ​ទូទាំង​ប្រទេស និងកត់ត្រាក្នុងសំណុំលិខិតផ្ទាល់ខ្លួន។

គ. ត្រូវចាត់ទុកថាជាកំហុសកម្រិតថ្នាក់ទី៣

– ធ្វើឱ្យបែកធ្លាយវិញ្ញាសាដែលខ្លួនបានដឹង ឬឃើញពេលកំពុងសង្កេតនិងត្រួតពិនិត្យ
-នាំយកសំណៅវិញ្ញាសាឱ្យបេក្ខជន ឬឱ្យអ្នកទី៣
– ញុះញង់ឱ្យគេប្រព្រឹត្តបទល្មើសទៅនឹងបទប្បញ្ញត្តិរបស់ក្រសួងអប់រំ យុវជន និងកីឡា
– ស្វែងរកផលប្រយោជន៍ ឬបង្កើតបណ្តាញដើម្បីស្វែងរកផលប្រយោជន៍ពីការងារ។

អំពើខាងលើនេះត្រូវបានចាត់ទុកថាជាការធ្វើឱ្យបែកធ្លាយវិញ្ញាសា និង​ត្រូវបញ្ឈប់​តួនាទីជាជំនួយការ​ភ្លាមៗ។ រាយការណ៍​បញ្ជូនទៅក្រុមប្រឹក្សា​វិន័យ​ប្រចាំ​មណ្ឌល​ដើម្បី​មានចំណាត់ការបន្ត​តាមច្បាប់ជាធរមាន៕