អាជ្ញាធរស្រុកសេសានរៀបចំប្រណាំងទូកង និងស្តង់តាំងផលិតផលកសិកម្មរបស់ជនជាតិដើមភាគតិច

អាជ្ញាធរស្រុកសេសាននៅថ្ងៃទី ២៩ ខែតុលាឆ្នាំ ២០២៣ វេលាម៉ោង ២ រសៀលនេះ បានរៀបចំពិធីប្រណាំងទូក ង មកពីបណ្ដាឃុំនីមួយៗក្នុងស្រុកសេសាន និងរៀបចំស្តង់លក់ផលិតផលកសិកម្មរបស់កសិករជាពិសេសបងប្អូនជនជាតិដើមភាគតិច ព្នង និងជនជាតិព្រៅ ដើម្បីបង្ហាញពីផលិតផលធម្មជាតិ ដែលពួកគាត់ផលិតបាន។

លោក សុវណ្ណ ពិសេដ្ឋ អភិបាលស្រុកសេសានបានបញ្ចាក់ថា៖ ក្នុងពិធីរៀបចំប្រណាំងទូកងនេះយើងក៏បានរៀបចំស្តង់តាំងលក់ផលិតផលកសិកម្មដើម្បីប្រជាពលរដ្ឋមានប្រាក់ចំណូល និងមានទីផ្សារកសិផល ហើយកសិករបានយកកសិផលរបស់ខ្លួនមកលក់ប្រកួតប្រជែងរវាងឃុំនិងឃុំ នៅក្នុងពិធីបុណ្យអុំទូកនេះផងដែរ។

លោកអភិបាលស្រុកបន្តថា ការរៀបចំប្រណាំងទូកងនេះ ស្រុកសេសានបានរៀបចំទូកងសម្រាប់ចូលរួមអុំកម្សាន្តនៅថ្ងៃចេញព្រះវស្សានេះ ដើម្បីយើងរួមគ្នាអភិរក្សប្រពៃណីវប្បធម៌ ផ្សារភ្ជាប់និងការអភិវឌ្ឍន៍ និងរៀបចំឲ្យមានភាពសប្បាយរីករាយផងដែរ។

លោក ប៉ែន សុបុល មេឃុំក្បាលរមាសបានគាំទ្រចំពោះការផ្ដួចផ្ដើមរៀបចំកម្មវិធីប្រណាំងទូកនេះព្រោះបានបង្កើនភាពកំសាន្តសប្បាយ និងបានបង្ហាញឲ្យយុវជនជំនាន់ក្រោយ រួមគ្នាអនុវត្តបន្តផងដែរនូវប្រពៃណីវប្បធម៌របស់ជាតិយើង។

លោកបន្តថា៖ ថ្ងៃចេញព្រះវស្សា ជាបុណ្យមួយដែល ចាស់ទុំ ក៏ដូចជាព្រះសង្ឃនៅតាមទីរាមតែងតែរៀបចំធ្វើឡើងជារៀងរាល់ឆ្នាំ។ ហើយក្នុងនាម អាជ្ញាធរឃុំ លោកបានដឹកនាំយកទូកអុំដែលមានចំណុះ ៨ នាក់ មកចូលរួមអុំកំសាន្តសប្បាយនៅថ្ងៃចេញព្រះវស្សានេះ។

លោកស្រី សន ម៉ារី រស់នៅភូមិឃុំ កំភុន  តំណាងឱ្យ អាជីវករ កសិករបានគាំទ្រការរៀបចំកម្មវិធីនេះព្រោះបានផ្តល់លទ្ធភាពឱ្យកសិករនាំយក ផល្លានុផល បន្លែបង្ការយកមករៀបចំលក់នៅក្នុងកម្មវិធីនេះ នឹងមានទីផ្សារទៅថ្ងៃខាងមុខទៀត។

សូមបញ្ជាក់ថា ពិធីរៀបចំប្រណាំងទូកបានបង្ហាញ ពីការីកចម្រើនពីវិស័យកសិកម្មផង នឹងធ្វើ ទីរួមស្រុកសេសាន មានភាពសប្បាយរីករាយ ព្រោះនៅតាមឃុំចំនួន ៦ បានមកចូលរួមក្នុងនោះមានឃុំស្រៅ, ឃុំសាមឃួយ, ឃុំកំភុន, ឃុំភ្លុក, ឃុំស្រែគរ និងឃុំក្បាលរមាស និងមានបងប្អូនជនជាតិព្នងនិងជនជាតិព្រៅ មកតាំងលក់ផលិតផលនិងអ៊ុទូកប្រណាំងផងដែរ៕

អត្ថបទ៖ ងិនលីម