ប.ស.ស. ចំណាយថវិកាជាង២លានរៀលសម្រាប់ផ្តល់តាវកាលិកសន្តិសុខសង្គមដល់កម្មករនិងមន្រ្តីសាធារណៈ

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងនៅរសៀលថ្ងៃទី ២៩ ខែតុលានេះថា គិតត្រឹមដំណាច់ខែកញ្ញា ឆ្នាំ២០២៣ ប.ស.ស.បានផ្តល់តាវកាលិកសន្តិសុខសង្គម ដល់កម្មករនិយោជិត មន្រ្តីសាធារណៈ និងបុគ្គលស្វ័យនិយោជន៍ប្រមាណជាង ២ លានរៀល (២០១៧២៧៧) ដែលមានអ្នកទទួលសេវាប្រមាណជាង២លាននាក់។

លោកបានបន្តថា ក្នុងនោះរបបសន្តិសុខសង្គមផ្នែកហានិភ័យការងារក្នុងវិស័យឯកជនដែលអនុវត្តនៅឆ្នាំ២០០៨ ដល់បច្ចុប្បន្នបានផ្តល់តាវកាលិកផ្នែកហានិភ័យការងារចំនួន ២៦៩ ៥៨៨ឯកសារ ដែលមានជនរងគ្រោះចំនួន ១៨៣ ០៤៨នាក់ ស្រី ៣៣ ៣៣១នាក់ ចំណាយសរុបអស់ ១៩១ ៩២៥,៩៨ លានរៀលនិងវិស័យសាធារណៈចាប់អនុវត្តពីថ្ងៃទី០១ ខែមករា ឆ្នាំ២០២១ ដល់បច្ចុប្បន្នបានផ្តល់តាវកាលិកផ្នែកហានិភ័យការងារចំនួន ១៨៥ ឯកសារ ដែលមានជនរងគ្រោះចំនួន ១៤៨នាក់ ស្រី ៣៨ នាក់ ចំណាយសរុបអស់ ៦៥៩,៧ លានរៀល។

លោកបានបន្តទៀតថាចំណែករបបសន្តិសុខសង្គមផ្នែកថែទាំសុខភាពក្នុងវិស័យឯកជនដែលអនុវត្តនៅឆ្នាំ២០១៦ ដល់បច្ចុប្បន្នមានសមាជិកចូលប្រើប្រាស់សេវាចំនួន ១៣ ៩១៥ ០៣០ករណី ស្រី ១០ ៦០៧ ៤៧១ករណី ដែលចំណាយសរុបអស់ ១ ៥៨១ ២២៩,៩៥ លានរៀល និងបានផ្តល់តាវកាលិកផ្នែកថែទាំសុខភាពដល់សមាជិកវិស័យឯកជន ចំនួន ៤៦២ ៣២៤នាក់ ស្រី ៤២៨ ៩៤៨នាក់ និងបានទូទាត់ជូនមូលដ្ឋានសុខាភិបាលចំនួន ៦៦ ២៥៦ឯកសារនិងវិស័យសាធារណៈដែកអនុវត្តនៅឆ្នាំ២០១៨ ដល់បច្ចុប្បន្នមានសមាជិក ចូលប្រើប្រាស់សេវាចំនួន ១ ៤៥៦ ៣១០ករណី ស្រី ៦១៣ ០៥៧ករណី ចំណាយសរុបអស់ចំនួន ២៤៣ ៤២១,៣៧លានរៀល។

លោកបានបន្ថែមថាក្រៅពីនេះបុគ្គលស្វ័យនិយោជន៍ដែលបានអនុវត្តគម្រោងសាកល្បងចាប់ពីខែមេសា ឆ្នាំ២០២៣មកមានសមាជិកជាបុគ្គលស្វ័យនិយោជន៍ចូលប្រើប្រាស់សេវាចំនួន ៥០៥ករណី ស្រី ១៤៣ករណី ចំណាយសរុបអស់៣៧លានរៀល៕

អត្ថបទ៖ សំអឿន