ក្រសួងពាណិជ្ជកម្ម៖ ប្រេងសាំងឡើងថ្លៃ ៤៤០០រៀល និងម៉ាស៊ូតចុះថ្លៃ ៤៥៥០រៀល ក្នុងមួយលីត្រ

ក្រសួងពាណិជ្ជកម្ម បានប្រកាសថា តម្លៃលក់រាយប្រេងឥន្ធនៈនៅកម្ពុជា គឺប្រេងសាំងធម្មតាលក់ក្នុងតម្លៃ ៤ ៤០០ រៀល/លីត្រ និងប្រេងម៉ាស៊ូតលក់ក្នុងតម្លៃ ៤ ៥៥០រៀល/លីត្រ។  ដោយតម្លៃនេះចាប់អនុវត្តពីថ្ងៃទី១ ដល់ថ្ងៃទី ១០ ខែវិច្ឆកា ឆ្នាំ២០២៣។

យោងតាមតម្លៃដែលក្រសួងពាណិជ្ជកម្មប្រកាសនេះ សម្រាប់តម្លៃសាំង ឡើងថ្លៃ ៥០រៀល និងប្រេងម៉ាស៊ូតធ្លាក់ចុះថ្លៃ ១០០រៀល ក្នុងមួយលីត្រ។

បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ បាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយ​នៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយ​ចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ។

សូមបញ្ជាក់ថា ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក៕