សិស្សថ្នាក់ទី ១២មួយចំនួន នាំគ្នាបន់ស្រន់នៅព្រះអង្គដងកើ ដើម្បីសុំសេចក្ដីសុខសប្បាយ មុនថ្ងៃប្រឡងមកដល់

យុវជន យុវតីមួយចំនួន ដែលជាសិស្សថ្នាក់ទី ១២​ ត្រៀមប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប បាននាំគ្នាបន់ស្រន់នៅព្រះអង្គដងកើ ដើម្បីមកសុំសេចក្ដីសុខចម្រើនដល់ខ្លួន​ មុនពេលថ្ងៃប្រឡងនឹងឈានចូលមកដល់ នាពេលឆាប់ៗនេះ។ សិស្សថ្នាក់ទី ១២ភាគច្រើន បានអះអាងថា ពួកគេបានត្រៀមខ្លួនរួចជាស្រេច ដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិ ហើយការមកបន់ស្រន់នេះ គឺគ្រាន់តែជាជំនឿរបស់ខ្មែរ មានតាំងពីជំនាន់ដូនតាមកម្លេះ។

យុវតី ទីហ៊ុយ សិស្សទី ១២ មកពីវិទ្យាល័យ​ឬស្សីកែវ បានប្រាប់កម្ពុជាថ្មីដឹងថា កញ្ញា មកបន់ស្រន់នៅទីសក្ការៈបូជា​ ព្រះអង្គដងកើ ដោយសារកន្លង កញ្ញាឃើញថា ប្រជាជនខ្មែរមានជំនឿថា ការបន់ស្រន់នៅទីនេះ គឺទទួលបានសេចក្ដីសុខចម្រើន និងជោគជ័យគ្រប់ភារកិច្ច ការងារ ឬការសិក្សា ជាដើម។

យុវតី ទីហ៊ុយ បានបន្ថែមថា កញ្ញា​ មកបន់ស្រន់ព្រះអង្គដងកើ តាមរយៈថ្វាយផ្កាឈូក ទៀន និងធូប គឺគ្រាន់តែចង់សុំឱ្យបារមីព្រះអង្គដង តាមជួយថែរក្សាការពារ នៅពេលប្រឡងកុំឱ្យភ័យខ្លាច និងកុំឱ្យមានឧបសគ្គអ្វីមកយាយីរារាំង ក្នុងដំណើរការប្រឡង នាថ្ងៃខាងមុខនេះ តែប៉ុណ្ណោះ។

យុវតី ទី ហ៊ុយ បានបញ្ជាក់​ទៀតថា សម្រាប់មុខវិជ្ជាត្រៀមប្រឡងវិញ មានដូចជា៖ ភាសាខ្មែរ គណិតវិទ្យា​ រូបវិទ្យា​​ គីមីវិទ្យា​ និងមុខវិជ្ជាផ្សេងៗទៀត រូបកញ្ញាផ្ទាល់ បានខិតខំរៀន និងស្រាវជ្រាវ តាំងពីដើមឆ្នាំសិក្សារួចមកហើយ។ កញ្ញារំពឹង​ថា ខ្លួននឹងទទួលបាននិទ្ទេស C។ ដោយសារតែនៅសល់ ៥ថ្ងៃទៀត ទើបដល់ថ្ងៃប្រឡងនោះ ដូច្នេះហើយកញ្ញា​ ចង់មានពេលលំហែខ្លះ ហើយជ្រើសរើសមកបន់ស្រន់នៅព្រះអង្គដងកើនេះ ដើម្បីសុំសេចក្ដីសុខ។

មិនខុសគ្នាពី យុវតីខាងលើ យុវជន វណ្ណ ស៊ីនួន មកពីវិទ្យាល័យឬស្សីកែវដែរនោះ ក៏បានប្រាប់ដែរថា ការបន់ស្រន់នេះ គ្រាន់តែជំនឿមួយរបស់ខ្មែរ ដែលមានតាំងពីជំនាន់ដើមមក ដោយគិតថា ការបន់ស្រន់ គឺធ្វើឱ្យមនុស្សខ្មែរគ្រប់រូបទទួលបានសេចក្ដីសុខ​ ផ្លូវចិត្តជ្រះថ្លាល្អ គិតតែរឿងល្អៗ និងប្រព្រឹត្តតែអំពីដែលបុណ្យកុសល សម្រាប់ខ្លួនឯង គ្រួសារ និងសង្គមជាតិ។

យុវជន វណ្ណ ស៊ីនួន បានបន្ថែមទៀតថា​ ចំពោះមុខវិជ្ជាប្រឡងវិញ យុវជនរូបនេះ បានត្រៀមរួចជាស្រេច ហើយអ្វីដែលយុវជនរូបនេះ បញ្ជាក់ច្បាស់នោះ គឺនឹងប្រឡងជាប់ មិនរំពឹងថា ជានិទ្ទេសអ្វីនោះឡើយ។

ចំណែក កញ្ញា ផល រតនា អាយុ ១៩ឆ្នាំ មកពីវិទ្យាល័យហ៊ុនសែនពាមឧកញ៉ាអុង ក៏បានប្រាប់ដោយទឹកមុខសប្បាយរីករាយថា​ កញ្ញា​ មកបន់ស្រន់នៅព្រះអង្គដងកើ ពីព្រោះកញ្ញាជាមនុស្សចូលចិត្តធ្វើបុណ្យ បន់ព្រះ សំពះទេវតា តាំងពីនៅតូចៗមកម្លេះ។

កញ្ញា បន្តថា ការបន់ស្រន់នៅថ្ងៃនេះ គឺគ្រាន់តែសុំឱ្យខ្លួនឯង និងក្រុមគ្រួសារ ទទួលបានសេចក្ដីសុខ​ សេចក្ដីសប្បាយតែប៉ុណ្ណោះ។ ចំណែក ការប្រឡងវិញ កញ្ញាថា គឺអាស្រ័យទៅលើការខិតខំរៀនសូត្រ មើលមេរៀន និងធ្វើលំហាត់ តាមមុខវិជ្ជានីមួយៗ។ ចុងក្រោយ កញ្ញា ផល រតនា សង្ឃឹមថា ​ខ្លួននឹងប្រឡងជាប់។

សូមជម្រាបជូនដែរថា ក្រសួងអប់រំ យុវជន និងកីឡា បានកំណត់ និងរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិ ដែលហៅកាត់ថា «បាក់ឌុប» នៅទូទាំងប្រទេស នាថ្ងៃទី ៦ ដល់ថ្ងៃទី ៧ ខែវិច្ឆិកា ឆ្នាំ ២០២៣៕

អត្ថបទ៖ សួស សិត