អង្គការសំអាតទន្លេត្រៀមដាក់ទូក ២ គ្រឿងចូលរួមសម្អាតទន្លេក្នុងថ្ងៃបុណ្យអុំទូកនៅមុខវាំង​

អង្គការសម្អាតទន្លេ សមុទ្រត្រៀមដាក់ទូកចំនួន ២ គ្រឿង ដើម្បីចូលរួមជួយប្រមូលសំរាម​នៅថ្ងៃបុណ្យ​អុំទូករយៈពេល ៣ ថ្ងៃចាប់ពីថ្ងៃទី ២៦-២៨ ខែវិច្ឆិកា ឆ្នាំ ២០២៣ នៅមុខព្រះបរមរាជវាំង។​

លោក នូ សុវណ្ណ នាយកប្រតិបត្តិអង្គការសម្អាត​ទន្លេសមុទ្រ បានប្រាប់ឱ្យដឹងថា ​ទូកប្រមូល​សំរាម​ដែលបំពាក់បច្ចេកវិទ្យា​អាល្លឺម៉ង់​មួយគ្រឿង ​និងទូកថ្មីមួយគ្រឿងទៀត ដែលជាទូកកចម្ចាត់​សំរាម ​នឹងដួសសំរាមដាក់លើទូកដើម្បីធ្វើឱ្យទន្លេស្អាតគ្រប់ពេល​ក្នុងឱកាសបុណ្យអុំទូក។

លោក នូ សុវណ្ណថ្លែងថា៖ «យើងអាចធ្វើសកម្មភាព ៣ ទី១ សម្អាតសំរាមក្នុងទឹក ទី២នៅលើច្រាំង និងការអប់រំអ្នកចែវទូក និងអ្នក​ចូលរួម»។

​សំរាមសំណល់គ្រប់ប្រភេទចំនួនជាង ៨០០ តោនជាពិសេសសំណល់ប្លាស្ទិកត្រូវ​បានប្រមូលចេញ​ពីទឹកទន្លេ ដើម្បីកែច្នៃប្រើប្រាស់ឡើងវិញ និងសម្អាតបរិស្ថានក្នុងទន្លេ៕​