ព្រះមហាក្សត្រ តែងតាំងរដ្ឋលេខាធិការ អនុរដ្ឋលេខាធិការ១៣រូប នៃរដ្ឋលេខាធិការដ្ឋានកិច្ចការព្រំដែន

ព្រះករុណា ព្រះបាទ សម្ដេចព្រះបរមនាថ សីហមុនី ព្រះមហាក្សត្រនៃកម្ពុជា ទ្រង់ចេញព្រះរាជក្រឹត្យផ្ទេរតំណែង និងតែងតាំងរដ្ឋលេខាធិការ អនុរដ្ឋលេខាធិការចំនួន១៣រូប នៃរដ្ឋលេខាធិការកិច្ចការព្រំដែន​។ ​នេះបើតាមព្រះរាជក្រឹត្យដែលទើបនឹងផ្សព្វផ្សាយនាថ្ងៃទី២ ខែវិច្ឆិកា ឆ្នាំ២០២៣នេះ។

បើតាមព្រះរាជក្រឹត្យ ព្រះមហាក្សត្រនៃកម្ពុជា ទ្រង់តែងតាំងរដ្ឋលេខាធិការចំនួន៤រូប ដោយក្នុងនោះ តែងតាំង លោក អ៉ិត សុថ្ថា លោក មាស បូរ៉ា ជារដ្ឋលេខាធិការ និងផ្ទេរតំណែង លោក ស៊ុម សុខម្ភូ លោក ឯ វុឌ្ឍី ពីអនុរដ្ឋលេខាធិការក្រសួងមហាផ្ទៃ មកជារដ្ឋលេខាធិការកិច្ចការព្រំដែន។

បន្ថែមពីនេះ ព្រះរាជាទ្រង់តែងតាំងសមាសភាពចំនួន៩រូប ពោលគឺ ១/លោក ឡាយ សៀងលី ២/លោក សោ សុន្ទរធារី ៣/លោក សាន់ រ៉ាដា ៤/លោក​ ផល ពិសាល ៥/លោក អាន សុវឌ្ឍនា ៦/លោក ពៅ ករុណា ៧/លោក ឌី​ ដាម៉ង់ ៨/លោក ជា បូរ៉ា និង៩/លោក អ៉ិត ដារ៉ា ជាអនុរដ្ឋលេខាធិការ នៃរដ្ឋលេខាធិការដ្ឋានកិច្ចការព្រំដែន។

ជាក់ស្ដែង រាជរដ្ឋាភិបាលអាណត្តិទី៧ នៅក្នុងសម័យប្រជុំពេញអង្គគណៈរដ្ឋមន្ត្រីលើកដំបូង កាលពីថ្ងៃទី២៤ ខែសីហា ឆ្នាំ២០២៣ បានបង្កើតរដ្ឋលេខាធិការដ្ឋានកិច្ចការព្រំដែន ជំនួសឱ្យអាជ្ញាធរជាតិទទួលបន្ទុកកិច្ចការព្រំដែន​  ក្នុងគោលបំណងធ្វើឱ្យរដ្ឋលេខាធិការដ្ឋានកិច្ចការព្រំដែន ជាស្ថាប័នមួយដែលមានលក្ខណៈអចិន្ថ្រៃយ៍ មានរចនាសម្ព័ន្ធគ្រប់គ្រង និងមានសមត្ថភាពពេញលេញ ក្នុងការដោះស្រាយបញ្ហាជាមួយប្រទេសជិតខាង។

បើតាមច្បាប់ រដ្ឋលេខាធិការដ្ឋានកិច្ចការព្រំដែនដែលចំណុះឱ្យរាជរដ្ឋាភិបាលកម្ពុជា  គឺមានសមត្ថកិច្ចដឹកនាំគ្រប់គ្រងព្រំដែននៃកម្ពុជា ទាំងព្រំដែនគោក និងព្រំដែនសមុទ្រ។  រដ្ឋលេខាធិការដ្ឋានកិច្ចការព្រំដែន គឺដឹកនាំដោយរដ្ឋមន្ត្រី ឡាំ ជា៕