ព័ត៌មានជាតិ

ក្រុមហ៊ុនផលិតគ្រឿងសង្ហារិមមួយនៅបាវិត ស្នើរួចពន្ធគ្រឿងសង្ហារិមផលិតលក់ចែកចាយនៅក្នុងស្រុក

បានផុស

១ year មុន

នៅ

ថ្ងៃសុក្រ ៣ វិច្ឆិកា ២០២៣

ដោយ

លោក ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី ១ ក្រុមប្រឹក្សាអភិវឌ្ឍកម្ពុជាបានទទួលសំណើរបស់ក្រុមហ៊ុនផលិតគ្រឿងសង្ហារិមមួយក្នុងតំបន់សេដ្ឋកិច្ចពិសេសក្នុងខេត្តស្វាយរៀង ដែលស្នើឲ្យរដ្ឋាភិបាលពិចារណាលើកលែងពន្ធលើការផលិតគ្រឿងសង្ហារិមលក់ចែកចាយក្នុងស្រុក ខណៈក្រុមហ៊ុនអះអាងថាក្នុងប្រទេសអាស៊ានការនាំចូលសម្ភារៈគ្រឿងសង្ហារិមមិនមានការបង់ពន្ធនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល ក្នុងឱកាសដឹកនាំប្រតិភូក្រុមប្រឹក្សាអភិវឌ្ឍកម្ពុជាចុះទស្សនកិច្ចសិក្សាស្វែងយល់ពីវឌ្ឍនភាពការអភិវឌ្ឍនៅតំបន់សេដ្ឋកិច្ចពិសេសនៅក្នុងខេត្តស្វាយរៀងបានបញ្ជាក់ថា សម្ភារៈគ្រឿងសង្ហារិមដែលនាំចូលពីប្រទេសសមាជិកអាស៊ានមិនមានការបង់ពន្ធនោះទេ។ ជាក់ស្តែងដូចគ្រឿងសង្ហារិមដែលដាក់លក់នៅតាមផ្សារទំនើបផ្សេងៗជាដើម។

ក្នុងការជួបក្រុមហ៊ុនផលិតគ្រឿងសង្ហារិមដែលមានទីតាំងនៅក្រុងបាវិត លោកឧបនាយកដ្ឋមន្រ្តីលើកពីសំណើក្រុមហ៊ុនដែលចង់ឲ្យរួចពន្ធសម្រាប់គ្រឿងសង្ហារិមផលិតនៅកម្ពុជាសម្រាប់លក់នៅក្នុងទីផ្សារក្នុងស្រុក។

«ក្រុមហ៊ុនអះអាងថា គ្រឿងសង្ហារិមដែលផលិតនៅបាវិតពេលលក់នៅកម្ពុជាត្រូវបង់ពន្ធ គាត់និយាយចឹង។ ចឹងទេគាត់ស្នើឲ្យពិចារណាកុំយកពន្ធ តើគួរដោះស្រាយរបៀបម៉េច យក ៥% ១០% ត្រូវរួចពន្ធឬមិនរួចពន្ធ»។ នេះបើតាមលោក ស៊ុន ចាន់ថុល។

ឆ្លើយតបសំណើនេះលោក ស៊ុន ចាន់ថុល បានបញ្ជាក់ថា នឹងយកទៅជជែកពិភាក្សាជាមួយរដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរត្ន ដែលជាប្រធានគណៈកម្មការជាតិគោលនយោបាយ សេដ្ឋកិច្ច និងហិរញ្ញវត្ថុ ដើម្បីសិក្សាតាមសំណើរបស់ក្រុមហ៊ុន៕