សម្តេចតេជោ នឹងស្នើសុំ​ទិញ​វ៉ាក់សាំងពីឥណ្ឌា១លាន​ដូសទៀត

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា សម្តេចនឹងធ្វើលិខិតស្នើសុំទៅរដ្ឋាភិបាលឥណ្ឌា ក្នុងការទិញវ៉ាក់សាំងបន្ថែមយ៉ាងតិចឲ្យបាន ១ លានដូស។

សម្តេចបញ្ជាក់ថា កម្ពុជានឹងទទួលបានវ៉ាក់សាំងការពារជំងឺកូវីដ១៩ ជាច្រើនប្រភពទៀត ដើម្បីយកមកចាក់ជូនប្រជាពលរដ្ឋដោយឥតគិតថ្លៃនៅពេលខាងមុខ។

សម្តេជោ ហ៊ុន សែន បញ្ជាក់ថា “អ្វីដែលនៅខ្វះ សម្ដេចបានធ្វើលិខិតទៅនាយករដ្ឋមន្ត្រីឥណ្ឌាដើម្បីសុំផ្គត់វាក់សាំង ហើយសម្ដេចក៏បានណែនាំទៅក្រុមលទ្ធកម្ម ដើម្បីធ្វើការជាមួយឥណ្ឌា ហើយត្រូវសុំទិញចាប់ពី១លានដូសយ៉ាងតិច ហើយយើងបញ្ជាទិញចាប់ពីពេលនេះទៅ”។

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ថា​ ប្រភពដែលកម្ពុជាទទួលបាននោះគឺ៖

ទី១, កម្ពុជានឹងទទួលបានពីប្រភពពីចិន ពីព្រោះប្រទេសចិន គឺជាប្រភពជាយុទ្ធសាស្ត្រ និងមានលទ្ធភាពផលិត ដូច្នេះចិននៅតែជាប្រភពផ្គត់ផ្គង់ដ៏មានសក្តានុពល។

ទី២, កូវ៉ាក់បានសន្យាប្រដាល់២០ ភាគរយ នៃចំនួនប្រជាជន។

ទី៣, ជាមួយគ្នានោះកម្ពុជា នឹងទទួលពីអូស្ត្រាលីផងដែរ។

ទី៤, ច្រកមួយទៀត គឺយើងអាចទទួលបានវ៉ាក់សាំងពីប្រទេសថៃ ដែលយើងអាចចរចា ចុះកុងត្រាទិញពីឥឡូវនេះ ជាប្រភេទវ៉ាក់សាំងអស្តាសេនីកា ហើយប្រសិនបើការផលិតនៅប្រទេសថៃ នៅជិតខាងយើង ហើយមានតម្លៃថោក យើងមានលទ្ធភាពទិញរហូត១០លានដុះ តាមរយៈថវិការបស់សប្បុរសជន។

ទី៥, នឹងទទួលបានពីរុស្ស៊ី ដែលវាក់សាំងពីរុស្ស៊ី យើងបានចរចាគ្នាខ្លះហើយជាមួយភាគីរុស្ស៊ី។

សម្ដេចបានបញ្ជាក់ថា យើងមិនមែនចេះតែទទួលគ្រប់វ៉ាក់សាំងទាំងអស់នោះទេ គឺយើងមើលលើវ៉ាក់សាំងនេះសិន ហើយប្រសិនបើវ៉ាក់សាំងល្អ គឺយើងអាចខ្ចីលុយគេ ដើម្បីទិញវ៉ាក់សាំងរបស់គេទៀតផង៕

អត្ថបទ៖ កោះកែវ