បាក់ឌុប៖ គិតត្រឹមម៉ោង១១ ថ្ងៃទី ៦  ខែវិច្ឆិកា  ក្នុងខេត្តកំពង់ចាម មានបេក្ខជនអវត្តមាន១២០នាក់

គិតត្រឹមវេលាម៉ោង១១៖០០នាទី ព្រឹកថ្ងៃទីមួយ   នៃដំណេីរការប្រឡងសញ្ញាបត្រមធ្យមសិក្សាទុតិយភូមិ  សម័យប្រឡងថ្ងៃទី៦-៧ ខែវិច្ឆិកាឆ្នាំ២០២៣  នៅក្នុងខេត្តកំពង់ចាមមានបេក្ខជនអវត្តមានសរុប១២០នាក់ (ស្រី៦២នាក់) ក្នុងចំណោមបេក្ខជនដែលដាក់ពាក្យប្រឡងមានជាង៨ពាន់នាក់។នេះយោងតាមការបញ្ជាក់ពី  លោក  លី  ម៉េងសាន  ប្រធានមន្ទីរអប់រំ យុវជន និងកីឡា ខេត្តកំពង់ចាម។ 

សម្រាប់ខេត្តកំពង់ចាម  បេក្ខជនដែលដាក់ពាក្យប្រឡងមធ្យមសិក្សាទុតិយភូមិឆ្នាំ២០២៣នេះ  មានបេក្ខជនសរុបចំនួន ៨ ៨៩៦នាក់  ក្នុងនោះបែងចែកមណ្ឌលប្រឡងចំនួន១៤មណ្ឌល ស្មេីនឹង៣៥៨បន្ទប់។ ចំពោះថ្នាក់វិទ្យាសាស្ត្រមានចំនួន៥មណ្ឌល  ស្មេីនឹង១៣០បន្ទប់  មានបេក្ខជន ៣២១៥នាក់​ និងថ្នាក់វិទ្យាសាស្ត្រសង្គម ចំនួន៩មណ្ឌល  ស្មេី២២៨បន្ទប់ មាន៥៦៨១នាក់។

ជាការកត់សម្គាល់   អាជ្ញាធរ  សមត្ថកិច្ចបានរៀបចំសន្តិសុខសណ្តាប់ធ្នាប់សាធារណៈ   សម្រួលចរាចរណ៍  ជូនប្រជាពលរដ្ឋតាមមណ្ឌលទាំង១៤ ដែលក្រសួងអប់រំបានកំណត់ នៅទូទាំងខេត្តកំពង់ចាម  ដើម្បីផ្តល់សុខសុវត្ថិភាព  ក្នុងដំណើរការប្រលងឲ្យប្រព្រឹត្តឹទៅដោយរលូន។  ក្រោមការសម្របសម្រួលពីសំណាក់សមត្ថកិច្ច នៅតាមដងផ្លូវក្នុងខេត្តកំពង់ចាមមិនបង្កគ្រោះថ្នាក់អ្វីកើតឡើងឡើយ  ទោះបីជាផ្លូវមួយចំនួនមានភាពមមាញឹកយ៉ាងណាក៏ដោយ។ 

លោក ឧត្តមសេនីយ៍ ត្រី  ជា  ធារឹទ្ធ  ដែលកំពុងប្រចាំការនៅមណ្ឌលព្រះសីហនុ  បានអះអាងថា បាននិងកំពុងបំពេញភារកិច្ចការពារសន្តិសុខ  សណ្តាប់ធ្ឋាប់  និងសុវត្ថិភាព ជូនបងប្អូនប្រជាពលរដ្ឋដែលបាននាំកូនចៅមកប្រលងនៅតាមមណ្ឌលនីមួយៗឲ្យបានល្អប្រសើរ  ហើយពុំមានអ្វីគួរឲ្យកត់សម្គាល់ឡើយ៕

អត្ថបទ និង រូបភាព ៖  ឡេក  ចាន់ពេជ្រ