អគារសាលាខេត្តកំពង់ចាមថ្មី សម្រេចបាន៧០% ហើយគ្រោងបញ្ចប់ការសាងសង់នាដើមឆ្នាំក្រោយ

អគាររដ្ឋបាលថ្មីនៃសាលាខេត្តកំពង់ចាម បានសម្រេចការសាងសង់ប្រមាណជាង៧០%ហើយ គិតមកដល់ពេលនេះ ខណៈគ្រោងបញ្ចប់ការសាងសង់ទាំងស្រុង និងដាក់សម្ពោធឱ្យបានមុនខែមេសា ឆ្នាំ២០២៤។ លោកអភិបាលខេត្តកំពង់ចាម បានណែនាំឱ្យក្រុមការងារ ត្រូវពន្លឿនការសាងសង់អគាររដ្ឋបាលថ្មីនេះឱ្យបានឆាប់តាមផែនការ។

ក្នុងឱកាសចុះត្រួតពិនិត្យវឌ្ឍនភាពនៃការសាងសង់អគាររដ្ឋបាលសាលាខេត្តកំពង់ចាម នៅថ្ងៃទី៧ ខែវិច្ឆិកា ឆ្នាំ២០២៣ អភិបាលខេត្តកំពង់ចាម លោក អ៊ុន ចាន់ដា បានណែនាំដល់ក្រុមការងារជាង ធ្វើយ៉ាងណាត្រូវសាងសង់អគាររដ្ឋបាលថ្មី ជាពិសេសត្រូវរៀបចំរចនាបទ និងសោភ័ណ្ឌភាពនៅខាងក្នុងអគារឱ្យបានឆាប់រួចរាល់មុនខែមេសា ឆ្នាំ២០២៤ ដើម្បីប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនៅមុនពេលចូលឆ្នាំថ្មីប្រពៃណីជាតិខ្មែរ។

លោក អ៊ុន ចាន់ដា លើកឡើងថា ដោយមើលឃើញពីការលំបាករបស់មន្ត្រី ដែលកំពុងបម្រើការងារនៅសាលាខេត្ត ក៏ដូចជាការផ្តល់នូវទីកន្លែងសមរម្យសម្រាប់មន្ត្រីបំពេញការងារប្រចាំថ្ងៃក្នុងការបម្រើសេវាសាធារណៈដល់ប្រជាពលរដ្ឋ ដែលមកទទួលសេវាសាធារណៈនៅសាលាខេត្ត គណៈអភិបាល បានឯកភាព និងអនុញ្ញាតឱ្យមានការសាងសង់អគាររដ្ឋបាលថ្មីនេះឱ្យបានឆាប់រហ័សតាមការគ្រោងទុកក្នុងអំឡុងខែមេសា ឆ្នាំ២០២៤ ខាងមុខ។

បច្ចុប្បន្ន សំណង់អគារនេះ កំពុងតែសាងសង់ ហើយលទ្ធផលសម្រេចបានប្រមាណជាង ៧០%ហើយ។ គម្រោងអាគារថ្មីនៃរដ្ឋបាលសាលាខេត្តកំពង់ចាម ត្រូវបានសាងសង់ឡើងអំពីបេតុងអាមេ ជញ្ជាំងរៀបឥដ្ឋ និងដំបូលប្រក់ក្បឿង ដែលមានទំហំបណ្តាយជាង៥៣ម៉ែត្រ ទទឹង២៤ម៉ែត្រ និងកម្ពស់៣ជាន់ មានទីតាំងនៅក្នុងបរិវេណសាលាខេត្ត។ ក្រៅពីអគារថ្មីនេះ រដ្ឋបាលខេត្តកំពង់ចាម ក៏ជួសជុលកែលម្អអគារចាស់ៗជាច្រើន និងទីធ្លាក្នុងសាលាខេត្ត ដើម្បីទុកសម្រាប់មន្ត្រីបម្រើការងារជារៀងរាល់ថ្ងៃ ផងដែរ៕

 អត្ថបទ និងរូបភាព ៖ ឡេក  ចាន់ពេជ្រ