ចាយទុន ៤០០-៦០០ ដុល្លារ បើករបរលក់កាហ្វេ រកចំណូលបានខ្ទង់ ១០ម៉ឺនរៀលក្នុងមួយថ្ងៃ

បច្ចុប្បន្ននេះ មុខរបរលក់កាហ្វេតាមចិញ្ចើមផ្លូវ តាមរទេះ ឬតាមម៉ូតូ បានកំពុងមានកំណើន ដោយសារមុខរបរនេះ ចំណាយដើមទុនតិច និងមិនចំណាយលើការបង់ថ្លៃទីតាំងខ្ពស់ ហើយអាចរកចំណូលបានសមរម្យប្រចាំថ្ងៃ។

លោក ជុំ សារាជ្យ ជាអ្នកលក់កាហ្វេតាមម៉ូតូ បានលើកឡើងថា លោកបានចាប់ផ្តើមមុខរបរនេះ អស់រយៈពេល ២ឆ្នាំមក ហើយ ដោយផ្តើមពីដើមទុន ៤០០ ដុល្លារប៉ុណ្ណោះ។

លោកបានថ្លែងដូច្នេះថា «ខ្ញុំត្រូវចំណាយដើមទុនខ្ទង់ ៣០០-៤០០ ដុល្លារ ក្នុងការទិញសម្ភារៈសំខាន់ៗ ដើម្បីប្រើប្រាស់ រួមមាន៖ កែវកាហ្វេ ម៉ូការផត ម្សៅកាហ្វេ និងឧបករណ៍ដទៃទៀតដែលចាំបាច់ក្នុងដំណើរការឆុងកាហ្វេនេះ»។

សព្វថ្ងៃ លោក ជុំ សារាជ្យ ជាអ្នកលក់កាហ្វេតាមម៉ូតូ នៅក្បែរសាកលវិទ្យាល័យភូមិន្ទភ្នំពេញ។ បើតាមលោក សារាជ្យ ការលក់នេះជាមធ្យមបានប្រមាណ ៤០ កែវក្នុងមួយថ្ងៃ ដោយទទួលបានចំណូលពី ១២ ម៉ឺន ទៅ ១៥ ម៉ឺនរៀល ដោយក្នុងមួយកែវ លោកលក់ ៣ ពាន់រៀល។

ស្រដៀងគ្នានេះដែរ លោក ឡូច ពិសាល បានចំណាយដើមទុនខ្ទង់ ៦០០ ដុល្លារក្នុងការបើកកន្លែងលក់កាហ្វេ នៅលើ ​ផ្លូវ ៣៦០ ក្បែរផ្សារបឹងកេងកង។ បើទោះជាមុខរបរប្រភេទនេះ មានអ្នកបើករកស៊ីច្រើនក៏ពិតមែននាពេលបច្ចុប្បន្ន លោក ពិសាល នៅតែអាចក្តោបបានទីផ្សារខ្លះ ដោយអាចរកចំណូលបានសមរម្យប្រចាំថ្ងៃដើម្បីដោះស្រាយជីវភាព។

លោក ពិសាល បានឱ្យដឹងថា ក្នុងមួយថ្ងៃលោកអាចលក់បានចន្លោះពី ១៥ ទៅ ២០កែវ យ៉ាងតិច ដោយអាចបាន ចំណូលប្រហែល ៦- ១០ ម៉ឺនរៀល ក្នុងមួយថ្ងៃ។ យ៉ាងណាក៏ដោយ លោកថា ទោះបីចំណូលមិនសូវច្រើន តែលោក ស្រឡាញ់អាជីពនេះណាស់ នឹងបន្តប្រឹងប្រែងទាក់ទាញទីផ្សារបន្ថែមទៀត ដើម្បីសម្រេចគោលដៅ និងចង់ពង្រីកឱ្យកាន់ ​តែធំជាងនេះ ប្រសិនបើមានដើមទុន។

បច្ចុប្បន្នរបរលក់កាហ្វេតាមតូប ម៉ូតូ រទេះ នៅតាមចិញ្ចើមផ្លូវកំពុងពេញនិយមខ្លាំង ស្របពេលដែលសេដ្ឋកិច្ចមាន ស្ថានភាពមិនអំណោយផល អ្នកចូលចិត្តទទួលទានកាហ្វេភាគច្រើន ងាកទៅញ៉ាំកាហ្វេដែលមានតម្លៃចន្លោះពី ៣០០ រៀល ទៅ ៥០០ រៀល ក្នុងមួយកែវ ជំនួសកាហ្វេប្រេន ម៉ាស៊ីនត្រជាក់។

ទោះជាកាហ្វេនៅតាមចិញ្ចើមផ្លូវមានតម្លៃធូរថ្លៃ តែអ្នកទទួលទានជាច្រើន បានលើកឡើងថា មានរសជាតិមិនចាញ់ កាហ្វេថ្លៃក្នុងហាងប៉ុន្មាននោះទេ ជាពិសេសបច្ចុប្បន្នគេនិយមកាហ្វេហ្វីន និងកាហ្វេដូង ជាដើម៕

អត្ថបទ៖ ផល ធារិត