មន្ទីរទេសចរណ៍កំណត់យករបៀបបុកស្រូវយកអង្ករបង្ហាញទេសចរនៅភូមិជនជាតិការវែត

មន្ទីរទេសចរណ៍ខេត្តស្ទឹងត្រែងបានរៀបចំឱ្យបងប្អូនជនជាតិកាវែតនៅភូមិទាក់ទាម ឃុំសន្តិភាព ស្រុកសៀមប៉ាងថែ​រក្សារបៀបបុកស្រូវយកអង្ករ ដែលជាទម្លាប់ពីដូនតា និងជាផ្នែកមួយនៃវប្បធ៌មខ្មែរសម្រាប់បង្ហាញភ្ញៀវទេសចរឱ្យចាប់អារម្មណ៍​មកលេងនៅភូមិជនជាតិមួយនេះ។

លោក អ៊ន ប៉ោសឿន ប្រធានមន្ទីទេសចរណ៍ខេត្តស្ទឹងត្រែងបានបញ្ជាក់ថា៖ នេះជារបៀបដឹកជញ្ជូនស្រូវ និងរទេះគោ និងរបៀប​បុកស្រូវកិននិងត្បាល់ ដែលចាស់ៗជំនាន់ដើមបានប្រើប្រាស់រទេះគោ បុកស្រូវ និងអង្រែ ជាន់និងត្បាល់ក្តឿងធ្វើពីឈើរបៀបបុកស្រូវនេះ បច្ចុប្បន្នស្ទើរតែបាត់បង់ទៅហើយ។

លោកប្រធានមន្ទីរបន្តថា៖ នេះជាវប្បធម៌មួយរបស់ខ្មែរយើង ហើយបងប្អូនជនជាតិនៅភូមិនេះ ត្រូវនាំគ្នាអភិរក្សនូវឧបករណ៍ រួមមាន រទេះគោ ត្បាល់ អង្រែ ចង្អេរស្ទៃអង្ករ កញ្ច្រែងរែងកន្ទក់ និងរបៀប បុករែង-ទុក សម្រាប់បង្ហាញភ្ញៀវទេសចរដែលមកលេងភូមិនេះបានឃើញពីរបៀបបុកស្រូវ បង្ហាញដោយបងប្អូនជនជាតិភាគតិចយើង។

លោក ស៊ុយ អ៊ាមឡន អភិបាលរងស្រុកសៀមប៉ាង គាំទ្រចំពោះការរៀបចំឱ្យមានផលិតផលមួយនេះព្រោះវាអាចទាក់​ទាញ​ភ្ញៀវទេសចរបាន ដោយសារការបុកស្រូវយកអង្ករនេះជាអត្តសញ្ញាណខ្មែរដើមទោះបីថា បច្ចុប្បន្នយើងមានម៉ាស៊ីន​កិនស្រូវបែបទំនើបក៏ដោយ។

លោកបញ្ជាក់ថា៖ កាអភិរក្ស សម្បត្តិវប្បធម៌ និងប្រពៃណីនេះ ពិតជាមានតម្លៃសម្រាប់សង្គមជាតិ ហើយកូនចៅជំនាន់ក្រោយ​ភ្ញៀវទេសចរជាតិ មកភូមិនេះបានឃើញ និងបានស្គាល់។

លោកស្រីនីនូជនជាតិកាវែតរស់នៅភូមិ ទាក់ទាមបានបញ្ជាក់ថា៖ ទំនៀមទំលាប់នេះមានតែបងប្អូននៅទីជនបទនេះហើយដែលអាចថែរក្សាវាបាន និងបន្តបង្ហាត់បង្រៀនទៅបងប្អូនកូនចៅឱ្យចេះបុក-រែងសម្រាប់បង្ហាញភ្ញៀវទេសចរ  ប្រសិនជាភ្ញៀវបានមកដល់ភូមិទាក់ទាម ឃុំសន្តិភាពនេះ។

សូមបញ្ជាក់ថា៖ កេរ្ត៏តំណែលនេះជាផ្នែកមួយដែល ដូនតាចាស់ទុំជំនាន់ដើម យកឈើមកធ្វើជាឧបករណ៍បុកស្រូវ យកអង្ករ មកដាំបាយចិញ្ចឹមកូន ព្រោះកាលនោះគ្មានម៉ាស៊ីនកិនស្រូវដូចបច្ចុប្បន្ននេះទេ៕

អត្ថបទ៖ ងិនលីម