មន្រ្តីជាន់ខ្ពស់ CDC ស្វាគមន៍ក្រុមហ៊ុនចិនបង្កើតឱកាស​វិនិយោគនៅកម្ពុជា

មន្រ្តីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា CDC បានស្វាគមន៍ចំពោះក្រុមហ៊ុនចិន ដែលមានបំណងចង់បង្កើត​ឱកាសវិនិយោគលើវិស័យសំខាន់ៗនៅកម្ពុជា។

នៅក្នុងជំនួបជាមួយគណៈប្រតិភូក្រុមហ៊ុនចិន China MCC22 Group Corporation Ltd ដឹកនាំដោយលោក Guo Kong Song កាលពីថ្ងៃទី ០៧ វិច្ឆិកា លោក គង់ វិមាន អគ្គលេខាធិការនៃអគ្គលេខាធិការដ្ឋាន​ក្រុមប្រឹក្សា​អភិវឌ្ឍន៍កម្ពុជា បានថ្លែងទៅកាន់អ្នកគ្រប់គ្រងទូទៅនៃនាយកដ្ឋានពាណិជ្ជកម្មក្រៅប្រទេសរបស់ក្រុមហ៊ុន ឱ្យស្វែងយល់​បន្ថែមអំពីឱកាស វិនិយោគលើវិស័យនានាក្នុងប្រទេសកម្ពុជា។

ជាមួយគ្នានេះ លោក គង់ វិមាន ក៏បានលើកទឹកចិត្តឱ្យក្រុមហ៊ុនស្វែងយល់បន្ថែម អំពីឱកាសវិនិយោគ លើវិស័យនានា ដែលស្របតាមមុខសញ្ញាវិនិយោគរបស់ខ្លួនដូចជា ការងារសាងសង់ហេដ្ឋារចនាសម្ព័ន្ធ ប្រព័ន្ធចម្រោះទឹក កខ្វក់ ផ្លូវល្បឿនលឿន រោងចក្ររ៉ែ ការបង្កើតសួនឧស្សាហកម្ម អចនលទ្រព្យ និងរោងចក្រផលិតគ្រឿងសម្ភារសំណង់ ជាដើម។

លោកអគ្គលេខាធិការ បានបញ្ជាក់ថា រាជរដ្ឋាភិបាលកម្ពុជា មានគោលជំហរបើកចំហរទៅគ្រប់វិនិយោគិនលើគ្រប់វិស័យ ដែលក្នុងនោះក៏មានវិស័យមួយចំនួនទទួលបានការលើកទឹកចិត្តឱ្យមានការវិនិយោគផងដែរ ដោយរដ្ឋាភិបាល​ មាន​ក្រុមប្រឹក្សាអភិវឌ្ឍន៍កម្ពុជាជាសេនាធិការ ទទួលស្វាគមន៍ និងរង់ចាំសម្របសម្រួលកិច្ចការងាររបស់វិនិយោគិនជានិច្ច៕

អត្ថ​បទ៖ ផល ធារិត