ព័ត៌មានជាតិ

បឹងពារាំង ជាតំបន់ទេសចរណ៍កំពុងទាក់ទាញ

បានផុស

៤ years មុន

នៅ

ថ្ងៃចន្ទ ៨ កុម្ភៈ ២០២១

ដោយ

តំបន់ទេសចរណ៍ធម្មជាតិបឹងពារាំង ជាកន្លែងអភិរក្សមេពូជត្រី និងសត្វស្លាបជាច្រើនប្រទេភកំពុងទាក់ទាញអ្នកទេសចរជារៀងរាលថ្ងៃ ស្ថិតនៅក្នុងសង្កាត់ជ្រាវ ក្រុងសៀមរាប ខេត្ដសៀមរាប បឹងពារាំង គឺជាតំបន់ទេសចរណ៍បែបធម្មជាតិ វាមានចម្ងាយពីក្រុងសៀមរាបប្រមាណជា១៤ គីឡូម៉ែត្រ ហើយបើយើងធ្វើដំណើរដោយជិះរថយន្ដ ឬជិះម៉ូតូយើងប្រើពេលតែ៣០នាទីប៉ុណ្ណោះ ដែលជាកន្លែងត្រូវបានទាក់ទាញអ្នកទេសចរឲ្យទៅទស្សនាជារៀងរាល់ថ្ងៃ ជាពិសេសនៅថ្ងៃសៅរ៍និងថ្ងៃអាទិត្យ ព្រមទាំងថ្ងៃបុណ្យទានផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ មង្គល ប្រធានសហគមន៍ទេចរណ៍ធម្មជាតិបឹងពារាំង បានឲ្យដឹងនារសៀលថ្ងៃទី០៧ ខែកុម្ភៈ ឆ្នាំ២០២១នេះថា គឺជាកន្លែងរមណីយដ្ឋានបែបធម្មជាតិមួយ ជាតំបន់អភិរក្សមេពូជត្រី និងសម្បូរទៅដោយសត្វស្លាបគ្រប់ប្រភេទ មានម្លប់ដើមរាំងត្រឈឹងត្រឈៃ យើងអាចបោះតង់សម្រាកលក្ខណៈជាក្រុមៗ ឬគ្រួសារ នាពេលយប់មើលមេឃមើលផ្កាយ ក្រោមពន្លឺព្រះច័ន្ទ ស្តាប់សំលេងសត្វយំល្វើយៗ ស្តាប់សំឡេងត្រីគប់ទឹកគ្រាំងៗ នឹងអាចជិះទូកលំហែកាយ ទស្សនាសត្វស្លាបជាច្រើន ដែលកំពុងស៊ីចំណីប្រចិកគ្នាលេងយ៉ាងខ្ញៀវខ្ញារក្នុងបឹងអភិរក្សនេះតែម្តង។

លោកបានបន្ដថា ជារៀងរាល់ថ្ងៃមានភ្ញៀវទេសចរណ៍បានមកទស្សនានៅតំបន់នេះជាបន្ដបន្ទាប់ ខណៈដែលមានព្រៃដើមរាំង និងជាតំបន់អភិរក្សជីវៈចម្រុះគ្រប់ប្រភេទ គួរឲ្យទាក់ទាញ។

នៅក្នុងបឹងពារាំងនេះ យើងមានទូកដែលរៀបចំដោយសហគមន៍សម្រាប់ទស្សនាឲ្យមានភាពងាយស្រួល ជិះទូកយើងប្រើរយៈពេលជាង១ម៉ោង ឬយូរជាងនេះសម្រាប់ទស្សនាសត្វស្លាប់គ្រប់ប្រភេទ និងផ្ដិតយករូបភាពដ៏ស្រស់ស្អាត ពីសម្រស់បឹងពារាំងពេលថ្ងៃរៀបលិច នឹងមើលសត្វជាច្រើនហ្វូងកំពុងរកចំណី តម្លៃទូក១ គឺ១០ដុល្លារអាចជិះបានពី៤-៥នាក់ បើភ្ញៀវគាត់ចង់បោះតង់ ខាងសហគមន៍រៀបចំឲ្យ គឺតម្លៃ១០ដុល្លា ហើយបើពួកគាត់មានតង់ស្រាប់គឺត្រឹមតែ៣ដុល្លារ ប៉ុណ្ណោះ។

លោកថា ទៅថ្ងៃអនាគតខាងសហគមន៍បឹងពារាំងក៏មានគម្រោងរៀបចំកែច្នៃបន្ថែមទៀត ដូចជាការធ្វើប៉មជាច្រើនកន្លែងសម្រាប់មើលសត្វ ធ្វើផ្លូវកង និងផ្លូវចូលមកឲ្យបានស្អាតល្អ ចំពោះសហគមន៍បឹងពារាំង គឺជាតំបន់អេកូទេសចរណ៍ដ៏ល្អស្អាតបំផុតដែលលោកអ្នកគួរតែមកទស្សនា ដើម្បីបំបាត់នូវការនឿយហត់ បំបាត់នូវទុកកង្វល់ មានអារម្មណ៍ស្រស់ថ្លា។

ព្រះតេជគុណ ឡម លឿម ព្រះវិន័យធរវត្តដំណាក់ក្រុងសៀមរាប មានសង្ឃដីការថា អាត្មាមានចំណាប់អារម្មណ៍នៅបឹងពារាំង ដែលជាតំបន់អភិរក្សបានល្អកន្លងមក ពោពេញទៅដោយធន់ធានធម្មជាតិទីនេះ មានត្រីមេពូជ សត្វស្លាបគ្រប់ប្រភេទ និងមានម្លប់ដើមរាំងត្រឈឹងត្រឈៃគួរជាទីគាប់ចិត្តរបស់អ្នកផងទាំងឡាយ ដែលបានមកដល់ហើយទស្សនាកម្សាន្ត ដើម្បីបន្ធូអារម្មណ៍តានតឹង បំបាត់នូវការនឿយហត់ បំបាត់នូវទុក្ខកង្វល់ និងភាពស្មុគស្មាញពីមុនមក តែនៅពេលដែលយើងមកដល់ទីនេះយើងមានអារម្មណ៍ស្រស់ថ្លា បានឃើញសត្វបក្សាបក្សីហោះហើរព្រូងព្រាតនៅក្នុងបឹងគួរឲ្យចាប់អារម្មណ៍។

ព្រះតេជគុណ មានសង្ឃដីការបន្តថា អាត្មានិមន្តមកកាន់បឹងពារាំងជាលើកទី៣ហើយ ជាមួយព្រះសង្ឃជាច្រើនអង្គ ដោយយល់ឃើញថា នៅទីនេះ កន្លែងនេះ មានញាតិញោម ឬក៏ភ្ញៀវជាតិ បានមកកម្សាន្តក្នុងតំបន់នេះជារឿយៗផងដែរ ។ ម្យ៉ាងវិញទៀតខាងសហគមន៍បឹងពារាំងពួកគាត់បានខិតខំប្រឹងប្រែងរៀបចំ និងថែរក្សាធន់ធានធម្មជាតិបានល្អប្រសើរសម្រាប់ឲ្យភ្ញៀវជាតិនិងអន្តរជាតិមកទស្សនាឲ្យច្រើនៗ ក៏ដូចក្មេងៗជំនាន់ក្រោយបានដឹងស្វែងយល់ពីតំបន់ទេសចរណ៍បែបធម្មជាតិមួយនេះ៕

អត្ថបទ ៖ គឿនវេត