​កម្ពុជាបានចំណូលជាង ៦៧៥ លានដុល្លារ ពីការនាំចេញកៅស៊ូកើនឡើង ៧០% តែកសិករថាតម្លៃធ្លាក់ចុះ​

ការ​នាំ​ចេញ​កៅ​ស៊ូ​របស់​កម្ពុជា​​បាន​កើន​ឡើង ៧០ ​ភាគ​រយ​ ក្នុង​អំ​ឡុង​ ១០ ខែ​​ឆ្នាំ​នេះ​ ធៀប​នឹង​រយៈ​ពេល​​ដូច​គ្នា​​កាល​ពី​ឆ្នាំ​មុន​។ ​នេះបើតាមរបាយការណ៍គយ និងរដ្ឋាករកម្ពុជានៅថ្ងៃទី ១០ វិច្ឆិកានេះ។

​ទិន្នន័យដែលកម្ពុជាថ្មីទទួលបាននៅថ្ងៃទី ១០ ខែវិច្ឆិកា បានឱ្យដឹងថា ចាប់ពីខែមករា-តុលា ឆ្នាំ ២០២៣ ការនាំចេញ​ជ័រកៅស៊ូ និងផលិតផលធ្វើពីកៅស៊ូមានតម្លៃ​សរុបជាទឹកប្រាក់ជាង ៦៧៥ លានដុល្លារកើនឡើង ៧០% បើធៀប​នឹងរយៈពេលដូចគ្នាក្នុងឆ្នាំ ២០២២ មានចំនួនជាង ៣៩៦ លានដុល្លារ។

លោក អោក សាវឿន ​កសិករដាំកៅស៊ូ ៥ ហិកតា នៅភូមិមាឃ ឃុំព្រែកកក់ ស្រុកស្ទឹងត្រង់ ខេត្តកំពង់ចាម បានឱ្យដឹងថា តម្លៃកៅស៊ូលោកលក់បាន ២ ១០០ រៀល ក្នុង១គីឡូ (បង្កកទុក១យប់) និង ២ ៦០០ រៀល ក្នុង១គីឡូបើបង្កទុក៧ថ្ងៃ​។ លោកថាលក់កៅស៊ូមិនចំណេញនោះទេ គឺបានត្រឹមទប់ទល់ដោះស្រាយថ្លៃកម្លាំងកម្មករ។

អគ្គនាយកដ្ឋានកៅស៊ូបានឱ្យដឹងថា ថ្លៃប្រមូលទិញជ័រកៅស៊ូគ្រួសារនៅសប្ដាហ៍ទី៤ នៃខែតុលា ជាមធ្យមនៅខេត្តកំពង់ចាម ២ ៤០០ រៀលក្នុង១ គីឡូសម្រាប់ជ័រកកដែលតម្លៃប្រែប្រួលតាមតំបន់ និងរយៈពេលបង្កកទុក (៧-១០ថ្ងៃ)។

កាលពីឆ្នាំ ២០២២ កម្ពុជា បានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូបានប្រមាណ ៥៤១. ៦៦ លានដុល្លារ។

គិតត្រឹមឆ្នាំ២០២២ កម្ពុជាមានផ្ទៃដីដាំដំណាំកៅស៊ូសរុបចំនួនជាង ៤០ម៉ឺនហិកតា។ ចំណែកឯទីផ្សារ​សំខាន់ៗ ក្នុងការនាំចេញកៅស៊ូរបស់កម្ពុជា មានដូចជា ប្រទេសវៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុប ជាដើម៕