ព្រះមហាក្សត្រ នឹងយាងបំពេញទស្សនកិច្ចផ្លូវរដ្ឋនៅបារាំងពីថ្ងៃទី១២ ដល់១៨ ខែវិច្ឆិកា

ព្រះករុណា ព្រះបាទសម្ដេចព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា ព្រះអង្គសព្វព្រះរាជហឬទ័យស្ដេចនឹងយាងបំពេញព្រះរាជទស្សនៈកិច្ចផ្លូវការនៅក្នុងប្រទេសបារាំងចាប់ពីថ្ងៃទី១២ ដល់ថ្ងៃទី១៨ ខែវិច្ឆិកា ឆ្នាំ២០២៣។ នេះបើតាមសេចក្ដីប្រកាសព័ត៌មានរបស់ក្រសួងការបរទេស ដែលចេញផ្សាយនៅរាត្រីថ្ងៃទី១០ ខែវិច្ឆិកា ឆ្នាំ២០២៣។ ដំំណើរព្រះរាជទស្សនៈកិច្ចផ្លូវការនេះ គឺតបតាមការអញ្ជើញរបស់ប្រធានាធិបតីប្រទេសបារាំង លោក Emanuel MACRON។

សេចក្ដីប្រកាសព័ត៌មានដដែលបានអះអាងថា “ព្រះរាជទស្សនកិច្ចជាប្រវត្តិសាស្ត្រនេះ ធ្វើឡើងក្នុងស្មារតីនៃទំនាក់ទំនងមិត្តភាពដ៏យូរអង្វែងរវាង កម្ពុជា និងបារាំង ស្របពេលដែលព្រះរាជាណាចក្រកម្ពុជា ប្រារព្ធខួបអនុស្សាវរីយ៍លើកទី៧០ នៃពិធីបុណ្យឯករាជ្យជាតិ”។

សេចក្ដីប្រកាសព័ត៌មានក៏បានសរសេរអំពីព្រះរាជសកម្មភាពព្រះមហាក្សត្រថា “ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះអង្គនឹងត្រូវ បាន ឯកឧត្តម Emmanuel MACRON ទទួលព្រះរាជសវនាការ នៅវិមានប្រធានាធិបតី Palais de ‘Élysée នៅថ្ងៃទី១៣ ខែវិច្ឆិកា ឆ្នាំ២០២៣”។

សេចក្ដីប្រកាសព័ត៌មានដដែល “ព្រះករុណា ព្រះមហាក្សត្រ ក៏នឹងយាងចូលរួមសន្និសីទអន្តររដ្ឋាភិបាលលើកទី៤ ស្តីពីការ អភិរក្សរមណីយដ្ឋានប្រវត្តិសាស្ត្រតំបន់អង្គរ ដែលនឹងរៀបចំឡើងក្នុងឱកាសសម័យប្រជុំលើកទី៤២ ន សន្និសីទអង្គការយូណេស្កូ នៅថ្ងៃទី១៥ ខែវិច្ឆិកា ឆ្នាំ២០២៣”។

សេចក្ដីប្រកាសព័ត៌មានកម្រាស់២ទំព័រសរសេរបន្តថា “ព្រះករុណា ព្រះមហាក្សត្រ ក៏នឹងប្រទានព្រះរាជសវនាការជូន លោកជំទាវ Audrey AZOULAY អគ្គនាយិកានៃអង្គការយូណេស្កូ ដោយទទួលស្គាល់ពីសកម្មភាពគាំទ្រដ៏មានសារៈ របស់អង្គការដែលបានចូលរួមចំណែកក្នុងកិច្ចការពារ និងអភិរក្សបេតិកភណ្ឌវប្បធម៌ខ្មែរ”។

ក្រសួងការបរទេសកម្ពុជាបានបញ្ជាក់ថា ក្នុងដំណើរព្រះរាជទសុ្សនកិច្ចនេះ លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្តី ក្រសួងការបរទេស និងសហប្រតិបត្តិការអន្តរជាតិ និងលោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ព្រមទាំងឥស្សរជន និង មន្ត្រីជាន់ខ្ពស់រាជរដ្ឋាភិបាលកម្ពុជាមួយចំនួនទៀត នឹងអញ្ជើញដង្ហែរព្រះអម្ចាស់ជីវិតតម្កល់លើត្បូង ក្នុងព្រះរាជទស្សនកិច្ចផ្លូវការក្នុងប្រទេសបារាំង៕