សម្ដេចធិបតី ហ៊ុន ម៉ាណែត ត្រូវបានជ្រើសតាំងជាគណៈអធិបតីកិត្តិយស នៃរណសិរ្សសាមគ្គី អភិវឌ្ឍន៍មាតុភូមិកម្ពុជា

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវបានអនុម័តជ្រើសតាំង ជាគណៈអធិបតីកិត្តិយស នៃរណសិរ្សសាមគ្គី អភិវឌ្ឍន៍មាតុភូមិកម្ពុជា។

ការអនុម័តនេះ ធ្វើឡើងក្នុងអង្គមហាសន្និបាតរណសិរ្សសាមគ្គី អភិវឌ្ឍន៍មាតុភូមិកម្ពុជាលើកទី ៦ ក្រោមអធិបតីភាពដ៏ខ្ពង់ខ្ពស់ របស់សម្តេចអគ្គមហាពញាចកី ហេង សំរិន ប្រធានកិតិ្តយសគណបក្សប្រជាជនកម្ពុជា និងជាប្រធានកិត្តិយសក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាអធិបតីកិត្តិយសក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា កាលពីព្រឹកថ្ងៃទី ១៥ ខែវិច្ឆិកា ឆ្នាំ ២០២៣នេះ។

សេចក្ដីសម្រេចចិត្តរបស់មហាសន្និបាតរណសិរ្សសាមគ្គី អភិវឌ្ឍន៍មាតុភូមិកម្ពុជាលើកទី ៦ បានឲ្យដឹងថា អង្គមហា សន្និបាត បានអនុម័តជ្រើសតាំង សម្តេចអគ្គមហាពញាចក្រី ហេង សំរិន ជាប្រធាន កិត្តិយសក្រុមប្រឹក្សាជាតិរណសិរ្សសាមគ្គី សម្ដេចមហាបវរធិបតី ហ៊ុន ម៉ាណែត ជាគណៈអធិបតី កិត្តិយស សម្តេចកិត្តិសង្គហបណ្ឌិត ម៉ែន សំអន ជាប្រធាន និងឯកឧត្តម ហ៊ុន ម៉ានី ជាអនុប្រធាន នៃក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា និងឥសរ្សជនចំនួន ៤៤អង្គ/នាក់ ផ្សេងៗទៀត។

អង្គមហាសន្និបាត ក៏បានអបអរសាទរសមិទ្ធផលសម្រេចបាន ក្នុងការកសាង និងអភិវឌ្ឍន៍ប្រទេសជាតិ ឲ្យមានការរីកចម្រើនលើគ្រប់វិស័យ របស់រាជរដ្ឋាភិបាលអាណត្តិមុនៗ ក្រោមការដឹកនាំប្រកប ដោយគតិបណ្ឌិត និងចក្ខុវិស័យវែងឆ្ងាយ គ្រប់ជ្រុងជ្រោយ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ក្នុងកិច្ចជំរុញការអនុវត្តយុទ្ធសាស្ត្រចតុកោណនៅគ្រប់ដំណាក់កាល យ៉ាងមានប្រសិទ្ធភាពខ្ពស់ និងបានគាំទ្រយ៉ាងពេញទំហឹង និងមានជំនឿយ៉ាងមុតមាំ ចំពោះកម្មវិធីគោលនយោបាយ និងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ជានាយករដ្ឋមន្តី នៃព្រះរាជាណាចក្រកម្ពុជា។

អង្គមហាន្និបាត ក៏បានត្រងត្រាប់ស្តាប់ដោយយកចិត្តទុកដាក់ និងប្តេជ្ញាអនុវត្តតាមអនុសាសន៍ដ៏មានសារៈសំខាន់របស់សម្តេចប្រធានទាំងពីរ ដែលបានលើកឡើងក្នុងអង្គពិធី ទុកជាដំបូន្មានដ៏មានតម្លៃសម្រាប់តម្រង់ទិស នៃសកម្មភាពរបស់អង្គការរណសិរ្សគ្រប់ថ្នាក់ ក្នុងពេលបច្ចុប្បន្ន និងទៅអនាគត និងបានអំពាវនាវដល់សមាជិក-សមាជិការណសិរ្ស គ្រប់លំដាប់ថ្នាក់ ត្រូវខិតខំផ្សព្វផ្សាយខ្លឹមសារ និងសេចក្តីសម្រេចចិត្ត នៃអង្គមហាសន្និបាតរណសិរ្សសាមគ្គី អភិវឌ្ឍន៍មាតុភូមិកម្ពុជាលើកទី ៦ ឲ្យបានទូលំទូលាយដល់គ្រប់ មជ្ឈដ្ឋានសង្គម៕