ចាក់វ៉ាក់សាំងកូវីដ-១៩ អាច មាន​ប្រសិទ្ធិភាពរហូតមែនទេ?

ថ្លែងនៅក្នុងសន្និសីទកាសែតនារសៀលថ្ងៃទី៨ ខែកុម្ភៈ ឆ្នាំ២០២១នេះ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានបង្ហាញពីប្រសិទ្ធិភាពនៃការចាក់វ៉ាក់សាំងកូវីដ-១៩ ថា មកដល់ពេលនេះមិនទាន់មានការអះអាងថា មានវ៉ាក់សាំងកូវីដ១៩ណា ដែលអាចមានប្រសិទ្ធិភាពរហូតពេញមួយជីវិតទេ។

លោកស្រី ឱ វណ្ណឌីន បានមានប្រសាសន៍ថា វ៉ាក់សាំងទាំងអស់ដែលមានក្នុងបញ្ជី រួមទាំងវ៉ាក់សាំង Pfizer របស់សហរដ្ឋអាមេរិក ក៏អត់ទាន់មានឯកសារណា ឬក៏ការសិក្សាណាដែលបញ្ជាក់ថា មានប្រសិទ្ធិភាពបានពេញមួយជីវីតទេ។

លោកស្រី បញ្ជាក់ទៀតថា៖ “សូម្បីតែអង្គការសុខភាពពិភពលោក ក៏អត់ទាន់មានការបង្ហាញ ឬក៏ពន្យល់ថាវ៉ាក់សាំងដែលបានផ្សព្វផ្សាយឱ្យប្រើប្រាស់ហើយនេះ មានប្រសិទ្ធិភាពពេញមួយជីវិតដែរ។

ប៉ុន្តែអ្វីដែលគេបានសិក្សាទៅតាមលក្ខណៈវិទ្យាសាស្ត្រ គឺវ៉ាក់សាំងនេះចាក់ទៅវាមានប្រសិទ្ធិភាពបង្កើតជាកងការពារ បង្កើតជាអង្គបដិបក្ខសម្រាប់ទប់ទល់ជាមួយវីរុសកូវីដ-១៩ យ៉ាងហោចណាស់ពី៣ទៅ៦ខែដែរ។ ប៉ុន្តែថេរៈវេលានេះក៏មិនទាន់ច្បាស់លាស់ដែរ”។

លោកស្រី ឱ វណ្ណឌីន លើកឡើងថា អ្វីដែលអង្គការសុខភាពពិភពលោកតែងតែនិយាយ គឺសង្ឃឹមថា វ៉ាក់សាំងនេះនឹងជួយទៅដល់បុគ្គលក្រោយពីការចាក់ យ៉ាងហោចណាស់ក៏ក្នុងរយៈពេល៦ខែ ហើយគ្រប់គ្រាន់។

លោកស្រី មានប្រសាសន៍បន្តថា៖ “ពីព្រោះទិសដៅនៃការចាក់វ៉ាក់សាំង ដែលគេខំជំរុញឱ្យចាក់នៅទូទាំងពិភពលោកនេះ គឺដើម្បីជំរុញឱ្យមានភាពស៊ាំនៅក្នុងបណ្ដាប្រទេសនីមួយៗ។ ប្រទេសកម្ពុជាក៏មានភាពស៊ាំ ប្រទេសថៃក៏មានភាពស៊ាំ នៅអាមេរិកក៏មាន នៅបារាំងក៏មាន អ៊ីចឹងនៅគ្រប់បណ្ដាប្រទេសទាំងអស់នៅពេលមានភាពស៊ាំនៅក្នុងសហគមន៍ អ៊ីចឹងវីរុសកូវីដ-១៩ នឹងរលាយបាត់បង់ វានឹងមិនមានលទ្ធភាពក្នុងការវាយលុកធ្ងន់ធ្ងរបន្តទៀតបានទេ”។

លោកស្រី ឱ វណ្ណឌីន បន្ថែមថា សាកលលោកកំពុងតែគិតថា នៅថ្ងៃខាងមុខ ប្រហែលជាការធ្វើដំណើររបស់អ្នកដំណើរនឹងត្រូវការពិនិត្យមើលកាតចាក់ថ្នាំបង្ការ។

លោកស្រី មានប្រសាសន៍ថា៖ “អ៊ីចឹងអ្វីដែលយើងកំពុងគិត ថាតើវ៉ាក់សាំងកូវីដ-១៩នេះ នៅខាងមុននេះប្រហែលជាអាចមានតម្រូវការពេលដែលយើងធ្វើដំណើរ។ ប៉ុន្តែនៅតែត្រូវការធ្វើចត្តាឡីស័ក និងអនុវត្តវិធានការនានាដដែលដើម្បីបង្ការទប់ស្កាត់មិនឱ្យមានវីរុសកូវីដ-១៩ចូលមកក្នុងប្រទេស”។

លោកស្រី ឱ វណ្ណឌីន បានបញ្ជាក់ថា អ្នកដែលបានចាក់វ៉ាក់សាំងកូវីដ១៩ហើយ គាត់បានបង្កើតកងការពារ ប៉ុន្តែមិនមែនមានន័យថា គាត់មិនឆ្លងវីរុសកូវីដ-១៩ទេ។

កាលពីម្សិលមិញ ជំនួយវ៉ាក់សាំងកូវីដ-១៩ របស់ចិន ជំហានទី១ បានមកដល់កម្ពុជា។ វ៉ាក់សាំងបង្ការជំងឺកូវីដ-១៩ របស់ចិន ចំនួន៦០ម៉ឺនដូសនេះ ជាប្រភេទវ៉ាក់សាំង Sinopharm ដែលផលិតដោយរដ្ឋាភិបាលចិន។ ក្រោយមកដល់ប្រទេសកម្ពុជា វ៉ាក់សាំង Sinopharm ទាំងនេះ នឹងត្រូវប្រគល់ជូនក្រសួងការពារជាតិចំនួន៣០ម៉ឺនដូស និងប្រគល់ជូនក្រសួងសុខាភិបាលចាត់ចែងចំនួន៣០ម៉ឺនដូស។

តាមការណែនាំ វ៉ាក់សាំង Sinopharm ទាំងនេះ តម្រូវឱ្យចាក់លើតែមនុស្សដែលមានអាយុចាប់ពី ១៨ឆ្នាំ ទៅ ៥៩ឆ្នាំ ប៉ុណ្ណោះ ដោយកំពុងរង់ចាំលទ្ធផលនៃការសិក្សាបន្តទៀតសម្រាប់អាយុក្រៅពីនេះ។

បច្ចុប្បន្ន ប្រទេសចិនបានផលិតចេញនូវវ៉ាក់សាំង២ប្រភេទ ដើម្បីបង្ការជំងឺកូវីដ-១៩ គឺ វ៉ាក់សាំងស៊ីណូហ្វាម ( Sinopharm) ដែលផលិតដោយរដ្ឋាភិបាល និងវ៉ាក់សាំងស៊ីណូវ៉ាក់ (Sinovac) ដែលផលិតដោយក្រុមហ៊ុន Sinovac Biotech Ltd។

មកទល់ពេលនេះ មានប្រទេសយ៉ាងហោចចំនួន១៦ហើយ ដែលបានសម្រេចអនុម័តឲ្យប្រើប្រាស់វ៉ាក់សាំង COVID-19 របស់ក្រុមហ៊ុនចិនទាំងពីរ។ ក្នុងនោះ វ៉ាក់សាំងរបស់ Sinopharm ត្រូវបានអនុញ្ញាតឲ្យប្រើនៅ អេមីរ៉ាត់អារ៉ាប់រួម បារ៉ែន ហុងគ្រី ស៊ែរប៊ី ប៉េរូ អ៊ីរ៉ាក់ ម៉ារ៉ុក អេហ្ស៊ីប ប៉ាគីស្ថាន និងកម្ពុជា។ រីឯវ៉ាក់សាំងរបស់ Sinovac ត្រូវបានអនុញ្ញាតឲ្យប្រើនៅ ប្រេស៊ីល ឥណ្ឌូណេស៊ី តួកគី ឈីលី កូឡុំប៊ី និង អាស៊ែបៃហ្សង់៕

អត្ថបទ៖ វីរៈ
សូមចូលអានព័ត៌មានពាក់ព័ន្ធ៖ ការ​ចាក់វ៉ាក់សាំងកូវីដ១៩ មា​ន៤​ទីតាំង​​នៅ​​ភ្នំពេញ

នាយករដ្ឋមន្ត្រីប្រកាសឱ្យ សមាជិករដ្ឋាភិបាល ទៅចាក់វ៉ាក់សាំងដើម្បីជាគំរូដល់ប្រជាពលរដ្ឋ