ព័ត៌មានជាតិ

ដំឡូងជ្វាធ្លាក់ថ្លៃពី ១៣០០ រៀល នៅសល់ ៣០០ រៀល កសិករមួយគ្រួសារខកចិត្តក្រោយពង្រីកផ្ទៃដីដាំសង្ឃឹមបានតម្លៃខ្ពស់

បានផុស

១ year មុន

នៅ

ថ្ងៃព្រហស្បតិ៍ ១៦ វិច្ឆិកា ២០២៣

ដោយ

ដំណាំដំឡូងជ្វាដែលខ្មែរកាលពីសម័យដើមនិយមដាំតាមដីភូមិឋាន ដើម្បីធ្វើជានំជៀនឬកែច្នៃជានំឬបង្អែមផ្សេងៗទៀត ទៅតាមទម្លាប់ស្ទើរគ្រប់គ្នា មកដល់បច្ចុប្បន្ន ប្រជាកសិករដែលរស់នៅក្នុងខេត្តបាត់ដំបងក៏នៅតែមានអ្នកយកមកបន្តប្រកបរបរកសិកម្មមួយនេះ នៅលើទំហំដីធំៗនៅក្នុងស្រុកមួយចំនួននៃខេត្តបាត់ដំបង ដើម្បីបន្តជំនាន់ នឹងជួយទ្រទ្រង់សេដ្ឋកិច្ចគ្រួសារ ឲ្យបានល្អប្រសើរផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងលោក សាន រីណា ជាម្ចាស់ចម្ការដំឡូងជ្វា ដែលរស់នៅក្នុង ភូមិបួរ ឃុំបួរទូក ខាងលិច ក្នុងស្រុកភ្នំព្រឹក ខេត្តបាត់ដំបង បានរៀបរាប់ឲ្យ «កម្ពុជាថ្មី» ដឹងថា កាលពីដើមឆ្នាំ២០២៣ លោកបានដាំដំឡូងជ្វាលើទំហំផ្ទៃដីមិនច្រើនប៉ុន្មានទេ តែការប្រមូលផលបានទទួលបានល្អប្រសើរ ហើយតម្លៃទីផ្សារក៏អាចទទួលយកបាន តាមរយៈឈ្មួញមកលើកដល់ចម្ការ ហើយនាំយកទៅលក់បន្តនៅប្រទេសវៀតណាម ដោយក្នុង ១ គីឡូក្រាមលក់បានពី ១៣០០ រៀលដល់ ១៤០០រៀល។

ម្ចាស់ចម្ការរូបនេះបន្តថា ខណៈការប្រមូលផលទី១ នៃដើមឆ្នាំ២០២៣ (ដើមដៃ) ស្របតាមទីផ្សារល្អប្រសើរ លោកហាក់មានមហិច្ឆតាក៏ចាប់ផ្ដើមដាំដំឡូងជ្វាបង្កើនបន្ថែមលើទំហំដីរហូតដល់ជាង ៦ហិកតា នៃរដូវកាល (ចុងដៃ) ក្នុងឆ្នាំដដែលនេះ រហូតដល់បានហុចផលតាមក្តីរំពឹង។ ប៉ុន្តែមកដល់ពេលនេះ ស្របពេលការប្រមូលផលដំណាំកាន់តែខិតចូលមកដល់នាពេលឆាប់ៗខាងមុខនេះ ក៏ស្រាប់តែលោកបានខកចិត្ត ខណៈដែលក្រុមឈ្មួញឲ្យតម្លៃត្រឹមតែ ១ គីឡូក្រាម ៣០០រៀល ទៅ ៤០០ រៀលប៉ុណ្ណោះ ដោយក្រុមឈ្មួញលើកហេតុផលថាវៀតណាមផ្អាកការទទួលយកហើយ មានតែទីផ្សារក្នុងស្រុកប៉ុណ្ណោះ។

លោកបន្តថា «ខ្ញុំទុករងចាំមើលសិន មិនទាន់ឆ្លើយតបជាមួយឈ្មួញ ដែលធ្លាប់បានមកទទួលទិញកាលពីដើមដៃនោះនៅឡើយ ព្រោះខ្ញុំរកមើលទីផ្សារបន្ថែមនៅប្រទេសថៃសិនហើយបើសិនជាបានថ្លៃ ខ្ញុំនឹងលក់ទៅឲ្យក្រុមឈ្មួញទៅថៃវិញ ក្រែងបានកម្រៃទប់ទល់ និងការចំណាយហើយបើទីផ្សារនៅថៃវាប្រហាក់ប្រហែលគ្នា ឆ្នាំមុខខ្ញុំនឹងធ្វើដំណាំផ្សេងវិញ»។

លោក ហេង សិទ្ធ មន្ត្រីនៃមន្ទីរកសិកម្មបានឲ្យដឹងថា ដំឡូងជ្វាមាននៅក្នុងស្រុកចំនួន ២នៃខេត្តបាត់ដំបង គឺស្រុកបវេល និងស្រុកភ្នំព្រឹក ដែលមានផ្ទៃដីសរុបចំនួន ៩២ ហិកតា។ លោកមិនបានបញ្ជាក់ថា មកពីមូលហេតុអ្វីបានជាតម្លៃធ្លាក់ដល់កម្រិតនេះនោះទេ ខណៈដែលកសិករស្នើឲ្យខាងមន្ទីរកសិកម្ម និងមន្ទីរពាក់ព័ន្ធជួយសម្រួលទីផ្សារលើកសិផលដំឡូងជ្វាឲ្យបានសមរម្យផង ដើម្បីជួយបញ្ចៀសការខាតបង់ក្នុងការចំណាយច្រើនពេក អាចប៉ះពាល់ សេដ្ឋកិច្ចគ្រួសាររបស់កសិករដែលបានប្រកបដាំដុះដំណាំមួយប្រភេទនេះ ៕

អត្ថបទ៖ សៅ សារិទ្ធ