ព័ត៌មានជាតិ

ប.ស.ស បើកយុទ្ធនាការផ្សព្វផ្សាយរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តដល់អាជីវករ និងកម្មករ

បានផុស

១ year មុន

នៅ

ថ្ងៃសុក្រ ១៧ វិច្ឆិកា ២០២៣

ដោយ

បេឡាជាតិសន្តិសុខសង្គម(ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានចុះធ្វើយុទ្ធនាការផ្សព្វផ្សាយស្ដីពីលក្ខខណ្ឌ និងនីតិវិធី នៃការស្នើសុំចុះឈ្មោះចូលជាសមាជិក ប.ស.ស តាមរបបភាគទានដោយស្ម័គ្រចិត្ត ពិសេសការផ្សព្វផ្សាយអំពីអត្ថប្រយោជន៍ដែលប្រជាពលរដ្ឋត្រូវទទួលបាន ពេលក្លាយជាសមាជិក ប.ស.ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះធ្វើយុទ្ធនាការផ្សព្វផ្សាយមានរយៈពេល ៣០ ថ្ងៃនេះ បន្ទាប់ពី សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចប្រកាសដាក់ឲ្យអនុវត្តជាផ្លូវការនូវការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ ដោយគិតមកដល់ពេលនេះ មានប្រជាពលរដ្ឋ អាជីវករ និងកម្មករនិយោជិតសរុបប្រមាណជា ៨៦ ២៨៥ នាក់ ទទួលបានការផ្សព្វផ្សាយតាមរយៈយុទ្ធនាការខាងលើនេះ។

ដោយឡែកក្នុងយុទ្ធនាការថ្ងៃទី ២ ត្រូវនឹងថ្ងៃទី ១៦ ខែវិច្ឆិកា ឆ្នាំ ២០២៣ នេះ ក្រុមការងារ ប.ស.ស បានចុះផ្សព្វផ្សាយសរុបចំនួន ៩៦ លើកបន្ថែមទៀត និងមានអ្នកចូលរួមសរុបចំនួន ៦៣ ៥០៥ នាក់ (ស្រី ៤៦ ៥២៤នាក់) ក្នុងនោះគោលដៅក្នុងរាជធានីភ្នំពេញសរុបចំនួន ២៤ សហគ្រាស ស្មើនឹង ២៤ លើក មានអ្នកចូលរួមសរុប ៤១ ២៦៤ នាក់ (ស្រី ៣១ ៣៧១ នាក់) និងចុះផ្សព្វផ្សាយតាមផ្សារសរុប ១៣ ផ្សារ ស្មើនឹង ៣៦ លើក អ្នកចូលរួមសរុប ១០ ៣៧២ នាក់ (ស្រី ៨ ៩១៩ នាក់)។ ដោយឡែកសម្រាប់សាខា ប.ស.ស ខេត្ត-ខណ្ឌ បានចុះផ្សព្វផ្សាយសរុបចំនួន ៣៩ សហគ្រាស ស្មើនឹង ៣៦ លើក និងមានអ្នកចូលរួមសរុប ១១ ៨៦៩ នាក់ (ស្រី ៦ ២៣៤ នាក់)។

គួរបញ្ជាក់ថា របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត គឺជាកម្មវិធីរបស់រាជរដ្ឋាភិបាល បង្កើតឡើងដើម្បីជួយប្រជាពលរដ្ឋឲ្យទទួលបានការថែទាំសុខភាពសម្រាប់ខ្លួនឯង ប្តី ឬប្រពន្ធ និងកូនក្នុងបន្ទុក ជាហេតុធ្វើឲ្យពលរដ្ឋអាចគ្រប់គ្រងចំណាយលើបញ្ហាសុខភាព និងគ្រោះថ្នាក់ផ្សេងៗ សំដៅរក្សាលំនឹងប្រាក់ចំណូលក្នុងគ្រួសារ និងបង្កើនផលិតភាពការងារ។

សមាជិក ប.ស.ស ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស ទាំងអស់ នឹងទទួលបាននូវអត្ថប្រយោជន៍ ដូចជា សេវាពិនិត្យពិគ្រោះយោបល់ ព្យាបាល និងថែទាំប្រាក់បំណាច់មាតុភាព និងប្រាក់វិភាជន៍បូជាសព ពិសេសអាចពិនិត្យពិគ្រោះយោបល់ និងព្យាបាលជំងឺនៅគ្រប់ មន្ទីរពេទ្យជាដៃគូ ប.ស.ស ទូទាំងប្រទេសដោយឥតគិតថ្លៃ៕

អត្ថបទ ៖ សំអឿន