លោក ឆុន វាសនា ជំរុញយុវជនខ្មែរបង្កើត មាតិការកលុយតាម Facebook និង YouTube

វិស័យ MMO ឬអាចហៅម្យ៉ាងទៀតបានថា ជាការរកលុយតាម Facebook និង YouTube បានកំពុងមានការរីក ចម្រើននៅកម្ពុជា។

ថ្លែងប្រាប់កម្ពុជាថ្មី លោក ឆុន វាសនា ប្រធាននាយកដ្ឋានបច្ចេកទេសវិទ្យុ អគ្គនាយកដ្ឋានវិទ្យុជាតិកម្ពុជា ក្រសួងព័ត៌មាន និងជាអ្នកបង្កើតមតិកា បានជំរុញដល់យុវជន ឬអ្នកចូលចិត្ដវិស័យ MMO កុំខ្លាចក្នុងការចាប់ផ្ដើម និងកុំរង់ចាំរហូត ទាល់តែមានអ្វីៗគ្រប់យ៉ាងទើបចាប់ផ្ដើម។ លោកបានគូសបញ្ជាក់ហេតុផលចំនួនពីរ ដែលជំរុញដល់យុវជនក្នុងការបង្កើត មាតិការកលុយតាមអ៊ីនធើណិត ដូច្នេះថា «ទី១. ដោយសារតែខ្ញុំឃើញយុវជន មួយចំនួនគាត់មានទេពកោសល្យ ប៉ុន្តែ អត់មានឱកាសក្នុងការបង្ហាញ ហើយទីពីរនោះ ខ្ញុំចង់ឲ្យយុវជន និងម្ចាស់អាជីវកម្មដែលគាត់មានស្រាប់ អាចប្រើប្រាស់ បណ្តាញសង្គមដើម្បីបង្កើនចំណូលបន្ថែម»។

លោក ឆុន វាសនា បានសង្កត់ធ្ងន់ថា «ខ្ញុំនិយាយតែវីដេអូ Original ទេ»។ សម្រាប់ចំណូលវិញជាទូទៅជាមធ្យម ប្រសិនបើគាត់យកចិត្តទុកដាក់ ពេលគាត់គ្រប់គោលការណ៍គាត់អាចរកចំណូលបានចាប់ពី ១០០ ដុល្លា ទៅ ១០០០ ដុល្លាក្នុងមួយខែ។ នៅកម្ពុជា Creator មានប្រហែលជា ៥ភាគរយ តែប៉ុណ្ណោះដែលជាអ្នកផលិតមាតិកា។

លោក  វាសនា ដែលគេស្គាល់ជាអ្នកបង្កើតមាតិកាចែករំលែកចំណេះដឹងរកលុយតាមអ៊ីនធើណិត ជាច្រើនឆ្នាំ បានប្រាប់អំពីគន្លឹះមួយចំនួន រួមមាន៖

ចាប់ផ្តើមជាមួយអ្វីដែលយើងមាន៖ ប្រសិនបើអ្នករង់ចាំរហូតដល់មានអ្វីៗគ្រប់យ៉ាង អ្នកនឹងមិនអាចចាប់ផ្តើមបានទេ។ មិនដែលមានថ្ងៃណា ឬពេលវេលាណាល្អឥតខ្ចោះក្នុងការចាប់ផ្តើម YouTube នោះឡើយ។

ប្តេជ្ញាចិត្តចំពោះការងារ YouTube៖ ប្រសិនបើអ្នកធ្វើរឿងត្រឹមត្រូវតាមដំណាក់កាល ដំណើរការមួយៗ វាត្រូវចំណាយ ពេល  វាត្រូវការការខិតខំប្រឹងប្រែង វាត្រូវការការប្តេជ្ញាចិត្ត ចំពោះការងារ ហើយធ្វើការងារនេះជារៀងរាល់ថ្ងៃ។

បង្ហោះវីដេអូឲ្យបានទៀងទាត់៖ ការផុសវីដេអូឲ្យបានទៀងទាត់ គឺជាគន្លឹះសំខាន់ បើមិនបានផុសវីដេអូទៀងទាត់ទេ អ្នក នឹងបាត់បង់ការយកចិត្តទុកដាក់។ ប្រសិនបើអ្នកផុស ១០ ថ្ងៃជាប់ៗគ្នា ហើយមិនបានផុសក្នុងរយៈពេល ៣ សប្តាហ៍ បន្ទាប់ នោះអ្នកធ្វើមិនជាប់លាប់នោះទេ។

ចំណុចទាំងបីនេះ គឺជាហេតុផលដែល YouTubers ល្បីៗ នៅលើពិភពលោក ទទួលបានជោគជ័យ។

លោក ឆុន វាសនា បានបន្ថែមថា ប្រសិនបើយុវជនចង់បានចំណូលបន្ថែមពី Facebook និង You tube ត្រូវតែ សិក្សាស្រាវជ្រាវ និងតាមដានជាប់ជានិច្ចពីការ Update របស់បណ្តាញសង្គមទាំងអស់នេះ ជាពិសេសត្រូវបង្ហាញ ទេពកោសល្យរបស់ខ្លួន បង្កើតមាតិកាតាមចំណង់ចំណូលចិត្តដែលខ្លួនស្រឡាញ់ និងមានសមត្ថភាពអាចធ្វើបាន។

បើតាមលោក ឆុន វាសនា «ខ្ញុំសូមឲ្យបងប្អូនផលិតវីដេអូថ្មី កុំកាត់វីដេអូរបស់គេ ឬចម្លងគ្នា ហើយផលិតមាតិកាណា ដែលជួយដល់សង្គមរបស់យើង ប្រទេសរបស់យើង»។

អ្នកលើកទឹកចិត្តឱ្យបង្កើតមាតិការូបនេះ បានសង្កត់ធ្ងន់ថា YouTube គឺជាដំណើរផ្សងព្រេង អ្នកណាធ្វើ អ្នកនោះបាន បើទោះជាអ្នកធ្វើ ឬមិនធ្វើក៏ ៥ ឆ្នាំទៀតនឹងមកដល់ដូចគ្នា៕

អត្ថបទ៖ ផល ធារិត