កម្លាំងមួកខៀវកម្ពុជាបានវិលចូលប្រទេសវិញហើយ ក្រោយចប់បេសកកម្មនៅប្រទេសម៉ាលី

កម្លាំងវិស្វកម្មព្រលានយន្តហោះលេខ៧២៩ និងកងកម្ទេចគ្រាប់មិនទាន់ផ្ទុះលេខ៨២៨ បានធ្វើមាតុភូមិនិវត្តន៍មកដល់កម្ពុជាដោយសុវត្ថិភាពវិញហើយ​ ក្រោយបានបញ្ចប់បេសកកម្មរក្សាសន្តិភាពនៅក្នុងប្រទេសម៉ាលី ក្រោមឆត្រអង្គការ សហប្រជាជាតិ។  

ពិធីទទួលដំណើរមកដល់របស់កងកម្លាំងមួកខៀវកម្ពុជា កាលពីយប់ថ្ងៃទី១៦​ ខែវិច្ឆិកា ឆ្នាំ២០២៣ មានការចូលរួមពីលោកនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព និងមន្ត្រីជាន់ខ្ពស់នៃកងយោធពលខេមរភូមិន្ទជាច្រើនទៀត។ កម្លាំងដែលមកដល់ពេលនេះ មានចំនួនសរុប៩០នាក់ ដោយក្នុងនោះ ៦៧នាក់ ជាកងកម្លាំងវិស្វកម្មព្រលានយន្តហោះលេខ៧២៩ បានបំពេញបេសកកម្មនៅតំបន់គីដាល់ និង២៣នាក់ ជាកងកម្ទេចគ្រាប់មិនទាន់ផ្ទុះលេខ៨២៨ ដែលបានបំពេញបេសកកម្មនៅទីក្រុងហ្គាវ ប្រទេសម៉ាលី។

ស្ថិតក្នុងឱកាសនោះ លោកនាយឧត្តមសេនីយ៍ សែម សុវណ្ណនី បានពាំនាំនូវការសួរសុខទុក្ខរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ លោកឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ​ ក៏ដូចជាលោកប្រធានគណៈកម្មាធិការជាតិ។

លោកនាយឧត្តមសេនីយ៍ លើកឡើងថា​ កិច្ចខិតខំប្រឹងប្រែងក្នុងការបំពេញភារកិច្ច ការគោរព និងការចូលរួមបេសកកម្មនេះ គឺជាការរួមចំណែកជាមគ្គុទេសក៍សម្រាប់ជំនាន់ក្រោយ ដើម្បីសន្តិភាពពិភពលោក។ លោក បានបន្តថា កងកម្លាំងវិស្វកម្មព្រលានយន្តហោះលេខ៧២៩ និងកងកម្ទេចគ្រាប់មិនទាន់ផ្ទុះលេខ៨២៨ មិនត្រឹមតែជាកម្លាំងនៃកងយោធពលខេមរភូមិន្ទប៉ុណ្ណោះទេ តែថែមទាំងជាគ្រួសារមួយរបស់អង្គការសហប្រជាជាតិ ដែលជានិមិត្តរូបនៃភាពក្លាហានក្នុងការចូលរួមចំណែកបំពេញភារកិច្ចក្នុងប្រទេសដែលរងជម្លោះ និងអស្ថិរភាព។

នេះជាការមកដល់លើកទី២ ហើយ បន្ទាប់ពីកងកម្លាំងមួកខៀវនាំមុខរបស់កម្ពុជាបានមកដល់មាតុប្រទេសវិញ កាលពីថ្ងៃទី២៧ ខែតុលា ឆ្នាំ២០២៣។ កន្លងមក និងពេលបច្ចុប្បន្ន កងកម្លាំងនៃកងយោធពលខេមរភូមិន្ទរបស់កម្ពុជា បានចេញទៅបំពេញបេសកកម្មរក្សាសន្តិភាពនៅតាមបណ្ដាប្រទេសជាច្រើន ដែលរងគ្រោះដោយសារភ្លើងសង្គ្រាម ជាអាទិ៍ ស៊ូដង់ ស៊ូដង់ខាងត្បូង ឆាត អាហ្វ្រិកកណ្តាល លីបង់ សាយប្រឺស ស៊ីរី ម៉ាលី យេមេន និងកុងហ្គោ ជាដើម។ ជំនាញសំខាន់ៗដែលកងកម្លាំងកម្ពុជាទទួលបន្ទុក មានដូចជា បោសសំអាតមីន កម្ទេចគ្រឿងផ្ទុះ ប្រឆាំង-បន្សាបគ្រឿងផ្ទុះកែច្នៃ កងរាជអាវុធហត្ថ វិស្វកម្មពហុជំនាញ នាយទាហានសេនាធិការ និងសង្កេតការណ៍យោធា៕