អាកាសធាតុផ្តើមចុះត្រជាក់​នៅខេត្តចំនួន ៤

ក្រសួងធនធានទឹក និងឧត្តុនិយមបានឱ្យដឹងថា ខេត្តចំនួន៤រួមមានខេត្តឧត្តរមានជ័យ ព្រះវិហារ មណ្ឌលគិរី និងខេត្តរតនគិរី មានធាតុអាកាសត្រជាក់នៅពេលព្រឹក ជាមួយនឹងសីតុណ្ហភាពអប្បបរមា ១៩-២០ អង្សាសេ។

យោងតាមស្ថានភាពធាតុអាកាសនៅព្រះរាជាណាចក្រកម្ពុជាសម្រាប់ថ្ងៃទី ១៨ ខែវិច្ឆិកា ឆ្នាំ២០២៣បានឱ្យដឹថាឥទ្ធិពល​សម្ពាធខ្ពស់ពីប្រទេសចិនគ្របដណ្តប់លើប្រទេសកម្ពុជា ជាមួយនឹងខ្យល់មូសុងឦសានបក់ពីបង្គួរទៅខ្លាំង។

ស្ថានភាពបែបនេះនឹងធ្វើឱ្យធាតុអាកាសចាប់ពីថ្ងៃទី ១៨ ដល់ថ្ងៃទី ២០ ខែវិច្ឆិកា ឆ្នាំ២០២៣ក្នុងនោះនៅតំបន់វាលទំនាប មានសីតុណ្ហភាពអប្បបរមាពី ២២-២៤អង្សាសេ និងសីតុណ្ហភាពអតិបរមាពី ២៨-៣១អង្សាសេហើយខ្យល់បក់មកពី​ទិសឦសាន ក្នុងល្បឿនពី ៥-៧ម៉ែត្រ/វិនាទី។

ចំណែកតំបន់ខ្ពង់រាបមានសីតុណ្ហភាពអប្បបរមាពី ១៩-២០ អង្សាសេ និងសីតុណ្ហភាពអតិបរមាពី ២៧-២៩ អង្សាសេ ហើយខ្យល់បក់មកពីទិសឦសាន ក្នុងល្បឿនពី ៦-៨ម៉ែត្រ/វិនាទី។

ដោយឡែកខេត្តឧត្តរមានជ័យ ព្រះវិហារ មណ្ឌលគិរី និងខេត្តរតនគិរី ធាតុអាកាសត្រជាក់នៅពេលព្រឹក ជាមួយនឹងសីតុណ្ហភាពអប្បបរមា ១៩-២០អង្សាសេ។

រីឯតំបន់មាត់សមុទ្រវិញមានសីតុណ្ហភាពអប្បបរមាពី ២៤-២៦អង្សាសេ និងសីតុណ្ហភាពអតិបរមាពី ២៨-៣០អង្សាសេ ហើយខ្យល់បក់មកពីទិសឦសានក្នុងល្បឿនពី ៤-៦ម៉ែត្រ/វិនាទី។ នៅលើផ្ទៃសមុទ្រមានខ្យល់បក់បោក និងរលកសមុទ្រមានកម្ពស់ពី ១,០០-១,៥០ម៉ែត្រ។

កន្លងមកក្រសួងសុខាភិបាលធ្លាប់បានណែនាំដល់ ប្រជាពលរដ្ឋទូទាំងប្រទេសជាពិសេសប្រជាជនដែលរស់នៅក្នុងតំបន់ដែលមានអាកាសធាតុចុះត្រជាក់ខ្លាំងត្រូវចេះការពារសុខភាពផ្ទាល់ខ្លួននិងក្រុមគ្រួសារបានល្អ និងអាចចៀសផុតពីជំងឺដង្កាត់ដែលអាចកើតមានដោយជាហេតុបណ្តាលមកពីអាកាសធាតុចុះត្រជាក់នេះ។

ក្នុងចំណោមជំងឺតាមរដូវកាលដែលជួបប្រទះញឹកញាប់ក្នុងអំឡុងពេលអាកាសធាតុចុះត្រជាក់នៅចន្លោះពីធ្នូដល់ខែមករានៃឆ្នាំគឺភាគច្រើនមានដូចជាជំងឺផ្លូវដង្ហើមដែលមិនត្រូវនឹងអាកាសធាតុត្រជាក់ឬជាប្រភេទអាល់លែកហ្ស៊ី និងជំងឺផ្លូវដង្ហើមបណ្ដាលមកពីវីរុស និងមេរោគស្គ្រីបតូកូកដែលបង្កឲ្យមានរោគសញ្ញាដូចជា គ្រុនផ្ដាសាយ ហូរសំបោ រលាកបំពង់ក ក្អក និងរលាកក្រពះពោះវៀនដោយពពួកវីរុស។

ចំពោះ ទារក កុមារនិង មនុស្សមានវ័យចំណាស់មានហានិភ័យខ្ពស់ទាក់ទងនឹងជំងឺបណ្ដាលមកពីអាកាសធាតុត្រជាក់ដោយសារទារកបាត់បង់កំដៅរាងកាយរហ័សជាងមនុស្សធំ ហើយមនុស្សចាស់សរីរាង្គពិបាកទប់ទល់ជាមួយអាកាសធាតុត្រជាក់ផងដែរ។

ក្រសួងសុខាភិបាលណែនាំឱ្យទារកអាយុតិចជាងមួយឆ្នាំមិនគួរឲ្យដេកនៅក្នុងបន្ទប់ត្រជាក់ទេ។ ការផ្តល់សម្លៀកបំពាក់ដែលកក់ក្តៅ និងតណ្តប់ភួយសម្រាប់ទារកឲ្យបានត្រឹមត្រូវដើម្បីព្យាយាមរក្សាសីតុណ្ហភាពឲ្យបានកក់ក្ដៅសម្រាប់ខ្លួនប្រាណ ពួកគក៏ដូចជានៅក្នុងបន្ទប់របស់ទារក។

ចំណែកមនុស្សវ័យចំណាស់ ជាញឹកញាប់, មានកំដៅរាងកាយតិចដោយសារតែការរំលាយអាហារក្នុងរាងកាយយឺតនិងសកម្មភាពរាងកាយមានតិចឬចុះថយ ដែលអាចធ្វើឲ្យសីតុណ្ហភាពក្នុងរាងកាយថយចុះជាងធម្មតា។

ដូច្នេះមនុស្សវ័យចំណាស់ ក៏មានហានិភ័យដែរដែលអាចធ្វើឲ្យមានគ្រោះថ្នាក់ដល់អាយុជីវិតដោយសារតែការឆ្លើយតបរបស់រាងកាយជាមួយភាពត្រជាក់ជាពិសេសអ្នកមានជំងឺប្រចាំកាយ ដូចជា ជំងឺទឹកនោមផ្អែម និង ជំងឺបេះដូងជាដើម។ដូចនេះកុមារតូចៗ និងមនុស្សវ័យចំណាស់គួរតែស្លៀកសម្លៀកបំពាក់ច្រើនជាន់ពេលមានអាកាសធាតុ ត្រជាក់ដើម្បីរក្សាភាពកក់ក្ដៅក្នុងខ្លួនគាត់។

ចៀសវាងសម្លៀកបំពាក់តឹង ពីព្រោះវាអាចរំខានដល់ចរាចរឈាមក្នុងរាងកាយនិងបណ្តាលឲ្យបាត់បង់កំដៅរាងកាយទៅវិញ។ គូរពាក់មួក និងស្រោមជើងនៅពេលចេញទៅខាងក្រៅ ក្នុងពេលមានអាកាស ធាតុត្រជាក់ដើម្បីរក្សាកំដៅក្នុងរាងកាយ ដែលអាចបាត់បង់តាមរយៈដៃ ក្បាល និងជើង។

ត្រូវពិសារទឹកឲ្យបានញឹកញាប់ដើម្បីចៀសវាងការបាត់បង់ជាតិទឹកនៅពេលសរីរាង្គខិតខំទប់ទល់ទៅនឹងភាពត្រជាក់។

ប្រសិនបើបងប្អូនប្រជាពលរដ្ឋមានបញ្ហាសុខភាព ឬការឆ្លងជំងឺដទៃទៀតសូមប្រញាប់ទៅស្វែងរកការពិនិត្យពិគ្រោះជំងឺនៅមន្ទីរពេទ្យរដ្ឋដែលនៅជិតផ្ទះ៕

អត្ថបទ៖ សំអឿន