រដ្ឋមន្ត្រីអប់រំ៖ អាមេរិកបានរួមចំណែកយ៉ាងធំធេង​ក្នុងការអភិវឌ្ឍធនធានមនុស្សនៅកម្ពុជា

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានលើកឡើងថារដ្ឋាភិបាលសហរដ្ឋអាមេរិកបានរួមចំណែកយ៉ាងធំធេងក្នុងការអភិវឌ្ឍធនធានមនុស្សនៅកម្ពុជា។

នៅក្នុងជំនួបពិភាក្សាការងារជាមួយលោក W.PatrickMurphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា ស្ដីពីកិច្ចសហប្រតិបត្តិការលើវិស័យអប់រំនៅកម្ពុជាកាលពីរសៀលថ្ងៃទី១៧វិច្ឆិកា លោកឧបនាយករដ្ឋមន្ត្រីបានកោតសរសើរ និងថ្លែងអំណរគុណយ៉ាងជ្រាលជ្រៅចំពោះការគាំទ្រលើវិស័យអប់រំកម្ពុជារបស់រដ្ឋាភិបាលសហរដ្ឋអាមេរិក ដែលបានរួមចំណែកយ៉ាងធំធេងក្នុងការអភិវឌ្ឍធនធានមនុស្សនៅកម្ពុជាស្របតាមចក្ខុវិស័យរបស់រដ្ឋាភិបាលនីតិកាលទី៧ ដែលកំណត់យកការអភិវឌ្ឍធនធានមនុស្សជាគោលដៅអាទិភាព។

លោកឧបនាយករដ្ឋមន្ត្រីបានឱ្យដឹងថា ក្នុងនោះរាជរដ្ឋាភិបាលក៏កំពុងផ្ដោតយកចិត្តទុកដាក់លើការពង្រឹងគុណភាពអប់រំតាំងពីវ័យក្មេង និងកម្មវិធីផ្ដល់ប្រឹក្សាអាជីពក្លឹបសិក្សាបន្ថែមនូវកម្មវិធីក្រៅម៉ោងសិក្សាផ្សារភ្ជាប់ជាមួយពុទ្ធសាសនាដើម្បីអប់រំចរិយាធម៌ និងសុជីវធម៌តបតាមអនុសាសន៍របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោកឧបនាយករដ្ឋមន្ត្រីបានបន្តថា ក្រសួងអប់រំយុវជន និងកីឡា បានកំណត់នូវកំណែទម្រង់សាលាតាមរយៈការជំរុញការអនុវត្តសុខភាពសិក្សាពង្រឹង ការគ្រប់គ្រងតាមសាលារៀនឆ្ពោះទៅលើកកម្ពស់លទ្ធផលសិក្សារបស់សិស្សព្រមទាំង
បានធ្វើចំណាត់ថ្នាក់សាលារៀនគំរូតាមស្តង់ដា៥ដែលត្រូវដាក់ឱ្យអនុវត្តនៅតាមសាលារៀនទូទាំងប្រទេសចាប់ពីឆ្នាំសិក្សាថ្មី ២០២៣-២០២៤ តទៅក្នុងនោះរួមមានស្តង់ដា៖ (១).លទ្ធផលសិក្សារបស់សិស្ស (២).របៀបបង្រៀន និងរៀន (៣).ការចូលរួមរបស់សហគមន៍ដំណើរប្រតិបត្តិការ និងរដ្ឋបាលសាលារៀន និង (៥).គណនេយ្យភាពរបស់សាលារៀន។

នៅក្នុងឱកាសនោះដែរ លោកឯកអគ្គរដ្ឋទូតសហរដ្ឋអាមេរិកបានចែករំលែកនូវបទពិសោធន៍ដែលទទួលបានពីការ
អនុវត្តគម្រោងអប់រំជាច្រើននៅកម្ពុជាដែលគាំទ្រដោយរដ្ឋាភិបាលសហរដ្ឋអាមេរិក និងបានផ្ដល់ព័ត៌មានពាក់ព័ន្ធនឹងអាហារូបករណ៍ Fullbirght របស់រដ្ឋាភិបាលសហរដ្ឋអាមេរិកដោយរំពឹងថានឹងមានយុវជនកម្ពុជាកាន់តែច្រើនចាប់
យកឱកាសទៅបន្តការសិក្សានៅសហរដ្ឋអាមេរិក៕

អត្ថបទ៖ សំអឿន