សម្ដេចធិបតី រំលឹកពីការចុះហត្ថលេខាជាមួយក្រុមហ៊ុនអាលីបាបា ដើម្បីលក់ផលិតផលនានារបស់កម្ពុជា

សម្តេចមហាបវរធិបធិបតី ហ៊ុន ណែត នាយករដ្ឋមន្ត្រីនៃកម្ពុជា បានរំលឹកថា កាលពីសម្ដេចអញ្ជើញបំពេញទស្សនកិច្ច នៅប្រទេសចិនកន្លងទៅ គឺក្រសួងពាណិជ្ជកម្មរបស់ក​ម្ពុជា បានចុះហត្ថលេខាជាមួយក្រុមហ៊ុនអាលីបាបា ដើម្បីលក់ផលិតផលនានារបស់កម្ពុជា។ ការរំលឹកនេះ ធ្វើឡើងក្នុងពិធីប្រកាស ដាក់ឲ្យអនុវត្តកម្មវិធីនយោបាយអាទិភាព ពាក់ព័ន្ធវិស័យកសិកម្ម នាព្រឹកថ្ងៃទី ២០ ខែវិច្ឆិកា ឆ្នាំ ២០២៣នេះ។

សម្ដេចធិបតី មានប្រសាសន៍ថា «កាលពីខ្ញុំទៅចិន ក្រសួងពាណិជ្ជកម្ម បានចុះហត្ថលេខាជាមួយក្រុមហ៊ុនអាលីបាបា នេះជារូបមន្តមួយ ក្រុមហ៊ុនអាលីបាបានេះ គាត់មានអតិថិជនគាត់រាប់លាននាក់ រយលាននាក់នៅលើពិភពលោក ហើយការឲ្យគាត់ជួយលក់ហ្នឹង គឺអត់​មានចាំបាច់ទាល់តែរកភ្នាក់ងារគាត់ មកជួយដើរលក់ទេ គាត់សុំឲ្យចូលក្នុងអា platform បច្ចេកវិទ្យារបស់គាត់ហ្នឹងឯង ដើម្បីដាក់ផលិតផលយើងនៅលើហ្នឹង គឺអតិថិជនរាប់រយលាននាក់នៅលើពិភពលោកមាន»។

សម្ដេចនាយករដ្ឋមន្ត្រី បានឲ្យដឹងថា កាលពីសម្ដេចអញ្ជើញបំពេញទស្សនកិច្ច នៅប្រទេសចិន នាពេលនោះ គឺសម្ដេចឃើញតាងែន (មៀនប៉ៃលិន) ពីខេត្តប៉ៃលិនរបស់កម្ពុជា បានដាក់លក់នៅលើ platform របស់ក្រុមហ៊ុនអាលីបាបា ដែលបានសាកដាក់លក់មួយកុងតានើរដំបូង គឺដំណើរទៅបានល្អ។

សម្ដេចធិបតី លើកឡើងបន្ថែមថា «បានន័យថា អ្នកលក់ផ្ទាល់មានលទ្ធភាព ដោយមិនចាំបាច់នេះទេ ហើយមិនចាំបាច់តែផលិតផលកសិកម្មទេ អាលីបាបានេះ អាចយើងផលិតផលសិប្បកម្ម ផលិតផលអី ស្រុកយើងអាចលក់បាន»៕