ព័ត៌មានជាតិ

ផ្តល់កូនឈើគ្រប់ប្រភេទ ១លានដើម ដល់ពលរដ្ឋខេត្តកំពត

បានផុស

១ year មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

កូនឈើគ្រប់ប្រភេទប្រមាណជា ១ លានដើម ត្រូវបានរដ្ឋមន្ត្រីក្រសួងបរិស្ថានផ្តល់ដល់ប្រជាពលរដ្ឋដែលរស់នៅក្នុងខេត្តកំពត ដែលរួមមានទាំងលោកគ្រូ អ្នកគ្រូ និងសិស្សានុសិស្សជាង ១៣ម៉ឺននាក់ មកពីសាលាចំនួន ៤៣៨ សាលា នៅទូទាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត រដ្ឋមន្ត្រីក្រសួងបរិស្ថានបានមានប្រសាសន៍ថា តាមរយៈកូនឈឺ ១ លានដើម ដែលផ្តល់ជូននាពេលនេះ នឹងជួយកាត់បន្ថយដល់ការប៉ះពាល់នៃសុវត្ថិភាពបរិស្ថាន។

លោកថា ភាពបៃតងស្រស់នៃដើមឈើនឹងស្រូបយកឧស្ម័នកាបូនិច និងបញ្ចេញមកវិញនូវអុកស៊ីហ្សែនដែលមានសារៈសំខាន់ចំពោះជីវិតនៅលើផែនដី ហើយអុកស៊ីហ្សែនគឺជាតម្រូវការចាំបាច់ចំពោះសារពាង្គកាយមនុស្ស និងសភាវៈដែលមានជីវិតដើម្បីដកដង្ហើម ហើយព្រៃឈើស្រូបយកបរិមាណដ៏ច្រើននៃឧស្ម័នកាបូនិចដែលបញ្ចេញដោយសកម្មភាពមនុស្ស។

លោកបន្តទៀតថា ការចូលរួមអនុវត្តយុទ្ធនាការនៅថ្ងៃនេះគឺជាសក្ខីភាពនៃការគាំទ្រ និងការជំរុញអនុវត្តកម្មវិធីនយោបាយ របស់ រាជរដ្ឋាភិបាលនីតិកាលទី៧ នៃរដ្ឋសភា និងយុទ្ធសាស្ត្របញ្ចកោណដំណាក់កាលទី១ ដែលបានចាត់ទុកការកែទម្រង់ ការគ្រប់គ្រងធនធាន ធម្មជាតិ និងបរិស្ថាន ជាការងារអាទិភាពមួយក្នុងចំណោមការងារអាទិភាពរបស់រាជរដ្ឋាភិបាល។ មិនតែប៉ុណ្ណោះ ក៏បានដាក់បញ្ចូលនូវក្រប ខណ្ឌការងាររបស់ក្រសួងបរិស្ថានចំនួន ៥ ដែលមាន៖ ការកាត់បន្ថយការបំពុលបរិស្ថាន, ការពង្រឹងការគ្រប់គ្រងតំបន់ការពារធម្មជាតិ, ការអប់រំផ្សព្វផ្សាយបរិស្ថាន និងការប្រែប្រួលអាកាសធាតុ, ទំនើបកម្មរដ្ឋបាល និងហិរញ្ញវត្ថុប្រកបដោយចិរភាព, និងការ លើកកម្ពស់ការទូតបៃតង។

លោក អ៊ាង សុផល្លែត ក៏បានសង្កត់ធ្ងន់ដែរថា ដើម្បីឈានទៅសម្រេចក្របខណ្ឌការងារទាំង ៥ ខាងលើចាំបាច់ណាស់ដែលក្រសួងបរិស្ថានត្រូវដាក់ចេញនូវការងារអាទិភាពចំនួន ៣ សំខាន់ត្រូវជំរុញរយៈពេល ១០០ថ្ងៃ។ ទី១ ការប្រយុទ្ធប្រឆាំងនឹងសំរាម សំណល់រឹងទីប្រជុំជន ជាពិសេសសំណល់ប្លាស្ទិក ទី២ ការប្រយុទ្ធប្រឆាំងនឹងការប្រែប្រួលអាកាសធាតុ ដែលយកចិត្តទុកជាសំខាន់ គឺជំរុញការបណ្តុះ និងដាំកូនឈើសំដៅបង្កើនគម្របព្រៃឲ្យដល់ ៦០% នៅឆ្នាំ២០៥០ និងទី៣ ការបង្កើនទេសចរណ៍ធម្មជាតិ និងលើកកម្ពស់ជីវភាពសហគមន៍មូលដ្ឋាន សំដៅធានាបាននូវសហគមន៍ចិរភាព និងអព្យាក្រឹតកាបូន៕

Related Topics:លោក អ៊ាង សុផល្លែត