ព័ត៌មានជាតិ

សហព័ន្ធសន្តិភាពសកល UPF ពង្រឹងកិច្ចសហប្រតិបត្តិការជាមួយ រដ្ឋសភាកម្ពុជា ក្នុងបេសកកម្មកសាងសុខសន្តិភាព និងការអភិវឌ្ឍ

បានផុស

១ year មុន

នៅ

ថ្ងៃចន្ទ ២០ វិច្ឆិកា ២០២៣

ដោយ

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឱ្យប្រតិភូសហព័ន្ធសន្តិភាពសកល (Universal Peace Federation-UPF) ដឹកនាំដោយ ឯកឧត្ដមបណ្ឌិត Charles S. Yang ប្រធានសហព័ន្ធសន្តិភាពសកល (UPF) ជួបសម្ដែងការគួរសម និងពិភាក្សាការងារ ដើម្បីពង្រឹងពង្រីកកិច្ចសហប្រតិបត្តិការរវាងស្ថាប័នទាំងពីរ ក្នុងបេសកកម្មស្វែងរកសុខសន្តិភាព និងការអភិវឌ្ឍ ជូនពលរដ្ឋក្នុងតំបន់ ក៏ដូចជាលើសកលលោក នាវិមានរដ្ឋសភា កាលពីព្រឹកថ្ងៃទី ២០ ខែវិច្ឆិកា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនោះ សម្តេចរដ្ឋសភាធិបតី បានថ្លែងការកោតសរសើរចំពោះបេសកកម្មដ៏ល្អរបស់អង្គការ UPF ក្នុងការស្វែងរកសន្តិភាពជូនតំបន់ និងសកលលោក។ កម្ពុជា បានចូលរួម និងគាំទ្របេសកកម្មនេះជានិច្ច ក្រោមការដឹកនាំរបស់ សម្តេចតេជោ ហ៊ុន សែន ស្ថាបនិកសន្តិភាព ហើយបានបន្តវេនដោយ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នីតិកាលទី ៧ ដែលពោរពេញដោយសមត្ថភាព និងថាមពល។

សម្តេចរដ្ឋសភាធិបតី បានលើកឡើងថា UPF ក៏មានទំនាក់ទំនងដ៏ល្អជាមួយរដ្ឋសភាកម្ពុជា ជាយូរមកហើយ។ ដូច្នេះនៅពេលពិភពលោកកំពុងប្រឈមនូវអំពើហិង្សា ភាពស្មុគស្មាញភូមិសាស្ត្រនយោបាយ សង្គ្រាម និងភាពមិនប្រាកដប្រជានោះ UPF គួរស្វែងរកលទ្ធភាពកាន់តែច្រើនជាមួយរដ្ឋសភាកម្ពុជា ដើម្បីបានចូលរួមក្នុងសកម្មភាពដ៏មានតម្លៃនេះ។

សម្តេចរដ្ឋសភាធិបតី បានគូសបញ្ជាក់ថា រដ្ឋសភាកម្ពុជា បានចូលរួមជាមួយវេទិកាអន្តរសភាជាច្រើនក្នុងការលើកកម្ពស់សន្តិភាព និងកិច្ចសន្ទនាដូចជា AIPA, APPF, APF, ASEP ជាដើម។

ឯកឧត្ដមបណ្ឌិត Charles S. Yang បានសម្តែងការអបអរសាទចំពោះជោគជ័យរបស់កម្ពុជា ដែលបានរៀបចំការបោះឆ្នោត ដោយសេរី និងយុត្តិធម៌បំផុត កាលពីថ្ងៃទី ២៣ ខែកក្កដា កន្លងមក ក្នុងនោះ UPF បានចូលរួមសង្កេតការណ៍ដោយផ្ទាល់ផងដែរ។ ឯកឧត្តមប្រធានគណៈប្រតិភូ បានចូលរួមអបអរសាទរ ជូន សម្តេចរដ្ឋសភាធិបតី ឃួន សុដារី ដែលត្រូវបានរដ្ឋសភាបោះឆ្នោតជ្រើសតាំងប្រធានរដ្ឋសភា និងបានប្រគល់ជូន សម្តេចរដ្ឋសភាធិបតី នូវលិខិតអបអរសាទររបស់បណ្ឌិត Hak Ja Han Moon ស្ថាបនិក UPF ជូន សម្តេចរដ្ឋសភាធិបតី និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រី ផងដែរ។

ឯកឧត្តម បានគូសបញ្ជាក់ថា UPF ទាំងមូល មានជំនឿជឿជាក់ក្រោមការដឹកនាំរបស់ សម្តេចរដ្ឋសភាធិបតី ឃួន សុដារី និងសម្តេចបវរធិបតី ហ៊ុន ម៉ាណែត ទាំងរដ្ឋសភា និងរាជរដ្ឋាភិបាលកម្ពុជាអាណត្តិថ្មីនេះ នឹងសម្រេចបាននូវសមិទ្ធផលថ្មីៗ ជាច្រើនទៀតជូនជាតិ និងប្រជាជន។

ឯកឧត្តមបណ្ឌិត Charles S. Yang បានជម្រាបជូន សម្តេចប្រធានរដ្ឋសភាពីលទ្ធផលជាច្រើន នៃដំណើរទស្សនកិច្ចរបស់គណៈប្រតិភូ UPF នៅកម្ពុជា ក្នុងនោះ គណៈប្រតិភូ បានទស្សនកិច្ចវិមានឈ្នះឈ្នះផងដែរ។ ឯកឧត្តម ក៏លើកឡើងពីគម្រោងរៀបចំសន្និសីទមួយចំនួនរបស់ UPF ដើម្បីសន្តិភាព នាពេលខាងមុខ និងស្នើសូមរដ្ឋសភាកម្ពុជាគាំទ្រ ដោយបានគូសបញ្ជាក់ថា យុទ្ធសាស្ត្រឈ្នះឈ្នះរបស់ សម្តេចតេជោ ហ៊ុន សែន ជាមេរៀនសំខាន់មួយដែលពិភពលោកត្រូវរៀនសូត្រក្នុងការបញ្ចប់សង្គ្រាម និងកសាងសន្តិភាព។ ឯកឧត្តម បានថ្លែងអំណរគុណយ៉ាងជ្រាលជ្រៅជូន សម្តេចតេជោ ហ៊ុន សែន ដែលតែងតែបានគាំទ្រដល់បេសកកម្មរបស់ UPF។

សម្តេចមហារដ្ឋសភាធិការធិបតី ឃួន សុដារី បានជម្រាបជូន គណៈប្រតិភូបន្ថែមថា ទាំង សម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីថ្មីរបស់កម្ពុជា បានចាត់ទុកសុខសន្តិភាពជាអាទិភាព ដែលត្រូវលើកកម្ពស់ និងការពារជានិច្ច។ សម្តេចរដ្ឋសភាធិបតី បានគូសបញ្ជាក់ថា គោលការណ៍គ្រឹះនូវយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាលអាណត្តិទី ៧ គឺការធានាថែរក្សាសុខសន្តិភាព និងការលើកកម្ពស់ជីវភាពពលរដ្ឋ ឱ្យសម្រេចបាននូវផែនការអភិវឌ្ឍន៍ ជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានចំណូលខ្ពស់នៅឆ្នាំ ២០៥០។

ជាមួយគ្នានេះ សម្តេចរដ្ឋសភាធិបតី ក៏បានស្នើដល់គណៈប្រតិភូ ជួយចូលរួមចំណែកដល់ការអភិវឌ្ឍរបស់កម្ពុជា តាមរយៈការជួយទាក់ទាញអ្នកទេសចរ និងអ្នកវិនិយោគ ជួយដល់ការបណ្ដុះបណ្ដាល និងផ្តល់ជាសម្ភារៈនៅក្នុងការលើកកម្ពស់សមត្ថភាពមន្ត្រីអគ្គលេខាធិការដ្ឋានរដ្ឋសភា ដើម្បីបម្រើសេវាជូនតំណាងរាស្ត្រកាន់តែមានប្រសិទ្ធភាព ព្រមទាំងការកសាងលើកកម្ពស់សមត្ថភាព និងភាពអង់អាចដល់ស្ត្រីផងដែរ៕