នាយករដ្ឋមន្ត្រី ស្នើដល់សហជីពទាំងអស់ សូមបំពេញតួនាទីតាមវិជ្ជាជីវៈរបស់ខ្លួន

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើដល់សហជីពទាំងអស់ សូមបំពេញតួនាទីតាមវិជ្ជាជីវៈរបស់ខ្លួន ដើម្បីតំណាងឲ្យកម្មករ-និយោជិត ជៀសវាងយកឈ្មោះជាសហជីព តែដឹកនាំកម្មករ-និយោជិត ទៅធ្វើការងារអ្វីផ្សេង ពិសេសការងារនយោបាយ។

ការស្នើនេះ ធ្វើឡើងក្នុងពិធីជួបសំណេះសំណាលជាមួយកម្មករ-និយោជិតចំនួន ១៨, ១០៨នាក់ នៅតាមបណ្តារោងចក្រ-សហគ្រាស នៅខណ្ឌកំបូល រាជធានីភ្នំពេញ នាព្រឹកថ្ងៃទី ២១ ខែវិច្ឆិកា ឆ្នាំ ២០២៣នេះ។

សម្ដេចនាយករដ្ឋមន្ត្រី បានថ្លែងថា «សហជីពវិជ្ជាជីវៈ សូមដើរតួនាទីជំនាញតាមអាជីពរបស់ខ្លួន ដើម្បីតំណាងកម្មករ-កម្មការនី កុំយកឈ្មោះជាសហជីព តែប្រមូលបងប្អូនទៅធ្វើការងារអីផ្សេង ជាពិសេសការងារនយោបាយ វាអត់ចំណេញ បើធ្វើការងារតំណាងសិទ្ធិរបស់កម្មករ-កម្មការនី ដោះស្រាយរឿងកម្មករ-កម្មការនី»។

សម្ដេចធិបតី ហ៊ុន ម៉ាណែត បានស្នើដល់សហជីពទាំងអស់ទៀតថា កុំយកការងារជាសហជីព ហើយដឹកនាំកម្មករ-កម្មការិនី ទៅធ្វើការងារអ្វីផ្សេងខុសនឹងជំនាញវិជ្ជាជីវៈ ដែលនាំឲ្យមានបញ្ហាណាមួយ៕