ព័ត៌មានជាតិ

សំណុំរឿងបាត់ប្រេងជិត ៣០ ម៉ឺនបារ៉ែល បិទបញ្ចប់ដោយលក់ប្រេងបានប្រាក់ ២៥ លានដុល្លារ កម្ពុជាបានជាងពាក់កណ្ដាល

បានផុស

១ year មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

លោក កែវ រតនៈ រដ្ឋមន្រ្តីក្រសួងរ៉ែ និងថាមពលបានឱ្យដឹងនៅថ្ងៃទី ២១ ខែវិច្ឆិកា ឆ្នាំ ២០២៣ នេះថា សំណុំរឿងបាត់ប្រេងចំនួន ២៨ ម៉ឺនបារ៉ែល ដែលក្រុមហ៊ុនសាំងហ្គាពួលួចដឹកចេញពីកម្ពុជានាពេលកន្លងមកត្រូវបានបញ្ចប់ការដោះស្រាយដោយលក់បាននូវទឹកប្រាក់ ២៥ លានដុល្លារ ហើយកម្ពុជាទទួលបានទឹកប្រាក់ជាងពាក់កណ្ដាលប្រមាណជាង ១៤ លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន គ្រីសអេនើជី (KrisEnergy) ដែលមានទីតាំងនៅប្រទេសសិង្ហបុរី ទទួលបានសិទ្ធិរុករក និងបូមប្រេងឆៅពីកម្ពុជាជួបបញ្ហាក្ស័យធន ហើយបានជួលនាវា MT Strovolos លួចដឹកប្រេងពីម្ពុជា កាលពីថ្ងៃទី១៩ ខែមិថុនា ឆ្នាំ២០២១ ដោយបាននាំយកទៅជាមួយនូវប្រេងឆៅរបស់កម្ពុជាចំនួន ២៨ ម៉ឺនបារ៉ែល។

នៅអំឡុងចុងខែកក្កដា ឆ្នាំនោះ នាវា និងនាវឹកជាច្រើននាក់ ត្រូវបានអាជ្ញាធរឥណ្ឌូនេស៊ីឃាត់ខ្លួន បន្ទាប់ពីចូលចតនៅដែនសមុទ្ររបស់ឥណ្ឌូនេស៊ី ដោយគ្មានការអនុញ្ញាត។

លោក កែវ រតនៈបញ្ជាក់នៅក្នុងវេទិកា ពិភាក្សា គោលនយោបាយរ៉ែ និងថាមពលនៅនៅព្រឹកថ្ងៃអង្គារ៍ទី ២១ វិច្ឆិកានេះថា ការវិនិយោគរបស់ក្រុមហ៊ុន គ្រីសអេនើជី មិនជោគជ័យទៅតាមផែនការ។ ដោយសារក្រុមហ៊ុនក្ស័យធន ហើយក៏បោះបង់ការបូបប្រេងឆៅនៅប្លុក A។

លោកបញ្ជាក់ថា ការដោះស្រាយជាមួយក្រុមហ៊ុន កប៉ាល់ដឹកប្រេងដែលចាប់បានដោះស្រាយចែកគ្នាទៅលក់ប្រេងបានប្រាក់ ២៥ លានដុល្លារ ចែកជាងពាក់កណ្ដាលមកកម្ពុជា បានជាង ១៤ ម៉ឺនដុល្លារ។

លោក កែវ រតនៈ បញ្ជាក់ថា បច្ចុប្បន្ន កម្ពុជាបើកចំហ និងកំពុងស្វែងរកក្រុមហ៊ុនវិនិយោគពីបរទេស ដើម្បីចុះកិច្ចព្រមព្រៀងពិនិត្យលទ្ធភាពលើការបូមប្រេងបន្ថែមទៀតនៅក្នុងប្លុក A និងប្លុកផ្សេងៗទៀត៕

អត្ថបទ៖ ឡេង ដេត