ទីតាំងសំខាន់២ ត្រៀមស្វាគមន៍អ្នកមកចូលរួមអបអរសាទរព្រះរាជពិធីបុណ្យអុំទូក នៅភ្នំពេញ

ព្រះរាជពិធីបុណ្យអុំទូក អកអំបុក សំពះព្រះខែ កាន់តែខិតជិតមកដល់ ក្រុមការងាររៀបចំតុបតែងសម្រាប់កម្មវិធីបុណ្យ កំពុងមមាញឹកខ្លាំងក្នុងការតែងលម្អ នៅតាមបណ្តោយមហាវិថីព្រះស៊ីសុវត្ថិ មុខសួនច្បារទន្លេចតុមុខ ដើម្បីត្រៀមអបអរសារទរព្រះរាជពិធីបុណ្យ។

ក្នុងរយៈពេល ៣ថ្ងៃ នៃព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប ពោលគឺចាប់ពីថ្ងៃទី២៦-២៨ ខែវិច្ឆិកានេះ រាជធានីភ្នំពេញ បានត្រៀមទីតាំងសំខាន់២ ដើម្បីឱ្យទេសចរដែលមកចូលរួមកម្មវិធីបុណ្យ បានកម្សាន្តសប្បាយ ជាមួយនឹងកម្មវិធីជាច្រើន។

១. មុខព្រះបរមរាជវាំង
ដូចបណ្តាឆ្នាំកន្លងដែរ នៅមុខព្រះបរមរាជវាំង គឺជាកន្លែងប្រារព្ធកម្មវិធីប្រណាំងទូក “ង” បណ្តែតប្រទីប និងមានការបាញ់កាំជ្រួច ហើយនៅតាមបណ្តោយមហាវិថីព្រះស៊ីសុវត្ថិ មុខសួនច្បារទន្លេចតុមុខ ក៏មានតុបតែងលម្អយ៉ាងស្រស់ស្អាតហើយសម្រាប់ឆ្នាំនេះ មានទូកចូលរួមប្រកួតប្រមាណជាង ៣០០ទូក។

២. ទីជលគុណ
ទីជលគុណ ជាកន្លែងប្រមូលផ្តុំទៅដោយកម្មវិធីកម្សាន្តសប្បាយជាច្រើន ដោយរួមបញ្ចូលគ្នាជាមួយសិល្បៈ វប្បធម៌ ទំនៀម​ទម្លាប់​ដែលទាក់ទងនឹងបុណ្យអុំទូក ការប្រគំុតន្ត្រី ការសម្ដែងរបាំ។ ក្រៅពីការសម្តែង លោកអ្នកនៅអាចកម្សាន្តកន្លែងថតរូបទីជលគុណ; តំបន់ត្រជាក់ចិត្ត; សួន BEYONDTHEGAMES និង ទីតាំងលេងល្បែងប្រជាប្រិយជា​ដើម​។ ទីជលគុណ ក៏មានរៀបចំស្តង់ជាច្រើនដូចជា ស្តង់អាហារ ស្តង់វត្តអនុស្សាវរីយ៍ ស្តង់កម្សាន្ត និងស្តង់ដៃគូសហការ ដែលអាចឱ្យអ្នកដែលមកចូលរួមព្រះរាជពិធីបុណ្យអុំទូក កម្សាន្តសប្បាយផងដែរ។