ត្រឹម៣ខែ សម្តេច ហ៊ុន ម៉ាណែត ជួយដោះស្រាយបញ្ហា៦ចំណុច ដល់កម្មករ និយោជិត

គិតត្រឹមថ្ងៃទី២២ ខែវិច្ឆិកា ឆ្នាំ២០២៣នេះ មានរយៈពេល៣ខែហើយដែលកម្ពុជា មានរាជរដ្ឋាភិបាលថ្មីដឹកនាំដោយសម្តេចធិបតី ហ៊ុន ម៉ាណែត។ រយៈពេល៣ខែមកនេះ សម្តេចធិបតី បានជួយដោះស្រាយបញ្ហាសំខាន់ៗចំនួន៦ចំណុចដល់កម្មករ និយោជិត នៅក្នុងប្រទេសកម្ពុជា។ នេះបើតាមការគូសបញ្ជាក់ឱ្យដឹងរបស់លោក ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងប្រធានអង្គភាពអ្នកនាំពាក្យរាជរដ្ឋាភិបាលកម្ពុជា។

លោក ប៉ែន បូណា បានគូសបញ្ជាក់ឱ្យដឹងបែបនេះ នៅក្នុងសន្និសីទសារព័ត៌មានពិសេសមួយស្តីពី សមិទ្ធផល​ការងារ​រយៈពេល៣ខែរបស់រាជរដ្ឋាភិបាលថ្មី ក្រោមការដឹកនាំដោយសម្តេចធិបតី ហ៊ុន ម៉ាណែត។ បើតាមលោកប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បញ្ហាសំខាន់ទាំង៦ចំណុច ដែលសម្តេច នាយករដ្ឋមន្រ្តី បានជួយដោះស្រាយជូនកម្មករ និយោជិតក្នុងរយៈពេល៣ខែនេះ រួមមាន ទី១. គឺសម្រេចដំឡើងប្រាក់ឈ្នួលអប្បបរមា ឆ្នាំ២០២៤ ដល់កម្មករ កម្មការិនី ឡើងដល់ ២០៤ដុល្លារក្នុងមួយខែ។

ទី២.គឺបានជំរុញឱ្យរៀបចំលិខិតបទដ្ឋានគតិយុត្តិជាបន្ទាន់ ដើម្បីត្រៀមដាក់ឱ្យដំណើរការរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ឱ្យបានលឿន ដើម្បីពួកគេឆាប់ទទួលបានផលប្រយោជន៍។ ទី៣. គឺបានសម្របសម្រួលឱ្យកម្មករ និយោជិត អាចចូលរៀនជំនាញវិជ្ជាជីវៈក្នុងក្របខណ្ឌកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈដែលមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសចំនួនប្រមាណ ១.៥លាននាក់។

ទី៤.គឺបានជំរុញឱ្យមានការហ្វឹកហ្វឺនកូនជាង ការបណ្តុះបណ្តាលកម្មករ និយោជិត ដើម្បីលើកកម្ពស់សមត្ថភាពជំនាញ បង្កើនផលិតភាព និងលទ្ធភាពបង្កើនប្រាក់ឈ្នួលដល់ពួកគេ ហើយទី៥. ចំពោះស្ត្រីមានផ្ទៃពោះ រាជរដ្ឋាភិបាលបានយកចិត្តទុកដាក់អនុវត្តកម្មវិធីឧបត្ថម្ភទឹកប្រាក់មុនសម្រាល ពេលសម្រាល និងក្រោយសម្រាលកូនឱ្យបានល្អ ព្រមទាំងធានាឱ្យបានថា ស្ត្រីមានផ្ទៃពោះ និងជនមានពិការភាពអាចចេញពីធ្វើការបានមុន១៥នាទី និងទី៦. គឺបង្កើតឱ្យមានកម្មវិធីប្រកួតប្រជែងលើប្រធានបទ ភាពសុខដុមរមនានៅកន្លែងធ្វើការ ដើម្បីប្រែក្លាយសហគ្រាសមួយជាសហគមន៍សុខសាន្ដមួយចាប់ពីឆ្នាំ២០២៤ នេះតទៅ។

បន្ថែមពីលើដំណោះស្រាយទាំងនេះ សម្តេចធិបតី ក៏បានណែនាំដល់ក្រសួងការងារ និងបណ្តុះបណ្តាលវិជ្ជាជីវៈ ឱ្យយកចិត្តទុកដាក់សម្រេចការងារអាទិភាពចំនួន៤ ផ្សេងទៀត ដូចជា បង្កើតទារកដ្ឋាន និងមត្តេយ្យសហគមន៍ នៅតាមតំបន់ដែលមានរោងចក្រ និងកែលម្អកន្លែងហូបបាយ និងអាហារដ្ឋាននៅតាមរោងចក្រឱ្យបានសមរម្យ។ សម្រាប់មធ្យោ​បាយ​ដឹកជញ្ជូនកម្មករនិយោជិត គឺត្រូវមានបច្ចេកទេស និងផាសុខភាពជាងមុនត្រឹមឆ្នាំ២០២៧។ ចុងក្រោយ គឺជំរុញកម្មវិធីធ្វើតេស្តទទួលស្គាល់ជំនាញសម្រាប់កម្មករនិយោជិតទាំងក្នុង និងក្រៅប្រទេស អាចមានវិញ្ញាបនបត្រទទួលស្គាល់ជំនាញមួយ ដើម្បីបង្ហាញពីសមត្ថភាព និងកម្រិតជំនាញរបស់ខ្លួន។

ក្រៅពីជួយដោះស្រាយបញ្ហាសំខាន់ៗជូនកម្មករ និយោជិតទាំងនេះ សម្តេចធិបតី ហ៊ុន ម៉ាណែត ក៏បានអញ្ជើញចុះជួបសំណេះសំណាលជាមួយកម្មករ កម្មការិនីរោងចក្រ សហគ្រាស នៅក្នុងរាជធានី/ខេត្ត បានចំនួន១០លើកមកហើយនៅក្នុងរយៈពេល៣ខែនេះ ដែលមានកម្មករ និយោជិតចូលរួមសរុបចំនួនប្រមាណ ២៨ម៉ឺននាក់៕