សម្ដេចធិបតី ហ៊ុន ម៉ាណែត ស្នើម្ចាស់រថយន្ដដឹកជញ្ជូនកុំដឹកលើសទម្ងន់ ហើយកុំប្រើយ័ន្ដបិទតាមកញ្ចក់ខ្លាំងពេក

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឲ្យម្ចាស់រថយន្ដដឹកជញ្ជូនទាំងអស់ ដឹកឲ្យបានត្រឹមត្រូវតាមច្បាប់កំណត់ ជៀសវាងដឹកលើសទម្ងន់ ហើយកុំប្រើយ័ន្ដបិទតាមកញ្ចក់រថយន្ដ ដែលជាឈ្មោះបុគ្គល ឬក្រុមហ៊ុនណាមួយនោះ ខ្លាំងពេក។

ការស្នើនេះ ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវកំណាត់ផ្លូវជាតិលេខ ៥ (ព្រែក​ក្តាម-បាត់ដំបង) និង បើកការដ្ឋានកំណាត់ផ្លូវជាតិលេខ ៥ (សេរីសោភ័ណ-ប៉ោយប៉ែត) នៅស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃទី ២២ ខែវិច្ឆិកា ឆ្នាំ ២០២៣នេះ។  

សម្ដេចធិបតី ហ៊ុន ម៉ាណែត​ បានថ្លែងថា «កាលពីប្រជុំរបស់រដ្ឋាភិបាល​-វិស័យឯកជន ខ្ញុំបានសម្រេចឲ្យលើកការអនុញ្ញាតទម្ងន់ នៃការដឹកជញ្ជូនពី ៤០ ទៅ ៤៥តោន ដើម្បីឲ្យក្រុមហ៊ុនដឹកជញ្ជូន អាចមានលទ្ធភាពដឹកបានលើសបន្តិច ដើម្បីកាត់បន្ថយចំណាយ ព្រោះគាត់អាចមួយជើងគាត់អាចសន្សំថែម ៥តោន ៥តោន គិតពីមុន ៤០តោន វា ១០ភាគរយជាងហើយ ដំឡើង ១២.ភាគរយទៅឲ្យហើយ ដើម្បីជួយកាត់បន្ថយ»។

សម្ដេចធិបតី ហ៊ុន ម៉ាណែត បានណែនាំដល់ក្រសួង-ស្ថាប័នពាក់ព័ន្ធ ត្រូវត្រួតពិនិត្យមើលឲ្យបានច្បាស់លាស់ អំពីការកំណត់ទម្ងន់នៃការដឹកជញ្ជូននេះ ដើម្បីថែរក្សាផ្លូវថ្នាល់ឲ្យប្រើប្រាស់បានយូរអង្វែង ដែលជាសមិទ្ធផលរួមទាំងអស់គ្នា។ តែអ្វីដែលសំខាន់ គឺការចូលរួមពីម្ចាស់រថយន្តដឹកជញ្ជូនតែម្ដង។

ប្រមុខរាជរដ្ឋាភិបាល​ បាន​បន្ថែមថា «ប៉ុន្តែអ្វីដែលសំខាន់គឺបងប្អូនប្រជាពលរដ្ឋរបស់យើង អ្នកដែលមានឡានដឹកជញ្ជូន ក្រុមហ៊ុនដឹកជញ្ជូន កុំប្រើយ័ន្តខ្លាំងពេក យ័ន្ដបិទតាមកញ្ចក់នោះ ព្រោះយ័ន្ដហ្នឹងតែអនុវត្តតឹង ក៏អត់ជួយដែរយ័ន្ដ​ហ្នឹង ឥឡូវត្រូវពិនិត្យរួមទាំងអស់គ្នា ព្រោះអញ្ចេះពេលដែលយើងហៅ ឡានដឹកជញ្ជូនមកគាត់ថា គាត់ក៏ចង់ដឹកត្រូវដែរ ប៉ុន្តែឲ្យគេដឹកត្រូវគ្នាដែរ ដូចគ្នាទាំងអស់ គោរពទាំងអស់គ្នា»។

សម្ដេចធិបតី ហ៊ុន ម៉ាណែត បានស្នើឲ្យម្ចាស់រថយន្ដដឹកជញ្ជូនទាំងអស់ ចូលរួមអនុវត្តទាំងអស់គ្នា ដោយដឹកឲ្យបានត្រឹមត្រូវតាមច្បាប់កំណត់ ហើយមិនត្រូវដឹកលើសទម្ងន់នោះឡើយ៕