អភិបាលរាជធានីជំរុញឱ្យកងកម្លាំង អាជ្ញាធរយកចិត្តទុកដាក់ការពារសន្តិសុខជូនពលរដ្ឋមកលេងបុណ្យអុំទូក

លោក ឃួង ស្រេង អភិបាលរាជធានីភ្នំពេញបានស្នើឱ្យកម្លាំងពាក់ព័ន្ធ និងអាជ្ញាធរមានសត្ថកិច្ចទាំងអស់ត្រូវយកចិត្តទុកដាក់ឱ្យបានខ្ពស់បំផុតក្នុងកិច្ចការពារសន្តិសុខ សុវត្ថិភាពជូនប្រជាពលរដ្ឋ ដែលមកលេងក្នុងពិធីបុណ្យអុំទូក អកអំបុក សំពះព្រះខែឆ្នាំនេះ ក្នុងនោះត្រូវចាប់អនុវត្តការពិនិត្យអាវុធជាតិផ្ទុះ ចាប់ពីយប់នេះតទៅ ជាមួយនិងការដាក់វេនប្រចាំបញ្ជាឱ្យបានច្បាស់លាស់ សំដៅធានាបានថា ពិធីបុណ្យនេះត្រូវតែដំណើរការទៅដោយរលូន និងទទួលបានជោគជ័យ។

ការស្នើបែបនេះរបស់លោក ឃួង ស្រេង បានធ្វើឡើងក្នុងកិច្ចប្រជុំត្រៀមលក្ខណៈរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនៅព្រឹកថ្ងៃទី ២២ ខែវិច្ឆិកា២០២៣ នៅសាលារាជធានីភ្នំពេញ។

លោក ឃួង ស្រេង បានមានប្រសាសន៍លើកឡើងថា៖ ពិធីបុណ្យអុំទូក អកអំបុក សំពះព្រះខែឆ្នាំនេះ កងកម្លាំង និងអាជ្ញាធរត្រូវតែយកចិត្តទុកដាក់ឱ្យបានខ្ពស់បំផុត ចំពោះទីតាំងណាកកស្ទះខ្លាំងត្រូវតែម្រួល ឬបង្វែរមនុស្សចេញជៀស​វាងកុំឱ្យមានបញ្ហាមិនល្អកើតឡើង។

អាជ្ញាធរខណ្ឌទាំង១៤ និងកម្លាំងមានសមត្ថកិច្ច ត្រូវបែងចែកកម្លាំងចុះល្បាតជាប្រចាំនៅក្នុងមូលដ្ឋាន។ រដ្ឋបាលរាជធានីភ្នំពេញបានរៀបចំជាគណៈកម្មការមួយរួចរាល់ ហើយគណៈកម្មការនេះយើងក៏បានរៀបចំបន្ស៊ីចូលគ្នារួចហើយដែរជាមួយកម្លាំងកងអង្គរ័ក្ស និងអគ្គស្នងការនគរបាលជាតិ សំដៅធ្វើយ៉ាងណាឱ្យព្រះរាជពិធីបុណ្យអុំទូកនេះ ដំណើរការទៅដោយរលូន និងទទួលបានជោគជ័យ។

រដ្ឋបាលរាជធានីភ្នំពេញនឹងចេញសេចក្តីដំណឹងពីទីកន្លែងសប្បាយភាព កន្លែងប្រគុំតន្ត្រីដើម្បីឱ្យប្រជាពលរដ្ឋបានជ្រាបជាដំណឹង ពួកគាត់សម្រេចទៅទស្សនានៅទីតាំងណាមួយ។

លោក ឃួង ស្រេង បានជំរុញឱ្យមានវិធានការចាប់កំប្លោកនៅតាមដងទន្លេសាប សម្រាប់អាជ្ញាធរខណ្ឌព្រែកព្នៅ ខណ្ឌ​ឬស្សីកែវ ខណ្ឌជ្រោយចង្វា ខណ្ឌដូនពេញ និងមន្ទីរកសិកម្មរាជធានីភ្នំពេញ ធ្វើយ៉ាងណាកុំឱ្យកំប្លោកនេះរំខានដល់ការប្រណាំងទូក ត្រូវគិតគូរឱ្យបានម៉ត់ចត់បំផុត ចំពោះការប្រមូលទុកដាក់សំរាម សំណល់រឹងនៅក្នុងពិធីនេះ។

ចំពោះការតុបតែងកែលម្អររាជធានីភ្នំពេញ សម្រេចបានជាង៩០ភាគរយហើយ ក្នុងនោះត្រៀមកំលាំងតុបតែងភ្លើង ត្រៀមកម្លាំងបោសសំអាតជាង៣០០នាក់ ដោយចាប់ពីម៉ោង១១យប់ ដល់៦ព្រឹក បានរៀបចំបន្ទប់ទឹកបង្គន់អនាម័យ ៥៦៧​បន្ទប់ ទាំងបង្គន់សាធារណៈ និងសម្រាប់កីឡាករ។

លោកអភិបាលរាជធានីសូមឱ្យសហការគ្នាជាប្រព័ន្ធលើបញ្ហាចរាចរ ទាំងមន្ទីរសាធារណការ និងដឹកជញ្ជូនរាជធានី និងកម្លាំងសមត្ថកិច្ចប៉ូលិស ដើម្បីកាត់បន្ថយការការស្លាប់ និងរបួសដោយគ្រោះថ្នាក់ចរាចរណ៍។

លោក ឃួង ស្រេង ក៏បានស្នើឱ្យអាជ្ញាធរខណ្ឌយកចិត្តទុកដាក់ចំពោះទីតាំងសប្បាយភាពពិសេសបៀហ្គាឌិនដែលរំខានដល់ដំណេកប្រជាពលរដ្ឋ។ ក្នុងនាមអាជ្ញាធរជាម៉ែជាឪប្រជាពលរដ្ឋ ត្រូវថ្លឹងថ្លែងទាំងសងខាង អ្នកបើកបៀហ្គាឌិនបានធ្វើឱ្យចំណេញដល់ជាតិ តាមរយៈការផ្តល់ជូនការងារជូនប្រជាពលរដ្ឋបានធ្វើ តែបើរំខានប្រជាពលរដ្ឋនៅតំបន់នោះយើងក៏មិនអាចទទួលយកបានដែរ។

លោក ឃួង ស្រេង ក៏បានជំរុញឱ្យអាជ្ញាធរខណ្ឌ បង្ក្រាបគ្រឿងញៀន ល្បែងស៊ីសង់ ចោរឆក់ប្លន់ឱ្យបានខ្លាំងក្លាបំផុត ជាមួយ និងការចុះពិនិត្យនៅតាមដានរារាំង ដើម្បីបង្ការ និងទប់ស្កាត់នូវការជួញដូរមនុស្សគ្រប់ទម្រង់។

គួរបញ្ជាក់ថា៖ តាមគម្រោងព្រះរាជពិធីឆ្នាំនេះនឹងមានទូក ង ចូលរួមប្រណាំងប្រមាណជាង៣០០ទូក (រាជធានីភ្នំពេញមានប្រមាណជាង៤០ទូក), មានកីឡាករ កីឡាការិនីចំណុះទូកប្រមាណជិត២ម៉ឺននាក់ និងមានប្រទីបចូលរួមប្រមាណជាង៣០ប្រទីប។

ចំពោះទីតាំងសម្រាប់ការស្នាក់នៅរបស់កីឡាករចំណុះទូក ត្រូវបានបែងចែកជា២ទីតាំង ក្នុងនោះ នៅអតីតៈឃ្លាំងសាំងក្នុងខណ្ឌឬស្សីកែវមួយទីតាំង និងនៅខាងកើតទន្លេសាបក្នុងដីអភិវឌ្ឍន៍ OCIC ខាងជើងរង្វង់មូលនាងមច្ឆា ខណ្ឌជ្រោយចង្វាមួយទីតាំងទៀត ហើយទីតាំងទាំង២នេះនឹងការរៀបចំបណ្តាញទឹក ភ្លើង និងបង្គន់អនាម័យយ៉ាងល្អប្រសើរផងដែរ៕

អត្ថបទ៖ ស្រីរ័ត្ន