រកឃើញនិទ្ទេស A លំដាប់ពិន្ទុខ្ពស់បំផុត ១០០.០០ ប្រចាំខេត្តសៀមរាប

យុវជន ទក ភីរ៉ាវីន សិស្សវិទ្យាល័យ ១០ មករា ១៩៧៩ ទទួលបានលំដាប់ពិន្ទុខ្ពស់បំផុតប្រចាំខេត្តសៀមរាម។ នេះបើយោងតាមរយៈគណនីហ្វេសប៊ុករបស់ លោក ប្រាក់ សោភណ្ឌ អភិបាលខេត្តសៀមរាប ដោយបានផុសរូបភាពសិស្សម្នាក់ និងក្រដាសលំដាប់ពិន្ទុ ដោយបានរៀបរាប់ថា “សូមអបអរសាទរប្អូនប្រុស ដែលទទួលនិទ្ទេស A លំដាប់ពិន្ទុ ១០០.០០ មធ្យមសិក្សាទុតិយភូមិ ២០២៣ នៅខេត្តសៀមរាប។ ចង់ដឹងណាស់ប្អូនញាំអីរាល់ថ្ងៃ” ។

សូមជម្រាបថា ក្នុងចំណោមបេក្ខជនដែលបានប្រឡងជាប់ចំនួនសរុបចំនួន ៩៨ ៤៦០នាក់ គឺមានសិស្សជាប់ និទ្ទេស A ចំនួន ១ ៦៧៣នាក់។ ក្នុងនោះ យុវសិស្ស ឈ្មោះ ទក ភីរ៉ាវីន ដែលមកពីវិទ្យាល័យ ១០មករា ១៩៧៩ ធ្វើបានល្អគ្រប់មុខវិជ្ជាទាំងអស់ និងលំដាប់ពិន្ទុខ្ពស់ជាងគេ ដែលមានលំដាប់ពិន្ទុដល់ទៅ ១០០.០០ ខណៈយុវតី ឡេង សុគន្ធផុស្សតី ដែលជាសិស្សសិក្សាថ្នាក់វិទ្យាសាស្ត្រពិត នៅរាជធានីភ្នំពេញ ទទួលបានលំដាប់ពិន្ទុ៩៩.៩៩៩ ។

គួររំលឹកថា នៅក្នុងសម័យប្រឡងបាក់ឌុបឆ្នាំ២០២៣នេះ គឺមានបេក្ខជនចុះឈ្មោះប្រឡងសរុបចំនួន ១៣៧ ៤១២នាក់ ស្រី ៧៣ ២៧៨នាក់ មណ្ឌលប្រឡងសរុប ២២៧ ស្មើនឹង ៥ ៥៤៣បន្ទប់។ ជាលទ្ធផលនៃការប្រឡងបាក់ឌុបឆ្នាំ២០២៣នេះ បេក្ខជនប្រឡងជាប់សរុប ៩៨ ៤៦០ នាក់ ត្រូវជា ៧២,៨៩ ភាគរយនៃចំនួន បេក្ខជនមកប្រឡង ។ បេក្ខជនជាប់និទ្ទេស A ចំនួន ១ ៦៧៣ នាក់, និទ្ទេស B ចំនួន ៦ ៩៦៤ នាក់និទ្ទេស C ចំនួន ១៨ ៣០៨ នាក់, និទ្ទេស D ចំនួន ៣៤ ២៤៦ នាក់, និង និទ្ទេស E ចំនួន ៣៧ ២៦៩ នាក់៕