អាជ្ញាធរអេដស៍នឹងចុះចែកស្រោមអនាម័យ ១០ ម៉ឺនស្រោមដល់កីឡាករអុំទូក និងពលរដ្ឋដោយឥតគិតថ្លៃ

អាជ្ញាធរជាតិប្រយុទ្ធនឹងជំងឺអេដស៍សហការជាមួយអង្គការជាដៃគូនានានឹងចុះចែកស្រោមអនាម័យប្រមាណ ១០ ម៉ឺនស្រោមជូនដល់ប្រជាពលរដ្ឋ និងកីឡាករអុំទូកដែលចូលរួមនៅក្នុងព្រះរាជពិធីបុណ្យអុំទូក បណ្តែតប្រទីបអកអំបុកនិងសំពះព្រះខែដោយឥតគិតថ្លៃដើម្បីការពារខ្លួនកុំឱ្យឆ្លងជំងឺអេដស៍។

ថ្លែងក្នុងសន្និសីទសារព័ត៌មានស្តីពីការរៀបចំទិវាពិភពលោកប្រយុទ្ធនឹងជំងឺអេដស៍កាលពីរសៀលថ្ងៃទី ២៤ វិច្ឆិកាលោក ឈឹម ឃិនដារ៉េត អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេសដ៍ (NAA) បានមានប្រសាសន៍ថា នៅក្នុងពិធីបុណ្យអុំទូកបណ្តែតប្រទីបអកអំបុក និងសំពះព្រះខែដែលនឹងប្រព្រឹត្តទៅចាប់ពីថ្ងៃទី ២៦ ដល់ថ្ងៃទី ២៨ វិច្ឆិកាឆ្នាំ​២០២៣​នេះអាជ្ញាធរជាតិប្រយុទ្ធនឹងជំងឺអេដស៍សហការជាមួយអង្គការជាដៃគូនានានឹងរៀបចំការប្រគុំតន្ត្រីមួយដើម្បីធ្វើយុទ្ធនាការផ្សព្វផ្សាយជំងឺអេដស៍នៅរមណីយដ្ឋានវត្តភ្នំរយៈពេល ៣ ថ្ងៃដោយមានការចូលរួមពីតារាចំរៀងល្បីៗ និងមានក្រុមការងារចុះចែកស្រោមអនាម័យដល់ប្រជាពលរដ្ឋ និងកីឡាករអុំទូកប្រមាណ១០ម៉ឺនស្រោមព្រមទាំងមានការធ្វើតេស្តឈាមរកមេរោគអេដស៍ដោយឥតគិតថ្លៃផងដែរ។

លោកបានបន្តថាយុទ្ធនាការនេះធ្វើឡើងដើម្បីផ្សព្វផ្សាយដល់ប្រជាពលរដ្ឋឱ្យបានយល់ដឹងពីវិធីសាស្ត្រការងារនិងរបៀបការចម្លងជំងឺអេដស៍ដើម្បីឱ្យពួកគាត់ចេះការពារខ្លួនកុំឱ្យឆ្លងជំងឺនេះព្រោះថា ជំងឺនេះនៅមិនទាន់ទៅណាទេគឺនៅក្បែរយើងទាំងអស់គ្នាប្រសិនបើយើងធ្វេសប្រហែស។

លោកបានបន្តទៀតថា «នៅក្នុងឱកាសបុណ្យអុំទូកសូមប្រជាពលរដ្ឋ ចូលរួមឱ្យបានច្រើនកុះករដោយក្តីរីករាយ និងសូមការពារខ្លួនការពារកុំឱ្យឆ្លងជំងឺអេដស៍ត្រឡប់ទៅផ្ទះវិញពិសេសបងប្អូនកីឡាករយើងព្រោះថា អេដស៍នៅមិនទាន់ទៅណានៅឡើយទេនៅចាំយើងប្រសិនបើចង់ជួបគាត់នឹងជួបប៉ុន្តែបើសិនមិនចង់ជួបគាត់អាចការពារខ្លួនបានគឺត្រូវតបត្រូវស្មោះ​ស្ម័គ្រមួយទល់មួយស្នេហាប្តីមួយប្រពន្ធមួយប្រពន្ធចាំនៅផ្ទះត្រឡប់ទៅវិញដោយឥតមានប៉ះពាល់អីខាងក្រៅរួចខ្លួនហើយ។ប៉ុន្តែបើសិនជាអត់ទ្រាំមិនបានទេអីចឹងវិធីធំបំផុតគឺប្រើស្រោមអនាម័យឱ្យបានត្រឹមត្រូវព្រោះជាយ័នការអាចការពារការឆ្លងជំងឺអេដស៍»។

លោកបានបន្ថែមថាក្រៅពីស្រោមអនាម័យបងប្អូនក៏អាចប្រើសេវាប្រឹមសម្រាប់លេបការពារការឆ្លងជំងឺអេដស៍មុនពេលរួមភេទ។

លោកសុខជួបសំរើន នាយកប្រតិបត្តិអង្គការខាន់ណាបានមានប្រសាសន៍ថា« សូមចងចាំថាអេសដ៍អត់ទាន់ចប់នៅឡើយទេដូចនេះនៅពេលសង្ស័យផ្ទុកមេរោគអេដស៍ប្រញាប់ទៅធ្វើតេស្តឈាមមានធ្វើដោយខ្លួនឯងឬទៅធ្វើតេស្តនៅតាមមណ្ឌលសុខភាពឬមន្ទីរពេទ្យបង្អែក។ចំណែកសេវាប្រឹមមាននៅ៣៩ទៅតាំងនៅរាជធានីខេត្តចំនួន១៤ក្នុងនោះនៅរាជធានីភ្នំពេញមាន១២ទីតាំង។ចំណែកកន្លែងព្យាបាលវិញមាន៧២ទីតាំងនៅទូទាំងប្រទេស»។

លោកបានបន្តថាអង្គការខាន់ណាក៏មានការចែកស្រោមអនាម័យប្រមាណ៦ម៉ឺនស្រោមផងដែរ។ លោក ស្រី វេជ្ជបណ្ឌិត នូ វណ្ណារី  តំណាងអង្គការមូលនិធិថែទាំសុខភាពអ្នកជំងឺអេដស៍ (AHF)បានមានប្រសាសន៍ថានៅក្នុងឱកាសបុណ្យអុំទូកនេះដែរអង្គការAHFបានចូលរួមជាមួយអាជ្ញាធរជាតិប្រយុទ្ធនឹងជំងឺអេដស៍ចែកអនាម័យប្រមាណ៤ម៉ឺនស្រោម មានក្រុមការងារធ្វើតេស្តឈាមរកមេរោគអេដស៍ដោយឥតគិតថ្លៃនិងមានក្រុមការងារចល័តចុះផ្សព្វផ្សាយពីជំងឺអេដស៍ដល់ប្រជាពលរដ្ឋនិងកីឡាករអុំទូកផងដែរ។

លោកស្រីវេជ្ជបណ្ឌិតបានបន្តថាទន្ទឹមនឹងនេះAHF នឹងមានការរៀបចំព្រឹត្តិការណ៍ដើម្បីរំលឹក និងអបអរសាទេរ នៅថ្ងៃទី២ ខែធ្នូ ឆ្នាំ២០២៣  នៅវេលាម៉ោង៧ព្រឹក ដល់ម៉ោង១០ព្រឹក នៅសួនកំសាន្តយូរ៉ូផាក ក្នុងបុរីប៉េងហួតបឹងស្នោ រាជធានីភ្នំពេញ។

ព្រឹត្តិការណ៍នេះនឹងធ្វើការរំលឹក ផ្តល់កិត្តិយសដល់អ្នកដែលបានបាត់បង់ជីវិតដោយសារជំងឺអេដស៍ ហើយផ្តល់ការគាំទ្រដល់អ្នកដែលបន្តការប្រយុទ្ធប្រឆាំង និងបង្រួបបង្រួមប្រជាជនទូទាំងពិភពលោកក្នុងការប្រយុទ្ធនឹងមេរោគអេដស៍/ជំងឺអេដស៍ព្រោះថាជំងឺអេដស៍គឺមិនទាន់ដល់ទីបញ្ចប់ទេ៕

អត្ថបទ៖ សំអឿន