បេក្ខជនប្រឡងបាក់ឌុបមួយចំនួន ស្នើ​លទ្ធភាព​ពិនិត្យកិច្ចការប្រឡង​របស់​ខ្លួន​ឡើងវិញ

លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជននិងកីឡាមានប្រសាសន៍នៅព្រឹកថ្ងៃទី ២៦ វិច្ឆិកានេះថា​ មានបេក្ខជនប្រឡងមួយចំនួនតូចបានមកសាកសួរព័ត៍មានពីការប្រឡងនៅក្រសួងអប់រំយុវជននិងកីឡា ប៉ុន្តែមិនមានការតវ៉ានោះ​ទេ​។

លោកស្រីបានបញ្ជាក់ថា «មកដល់ពេលនេះ មានប្អូនៗមួយចំនួនបានសាកសួរពីព័ត៌មាននៃភាពអាចទៅរួចក្នុងការពិនិត្យកិច្ចការរបស់ពួកគាត់។ ជាគោលការណ៍ ក្រសួងមិនលើកទឹកចិត្តក្នុងការតវ៉ានោះទេដោយដំណើរការកែនិងបូកស្រង់កន្លង​មក​បានឆ្លងកាត់ការយកចិត្តទុកដាក់ និងផ្ទៀងផ្ទាត់គ្រប់ដំណាក់កាល»។

ប្រឡងបាក់ឌុបឆ្នាំ២០២៣នេះមានបេក្ខជនប្រឡងជាប់សរុបចំនួន ៩៨ ៤៦០ នាក់ត្រូវជា ៧២,៨៩ ភាគរយនៃចំនួនបេក្ខជនមកប្រឡងចំនួន ១៣៥ ០៨៤ នាក់ស្រី ៧២ ៣៤៤ នាក់ក្នុងចំណោមបេក្ខជនចុះឈ្មោះប្រឡងសរុបចំនួន​១៣៧.៤១២ នាក់ស្រី ៧៣.២៧៨ នាក់។ ក្នុងនោះបេក្ខជនជាប់និទ្ទេស A ចំនួន ១ ៦៧៣ នាក់ និទ្ទេស B ចំនួន​៦៩៦៤ នាក់និទ្ទេស C ចំនួន ១៨ ៣០៨ នាក់, និទ្ទេស D ចំនួន ៣៤ ២៤៦ នាក់,និងនិទ្ទេស E ចំនួន ៣៧ ២៦៩ នាក់។

ឆ្នាំមុនមានបេក្ខជនចុះឈ្មោះប្រឡងបាក់ឌុបចំនួន ១២៨ ១៣៤ នាក់ស្រី ៦៨ ៧៧១ នាក់ចែកចេញជា ២២១ មណ្ឌលត្រូវជា ៥១៧៤ បន្ទប់ ក្នុងនោះមានបេក្ខជនប្រឡងជាប់ចំនួន ៩០ ៩៥០ នាក់ស្មើនឹង ៧២,៣៣% នៃបេក្ខជនមកប្រឡងចំនួន ១២៥ ៧៣៥ នាក់ក្នុងនោះមានបេក្ខជនជាប់និទ្ទេស A ចំនួន ១០៤៩ នាក់និទ្ទេស B ចំនួន ៧ ២៣២ នាក់និទ្ទេស C ចំនួន ១៩០ ៥៣ នាក់និទ្ទេស D ចំនួន ៣១ ១៦៦ នាក់និងនិទ្ទេស E មានចំនួន ៣២ ៤៥០ នាក់៕

អត្ថបទ៖ សំអឿន