បើកកម្មវិធី​ប្រណាំងទូក-ងនៅខេត្តសៀមរាប នៅរសៀលថ្ងៃនេះ

នារសៀលថ្ងៃទី២៦ ខែវិច្ឆិកា ឆ្នាំ២០២៣ ខេត្តសៀមរាប​បានបើកកម្មវិធីប្រណាំងទូក-ង ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ នៅតាមដងស្ទឹងសៀមរាបមុខទីស្នាក់ការគណបក្សប្រជាជនកម្ពុជា។

លោក អ៊ឹង គឹមលាង អភិបាលរងខេត្ត និងជាប្រធានអនុគណៈកម្មការបច្ចេកទេសប្រណាំងទូក-ងខេត្តសៀមរាបបានឲ្យដឹងថា ការប្រណាំងទូក-ងនៅតាមដងស្ទឹងសៀមរាប មានទូក​ចូលរួមប្រណាំងចំនួន ៣២ ទូក ក្នុងនោះទូកផ្នែកនារីមានចំនួន ៣ ទូក មានកីឡាករសរុបចំនួន ១០៩៩នាក់ ក្នុងនោះកីឡាការិនីមានចំនួន ៨៩នាក់ ដោយចែកចេញជា ៥ ពូល និងមានការអុំក្រឡោសម្រាប់ការបើកការប្រកួតប្រណាំងទូក-ង ចំនួន ៥ គូផងដែរ។

លោក ប្រាក់ សោភ័ណ អភិបាលខេត្តសៀមរាប​បាន​ឲ្យ​ដឹង​ថា ព្រះរាជពិធីនេះជាព្រឹត្តិការណ៏វប្បធម៌ប្រវត្តិសាស្ត្រដ៏ធំមួយក្នុងចំណោមព្រឹត្តិការណ៍វប្បធម៌ជាតិជាច្រើនទៀត ដែលបុព្វបុរសខ្មែរបានបង្កើតឡើងជាច្រើនសតវត្សមកហើយ។

ដើម្បីរួមចំណែកក្នុងការថែរក្សាវប្បធម៌ អរិយធម៌ ទំនៀមទំលាប់ ប្រពៃណីជាតិ រដ្ឋបាលខេត្តសៀមរាបតែងតែបានប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ ជារៀងរាល់ឆ្នាំនៅថ្ងៃ១៤ និង ថ្ងៃ១៥កើត ខែកត្តិក ប៉ុន្តែបានខកខានរយៈពេល ៣ ឆ្នាំចាប់ពីឆ្នាំ២០២០ ដល់ឆ្នាំ២០២២ ក្នុងអំឡុងពេលនៃការរីករាលដាលជំងឺកូវីដ-១៩ កាលពីចុងឆ្នាំ២០១៩។

ជាមួយនឹងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣ រដ្ឋបាលខេត្តសៀមរាប បានសហការជាមួយសហភាពសហព័ន្ធយុវជនកម្ពុជាខេត្តសៀមរាប បានរៀបចំកម្មវិធីកម្សាន្តផ្សេងៗដូចជា កម្មវិធីជិះទូកកម្សាន្ត ទស្សនាផ្សារទឹក ពិព័រណ៍ម្ហូបអាហារ ល្បែងកម្សាន្តតំបន់ធ្លាក់ទឹក ការប្រគុំតន្ត្រី និងប្រដាល់ “គុនខ្មែរ” លំដាប់អន្តរជាតិ ចាប់តាំងពីថ្ងៃទី ២៥ និងបន្តរហូតដល់ថ្ងៃទី២៨ ខែវិច្ឆិកា ខាងមុខ៕

អត្ថបទ៖ គឿនវ៉េត