ក្រោយតភ្ជាប់ផ្លូវប្របមាត់សមុទ្រជាង ១០គីឡូម៉ែត្រ បានបង្កភាពងាយស្រួលដល់ភ្ញៀវទេសចរ ទៅលេងឆ្នេរអង្កោល

លោក ឆាង ឆៃ អភិបាលស្រុកដំណាក់ចង្អើរ បានលើកឡើងថា ខេត្តកែប បានប្រែមុខមាត់ថ្មី ក្រោយទទួលបានផ្លូវប្របមាត់សមុទ្រមួយខ្សែជាង ១០គីឡូម៉ែត្រ តភ្ជាប់ពីកំពង់ផែកោះទន្សាយក្រុងកែប ទៅឆ្នេរអង្កោល ដែលស្ថិតនៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប។

ឆ្នេរសមុទ្រអង្កោល ជាកន្លែងកម្សាន្តដ៏ទាក់ទាញនៅខេត្តកែប។ ភ្ញៀវទេសចរ អាចសម្រាកលម្ហែកាយ ស្រូបយកខ្យល់អាកាសល្អបរិសុទ្ធ ហែលទឹកសមុទ្រលេងកម្សាន្ត មើលថ្ងៃលិច បោះតង់ និងស្ទូចត្រី ជាដើម។ នៅឆ្នេរអង្កោល សំបូរដោយគ្រឿងសមុទ្រធម្មជាតិ ដែលរកបានដោយប្រជានេសាទ ដូចជា៖ ក្ដាម និងបង្គារ ដែលមានតម្លៃសមរម្យ។ ការធ្វើដំណើរពីឆ្នេរអង្កោល ទៅកាន់ក្រុងកែប មានចម្ងាយជាង ១០គីឡូម៉ែត្រ និងប្រើពេលត្រឹមតែ ១០នាទីប៉ុណ្ណោះ។

លោក ឆាង ឆៃ អភិបាលស្រុកដំណាក់ចង្អើរ បានឲ្យដឹងបន្តថា ពីមុនឆ្នេរអង្កោលនេះ មិនសូវមានភ្ញៀវទេសចរជាតិ-អន្តរជាតិ ប៉ុន្មាននោះទេ ដោយសារមិនទាន់មានផ្លូវចូលដល់ឆ្នេរ។ ប៉ុន្តែមួយរយៈពេលចុងក្រោយនេះ ឆ្នេរអង្កោលបានប្រែមុខមាត់ថ្មី ក្រោយផ្លូវមួយខ្សែប្រវែងជាង ១០គីឡូម៉ែត្រ បានតភ្ជាប់ពីកំពុងផែទេសចរណ៍កោះទន្សាយក្រុងកែប មកដល់ឆ្នេរអង្កោលបំបែកតភ្ជាប់ទៅផ្លូវជាតិលេខ ១៣-៣២ ដោយបានបង្កភាពងាយស្រួល ដល់ភ្ញៀវទេសចរជាតិ-អន្តរជាតិ ទៅលេងកម្សាន្ដ។

លោកបានបញ្ជាក់ថា បន្ទាប់ពីផ្លូវប្របមាត់សមុទ្រ បានតភ្ជាប់ពីកំពុងផែទេសចរណ៍កោះទន្សាយក្រុងកែប មកដល់ឆ្នេរអង្កោលមក គឺមានប្រជាពលរដ្ឋ និងភ្ញៀវទេសចរជាតិ-អន្តរជាតិ បានមកលេងលម្ហែកម្សាន្តយ៉ាងច្រើនកុះករ នៅឆ្នេរអង្កោល ជាពិសេសថ្ងៃឈប់សម្រាកចុងសប្ដាហ៍ ឬថ្ងៃបុណ្យទាន។ ឆ្នេរអង្កោល ជាឆ្នេរធម្មជាតិមិនទាន់មានការកែច្នៃ មានខ្សាច់ល្អ និងទឹកថ្លា ផងដែរ។

អាជ្ញាធរ តែងតែណែនាំដល់អាជីវករលក់ដូរ នៅតាមតំបន់ឆ្នេរនេះជាប្រចាំ ត្រូវរៀបចំបញ្ជីមុខម្ហូបឲ្យបានច្បាស់លាស់ និងដាក់តម្លៃឲ្យសមរម្យ កុំឲ្យមានការលួចបន្លំភ្នែកជញ្ជីងដល់ភ្ញៀវ ធ្វើយ៉ាងណាឲ្យភ្ញៀវមកលេងកម្សាន្តម្ដងហើយ ចង់ដើមកលេងកម្សាន្តម្ដងទៀត៕  

អត្ថបទ៖ សឹង រ៉ាត់