ខេត្តកំពត ទទួលបានភ្ញៀវទេសចរជាតិ-អន្តរជាតិ ជាង ៥ម៉ឺននាក់ ក្នុងរយៈពេល ២ថ្ងៃ នៃព្រះរាជពិធីបុណ្យអុំទូក

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា ក្នុងរយៈពេល ២ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ នៅខេត្តកំពត បានទទួលភ្ញៀវទេសចរជាតិ-អន្តរជាតិ ទៅដើលេងកម្សាន្តប្រមាណ ៥៥,៣៩៨នាក់។ ក្នុងនោះភ្ញៀវទេសចរជាតិចំនួន ៥៤,៤៦២នាក់ និងភ្ញៀវទេសចរណ៍អន្តរជាតិចំនួន ៩៣៦ នាក់។

លោក សយ ស៊ីណុល បានឲ្យដឹងនៅថ្ងៃទី ២៨ ខែវិច្ឆិកានេះថា ចំពោះសេវាកម្មស្នាក់នៅ ត្រូវបានភ្ញៀវកក់បន្ទប់ពេញអស់ នៅយប់ថ្ងៃទី ២៦ ខែវិច្ឆិកា និងថ្ងៃទី ២៧ ខែវិច្ឆិកាឆ្នាំ ២០២៣។ បើគិតត្រឹមម៉ោង ៣រសៀល ថ្ងៃទី ២៨ ខែវិច្ឆិកានេះ ក៏មានការកក់បានប្រមាណជាង ៨០ភាគរយ ខណៈដែលតម្លៃមិនមានការដំឡើងថ្លៃនោះទេ។

ខេត្តកំពត មានតំបន់គោលដៅទេសចរណ៍ទាក់ទាញ និងរមណីយដ្ឋានសរុបចំនួន ៣៦កន្លែង និងចែកចេញទៅជា ៤តំបន់ គឺតំបន់ឧទ្យានជាតិព្រះមុនីវង្សបូកគោ តំបន់ទឹកឈូ តំបន់កសិ-ទេសចរណ៍ ចំការម្រេច (ឃុំកូនសត្វ) និងតំបន់ទំនប់ម្លេច៕

អត្ថបទ៖ សឹង រ៉ាត់