សម្តេចធិបតី ហ៊ុន ម៉ាណែត គូសបញ្ជាក់ថា ការអភិវឌ្ឍវិស័យអគ្គិសនី នៅ​តែជារបៀបវារៈដ៏សំខាន់ នៃនយោបាយសេដ្ឋកិច្ចរបស់កម្ពុជា

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ការអភិវឌ្ឍវិស័យអគ្គិសនី នៅ​តែជារបៀបវារៈដ៏សំខាន់ នៃនយោបាយសេដ្ឋកិច្ចរបស់កម្ពុជា សម្រាប់នីតិកាលទី ៧ នៃរដ្ឋសភានេះ។

ការគូសបញ្ជាក់នេះ ធ្វើឡើងក្នុងពិធីបិទស្ទឹង និងបើកការដ្ឋានសាងសង់ទំនប់វារីអគ្គីសនីស្ទឹងតាតៃលើ នៅស្រុកថ្មបាំង ខេត្តកោះកុង នាព្រឹកថ្ងៃទី ៣០ ខែវិច្ឆិកា ឆ្នាំ ២០២៣នេះ។  

សម្ដេចធិបតី ហ៊ុន ម៉ាណែត មានប្រសាសន៍ថា វិស័យអគ្គិសនី គឺជាវិស័យអាទិភាពមួយ ក្នុងចំណោមវិស័យអាទិភាពនានា ដែលរាជរដ្ឋាភិបាលកម្ពុជា យកចិត្តទុកដាក់ជំរុញការអភិវឌ្ឍ។

សម្ដេចនាយករដ្ឋមន្ត្រី បានបញ្ជាក់ថា «ការអភិវឌ្ឍវិស័យអគ្គិសនី នៅតែជារបៀបវារៈដ៏សំខាន់នៃនយោបាយសេដ្ឋកិច្ចរបស់កម្ពុជា សម្រាប់នីតិកាលទី ៧ នៃរដ្ឋសភានេះ ព្រោះថា ថាមពលមិនមែនត្រឹមតែផលិតផលមួយ ដែលតម្រូវការសម្រាប់តែពលរដ្ឋនោះទេ តែជាផលិតផលមួយដែលចាំបាច់ជំរុញការអភិវឌ្ឍវិស័យផ្សេងៗ»។

ប្រមុខរាជរដ្ឋាភិបាល​ បានបញ្ជាក់ថា ការជំរុញ ការអភិវឌ្ឍវិស័យថាមពលអគ្គិសនីឲ្យបានត្រឹមត្រូវ និងរីកចម្រើនឆាប់រហ័ស គឺជាគន្លឹះដ៏សំខាន់ក្នុងការជួយជំរុញឲ្យមានកំណើនសេដ្ឋកិច្ច ប្រកបដោយចីរភាពរបស់ប្រទេស និងជួយបង្កើនសុខដុមនីយភាពរបស់ប្រជាពលរដ្ឋ៕