ព័ត៌មានជាតិ

ពិធីបុណ្យសមុទ្រនៅខេត្តកែបឆ្នាំនេះ រៀបចំនៅតាមបណ្ដោយឆ្នេរខ្សាច់ប្រវែង២៧០០ម៉ែត្រ

បានផុស

១ year មុន

នៅ

ថ្ងៃសុក្រ ១ ធ្នូ ២០២៣

ដោយ

ពីធីបុណ្យសមុទ្រលើកទី១០ ជុំទី៣ ដែលខេត្តកែបធ្វើជាម្ចាស់ផ្ទះ មានរយៈពេល០៣ថ្ងៃចាប់ពីថ្ងៃទី១ ដល់៣ ខែធ្នូ ឆ្នាំ២០២៣ត្រូវបានរៀបចំឡើង ក្រោមប្រធានបទ យើងទាំងអស់គ្នាដើម្បីទេសចរណ៍។សម្តេចសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី នឹងអញ្ជើញជាអធិបតីភាពក្នុងពិធីបើកនៅថ្ងៃទី២ ខែធ្នូ ស្អែកនេះ។

នៅក្នុងព្រឹត្តិការណ៍ពិធីបុណ្យសមុទ្រនេះដែរ ក៏មានការដាក់តាំងពិព័រណ៍នូវផលិតផលយ៉ាងសម្បូរបែប និងការដាក់តាំងបង្ហាញនូវផលិតផលម៉ាកល្បីៗជាច្រើនមុខ រួមនិងការប្រគំតន្ត្រីដែលមានការចូលរួមពីតារាសិល្បៈល្បីៗ ហើយសង្ឃឹមថា និងមានប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិ ចូលរួមកំសាន្តយ៉ាងច្រើនកុះករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមការឲ្យដឹងពីអាជ្ញាធរ ពិធីបុណ្យសមុទ្រលើកទី១០ ជុំទី៣ ដែលខេត្តកែបទទួលធ្វើជាម្ចាស់ផ្ទះនេះគឺមានការរៀបចំដាកើតាំងមានចំនួន ៣ ទីតាំង គឺទី១ បានដាក់តាំងនៅចំណុចឆ្នេរថ្មីនៅតំបន់ផ្សារក្តាម ទី២ និងដាក់តាំងនៅចំណុចឆ្នេរលេងទឹកនៅទល់មុខមន្ទីរទេសចរណ៍ខេត្តកែប និងទី៣ បានដាក់តាំងនៅចំណុចមុខសាលាខេត្តកែបតែម្តង។

ព្រឹត្តិការណ៍ ពិធីបុណ្យសមុទ្រលើកទី១០ជុំទី៣ នេះមានការចូលរួមសហការពី ក្រសួងទេសចរណ៍និង រដ្ឋបាលខេត្តកែប រួមទាំងសហភាពសហព័ន្ធយុវជនកម្ពុជា ក្រសួងស្ថាប័នពាក់ព័ន្ធ ព្រមទាំងផ្នែកឯកជនជាច្រើនទៀត។

បើយោងតាមសេចក្តីជូនដំណឹងលេខ ៥២០ សជណ.អគឧ ចុះថ្ងៃទី២៥ ខែវិច្ឆិកា ឆ្នាំ២០២៣ របស់ក្រសួងទេសចរណ៍បានឲ្យដឹងថា នៅថ្ងៃទី២ ខែធ្នូ ឆ្នាំ២០២៣ ក្រសួងទេសចរណ៍ និងរដ្ឋបាលខេត្តកែប នឹងរៀបចំព្រឹត្តិការណ៍ជិះកង់កម្សាន្តលក្ខណៈមហាជន ក្នុងបំណងចូលរួមអបអរសាទរពិធីបុណ្យសមុទ្រលើកទី១០ ជុំទី៣ ឆ្នាំ២០២៣ នៅខេត្តកែប ដើម្បីផ្សព្វផ្សាយពីសក្តានុពលទេសចរណ៍នៅខេត្តកែប ជំរុញកំណើនភ្ញៀវទេសចរ និងទាក់ទាញចំណាប់អារម្មណ៍អ្នកស្នេហាវិស័យកីឡា ទេសចរជាតិ និងអន្តរជាតិ ឲ្យមកទស្សនាខេត្តកែបកាន់តែច្រើនឡើង។

ព្រឹត្តិការណ៍បុណ្យសមុទ្រនេះនិងមានការជិះកង់អបអសាទរហើយនិងមានការជួបជុំគ្នានៅចំណុចទីតាំងចាប់ផ្តើមនៅមុខខ្លោងទ្វារប្រារព្វពិធីបុណ្យសមុទ្រក្បែផ្សារក្តាមនៅតំបន់A នៅវេលាម៉ោង ៦,៣០នាទីព្រឹក ហើយនៅម៉ោង ៧,០០ និងមានកាអញ្ជើញមកដល់របស់ ឯកឧត្តម សុខ សូកេន រដ្ធមន្រ្តីក្រសួងទេសចរណ៍ ដើម្បីមានមតិស្វាគមន៍ រួចចាប់ផ្តើមចេញដំណើរទៅកាន់គោលដៅនៅចំណុចកំពង់ផែរទេសចរណ៍កោះទន្សាយ ដើម្បីថតរូបទុកជាអនុស្សាវរីយ៍។

អត្ថបទ៖ សឹង រ៉ាត់